იდეის გარშემო, რომელიც საკუთარი სიზმრების ელექტრონულ ბაზაში დაარქივებას და მსოფლიო რუკაზე განთავსებას გულისხმობს, პოეტი და მუსიკოსი ზურა ჯიშკარიანი და „უნილაბის“ დირექტორი სანდრო ასათიანი გაერთიანდნენ.
დღეს სიზმრების შესახებ მეცნიერ-ფსიქოლოგთა წრეში არაერთი თეორიაა გავრცელებული. ყველაზე პოპულარულია ზიგმუნდ ფროიდის მოსაზრება, რომ სიზმრები ჩვენი ქვეცნობიერის პროექციაა და ის ადამიანის დაფარულ ვნებებსა და სურვილებს გამოხატავს. არანაკლებ პოპულარულია კარლ იუნგის მოსაზრებაც, რომ სიზმარი ადამიანის ემოციებსა და შიშებს ხდის ფარდას. ცნობილია იენ უოლესის მოსაზრებაც, რომ სიზმრებს თავად განვაგებთ, ჩვენ ვართ მისი რეჟისორები.
სანამ მეცნიერები ერთ აზრამდე მივლენ, ჯეოლაბში გადაწყვიტეს, რომ ეს „არამატერიალური სიმდიდრე“, როგორც ზურა ჯიშკარიანი აღნიშნავს, დაარქივონ და შექმნან სიზმრების მსოფლიო ბაზა, რომელიც არაერთი მეცნიერების კვლევის ობიექტი შეიძლება გახდეს. გარდა ამისა, როგორც იდეის ავტორი ამბობს, სიზმრების ერთიანი ბაზა ხელოვანი ადამიანების შთაგონების წყაროდ შეიძლება იქცეს. თუ გავიხსენებთ სალვადორ დალის ნახატებს, ბეკსინსკის შემოქმედებას და არაერთი წამყვანი რეჟისორის ფილმს, ეს სავსებით რეალისტურად ჟღერს.
„ადამიანები ყოველ ღამე ნახულობენ სიზმრებს. დილით კი იღვიძებენ და ყველაფერი ან მაშინვე ავიწყდებათ, ან დროთა განმავლობაში ივიწყებენ. არადა სიზმრები არის საოცარი წყარო, საბადო.სიზმრების ფენომენი ჯერ კიდევ ამოუხსენლია, თუმცა ფაქტია, რომ იმაზე მეტი იციან ჩვენ შესახებ, ვიდრე ჩვენ ვიცით საკუთარ თავზე. სიზმრების გაზიარება ადრე რიტუალივით იყო, დღეს კი ეს ხელოვნება უსამართლოდ დაიკარგა“ – ამბობს ჩვენთან საუბარში ზურა ჯიშკარიანი.
პროექტის ფარგლებში საიტის და აპლიკაციის შექმნა იგეგმება. აპლიკაციის ჩამოტვირთვის და დარეგისტრირების შემდეგ ნებისმიერ ადამიანს შეეძლება სიზმრების როგორც აუდიო, ასევე ტექსტური ფორმატით დაარქივება. აუდიო ფორმატით ჩაწერილი სიზმარი გუგლის ალგორითმის გამოყენებით ავტომატურად ტექსტად კონვერტირდება და იტვირთება ვეგ-გვერდზე, საკუთარი სიზმრების დღიურში. ადგილმდებარეობის მონიშვნის შემდეგ კი მსოფლიოს სხვადასხვა წერტილიდან ნებისმიერ ადამიანს ჩვენი სიზმრების დათვალიერება შეეძლება. გარდა ამისა პროექტი საშუალებას გვაძლევს დავინახოთ, რას ხედავს სიზმარში თბილისი, ბერლინი, ნიუ-იორკი. ფაქტობრივად, საშუალება გვეძლება კონკრეტული ქალაქის ან ქვეყნის ფსიქოპორტრეტი დავინახოთ და მისი არქეტიპები ვიკვლიოთ.
სანდრო ასათიანი კი უშვებს იმასაც, რომ პროექტის საშუალებით სხვისი სიზმრების ნახვის შესაძლებლობა მოგვეცემა:
„სიზმრების რუკაზე განთავსებით ჩვენ შეგვეძლება სხვისი სიზმრები დავათვალიეროთ და თუ რომელიმე მათგანის სიუჟეტი მოგვეწონა, ვიმოგზაუროთ იმ ადგილზე და ჩვენც ვნახოთ იგივე თემატიკის სიზმარი“.
პროექტის დასრულება მიმდინარე წლის ზაფხულში იგეგმება. როგორც იდეის ავტორები ამბობენ მასში ხალხის ჩართულობა უმნიშვნელოვანესია, რათა ბაზა მალე შეივსოს, რაც შემდეგ დაინტერესებულ პირებს დაკვირვების საშუალებას მისცემს.
