დღეიდან მთელი ქვეყნის მასშტაბით, მასობრივი ვაქცინაცია იწყება. იმუნიზაცია ქვეყანაში „სინოფარმის“ ვაქცინით წარიმართება.
სრულ მზადყოფნაშია სამედიცინო დაწესებულებები. აღიჭურვა და გადამზადდა 300 ბრიგადა და 150 კლინიკა. კლინიკებთან ერთად ვაქცინაციის პროცესი სპეციალურად მოწყობილ ამცრელ ცენტრებშიც იქნება შესაძლებელი. თუმცა პროცესში, მოთხოვნის მიხედვით რესურსი გაიზრდება.
დაავადებათა კონტროლის ეროვნული ცენტრში განმარტავენ, რომ ხარვეზის შემდეგ, აცრების დაჯავშნის პორტალი უკვე აღდგენილია. ელექტრონულ პორტალზე ძლიერი კიბერშეტევა განხორციელდა, რის გამოც ის გათიშული იყო.
სარეგისტრაციო პორტალზე პრობლემის აღმოსაფხვრელად სპეციალისტები მუშაობდნენ, პროცესში შესაბამისი უწყებები ჩაერთვნენ, რათა ხარვეზი დროულად აღმოფხვრილიყო.
შსს-მ გამოძიება ორი მუხლით დაიწყო. აღდგენის შემდეგ კი, გუშინ საღამოს მონაცემებით, პორტალზე რეგისტრირებული „სინოფარმის“ ვაქცინით აცრის მსურველი 14 ათასამდე ჯავშანი დაფიქსირდა. დაავადებათა კონტროლისა ეროვნული ცენტრი მოუწოდებს მოქალაქეებს, დროულად იზრუნონ ვაქცინით აცრის ჯავშნის რეგისტრაციაზე, მათთვის სასურველ სამედიცინო დაწესებულებაში.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. 21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.
ქვეყანაში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.
