თუ დედა ხართ,ან მალე უნდა გახდეთ, აუცილებლად გაგიჩნდებათ შემდეგი კითხვები: „ შეიძლება,რომ ჩემი პატარა ძუძუთი ვკვებო პანდემიის დროს?!“ უნდა ვაჭამო თუ არა ძუძუ პატარას,როცა ვარ კოვიდ ინფიცირებული?!“ „გადადის თუ არა კოვიდ- 19 დედიდან შვილზე ძუძუთი კვების დროს?!“
„გურია ნიუსი“ გთავაზობთ მენდი რიჩის(გაეროს ბავშვთა ფონდი) სტატიას,სადაც საუბარია ექსპერტთა საბოლოო კვლევის შედეგებზე.
გამოვკვებო ჩვილი დედის რძით პანდემიის დროს?
-დიახ. არ არსებობს მტკიცებულება იმასთან დაკავშირებით, რომ COVID-19-ის ვირუსი გადაიცემა ძუძუთი კვების დროს. დედის რძე ჩვილს უზრუნველყოფს ანტისხეულებით, რომელიც მასზე ყველა მხრივ ჯანსაღ ზემოქმედებას ახდენს და იცავს ბევრი ინფექციისგან. ძუძუთი კვება მნიშვნელოვნად ამცირებს სიკვდილის რისკს ახალშობილებსა და ჩვილ ბავშვებში, მთელი ცხოვრების განმავლობაში მოაქვს სარგებელი ბავშვთა ჯანმრთელობისთვის და აუმჯობესებს დედების ჯანმრთელობასაც.
გქონდეთ კანის კონტაქტი თქვენს ახალშობილთან. ახალშობილის თქვენთან ახლოს მოთავსება ძუძუთი კვების ადრეული დაწყების საშუალებას იძლევა. დროის შერჩევა უმთავრესია და რეკომენდებულია ძუძუთი კვების დაწყება მშობიარობიდან 2 საათის ფარგლებში.
თუ თქვენი პატარა 6 თვის ან უფრო პატარა ასაკისაა, მისთვის აუცილებელია ძუძუთი კვება. მას შემდეგ, რაც თქვენი ბავშვი 6 თვეს გადასცდება, განაგრძეთ ძუძუთი კვება უსაფრთხო და ჯანსაღი შემცვლელი საკვებით.
დასაშვებია ძუძუთი კვება, როცა COVID-19 დამიდასტურდა ან ეჭვი მაქვს ინფიცირებაზე?
-დიახ, უნდა განაგრძოთ ძუძუთი კვება უსაფრთხოების შესაბამისი ზომების დაცვით. COVID-19-ის გადაცემა დედის რძით ან ძუძუთი კვებით არ გამოვლენილა. უსაფრთხოების ზომები გულისხმობს სამედიცინო პირბადის გაკეთებას, ხელების დაბანას საპნითა და წყლით ან ალკოჰოლის შემცველი ხელსაწმენდით გაწმენდას, თქვენს პატარასთან შეხებამდე და შეხების შემდეგ, იმ ზედაპირების რეგულარულ წმენდასა და დეზინფექციას, რომელსაც ეხებით. მკერდის დაბანა მხოლოდ მაშინ არის საჭირო, თუ მასზე დაახველებთ. სხვა შემთხვევაში, არ არის აუცილებელი მკერდის დაბანა ყოველი ძუძუთი კვების წინ.
გავიკეთო COVID-19-ის ვაქცინა თუ ბავშვს ძუძუთი ვკვებავ ან გამოწველილ რძეს ვაძლევ?
-დიახ, COVID-19-ის ვაქცინა რეკომენდებულია ჯანმრთელი ინდივიდებისთვის, რომლებიც ძუძუთი ან გამოწველილი რძით კვებავენ ბავშვებს.
რამდენად უსაფრთხოა ძუძუთი კვების გაგრძელება COVID-19-ის ვაქცინის გაკეთების შემდეგ?
-დიახ, უნდა გააგრძელოთ ძუძუთი კვება ვაქცინაციის შემდეგ, რათა დაიცვათ თქვენი პატარა. ჯანდაცვის მსოფლიო ორგანიზაციის მიერ დამტკიცებული არცერთი ვაქცინა, რომელიც ამჟამად გამოიყენება, არ შეიცავს ცოცხალ ვირუსს, შესაბამისად, არ არსებობს იმის რისკი, რომ ძუძუთი კვებით თქვენს პატარას ვირუსი გადაეცემა.
გამოვკვებო ძუძუთი, როცა ჩემი ბავშვი ავად არის?
-განაგრძეთ თქვენი ბავშვის ძუძუთი კვება, თუ ის ავად გახდება. მიუხედავად იმისა, თქვენს პატარას COVID-19 დაემართება თუ რამე სხვა დაავადება, მნიშვნელოვანია განაგრძოთ მისი გამოკვება დედის რძით. ძუძუთი კვება აძლიერებს თქვენი პატარის იმუნურ სისტემას და თქვენი ანტისხეულები დედის რძით გადაეცემა ბავშვს, რაც მას ინფექციებთან ბრძოლაში ეხმარება.
რა უსაფრთხოების ზომები უნდა დავიცვა ძუძუთი კვების დროს?
-დარწმუნდით, რომ ზუსტად იცავთ ხელის დაბანის ინსტრუქციებს. ხელი უნდა დაიბანოთ საპნითა და წყლით თქვენს პატარასთან შეხებამდე და შეხების შემდეგ. ასევე შეგიძლიათ გამოიყენოთ ხელსახოცი ალკოჰოლის შემცველობით. ამასთან, მნიშვნელოვანია იმ ზედაპირის გაწმენდა და დეზინფექცია, რომელსაც შეეხებით.
ჩვეულებრივ, ყოველი გამოყენების შემდეგ უნდა გარეცხოთ დედის რძის სატუმბი, რძის შემნახველი კონტეინერი და კვებისთვის განკუთვნილი ჭურჭელი.
ჯერ-ჯერობით აქტიური COVID-19 არ გამოვლენილა არცერთ რძეში, რომელიც COVID-19-ით ინფიცირებულ დედას ეკუთვნის.შესაბამისად, ნაკლებ სავარაუდოა COVID-19 დედის რძით ვრცელდებოდეს. მკვლევარები განაგრძობენ რძის ტესტირებას, რომელიც კოვიდ-დადასტურებულ ან სავარაუდოდ კოვიდ-ინფიცირებულ დედებს ეკუთვნით.
ცნობისთვის, სტატია თავდაპირველად გამოქვეყნდა 2020 წლის 28 მაისს. ბოლოს განახლდა 2021 წლის 29 ივლისს.
