ქართველი სპორტსმენებისა და გულშემატკივრებისათვის ბოლო ორი დღე განსაკუთრებით წარმატებული აღმოჩნდა.
თავდაპირველად, ფეხბურთში ევროპის 19-წლამდე ჩემპიონატის შესარჩევი ციკლის დასკვნით მატჩში საქართველოს 19-წლამდე ნაკრებმა ნორვეგია 1:0 დაამარცხა. ვასილ მაისურაძის გუნდმა 7 ქულით პირველი ადგილი დაიკავა და ელიტ-რაუნდში ასპარეზობის უფლება მოიპოვა.
მოგვიანებით საკალათბურთო ევროლიგის მორიგ შეხვედრაში საქართველოს ნაკრებისა და მოსკოვის „ცსკა“-ს მოთამაშე თორნიკე შენგელიამ 33 ქულა მიითვალა.
შემდეგ, საქართველოს ეროვნულმა გუნდმა ქალაქ პრიშტინაში კოსოვოს ნაკრები დაამარცხა.
წარმატებული საღამო კი ჩოგბურთელმა ნიკოლოზ ბასილაშვილმა დააგვირგვინა, რომელმაც აშშ-ში, ინდიან უელსის ტურნირზე ზედიზედ მეორე შეხვედრა მოიგო.
გუშინ კი ესპანური „ვალენსიას“ ქართველი კარის დარაჯი გიორგი მამარდაშვილი ერთი საამაყო ჯილდოს მფლობელი გახდა – ის „ვალენსიას“ სექტემბრის საუკეთესო სეივის ავტორია. ნომინაციაში სამი სეივი იყო წარდგენილი – მამარდაშვილის მოგერიება „ოსასუნასთან“, მისივე სეივი „ალავესთან“ და იასპერ სილესენის ეპიზოდი „ბილბაოსთან“.
„ვალენსიამ“ გამოკითხვა 8 ოქტომბერს დაიწყო, გამარჯვებულის ვინაობა კი 13 ოქტომბერს გამოაცხადა. გულშემატკივრების ხმების უმრავლესობა 27 აგვისტოს, „ალავესთან“ მატჩის 56-ე წუთზე, ქართველი კიპერის მოგერიებას ჰქონდა. აღსანიშნავია, რომ გამოკითხვაში მეორე ადგილზეც გიორგის სეივი გავიდა – „ოსასუნასთან“.
კოსოვოს ნაკრებთან გამარჯვების მომტანი გოლი 82-ე წუთზე ზურიკო დავითაშვილმა გაიტანა, რომელმაც შეხვედრის დასრულების შემდეგ განაცხადა, რომ სამი ქულის მოპოვება ძალიან საჭირო იყო.
„გოლის გატანა ყოველთვის სასიამოვნოა, მაგრამ ახლა ისეთი პერიოდი გვქონდა, როდესაც სამი ქულის მოპოვება ძალიან გვჭირდებოდა. საბედნიეროდ, ყველანაირი ზეწოლა გადავლახეთ და ძალიან რთულ თამაშში გავიმარჯვეთ. რა თქმა უნდა, ყველანი ძალიან გახარებული ვართ და იმედი გვაქვს ასე გავაგრძელებთ“.
მოსკოვის „ცსკა“-ს ქართველმა კალათბურთელმა თორნიკე შენგელიამ სანკტ-პეტერბურგის „ზენიტთან“ მოგებულ (77:67) მატჩში 33 ქულა ჩააგდო, რაც ევროლიგაში მისი კარიერის რეკორდია.
საქართველოს ნაკრების კაპიტანი სასტარტო ხუთეულში იყო და 35:48 წუთში 16-დან 10 ორქულიანი, 4-დან 2 სამქულიანი და 11-დან 7 საჯარიმო ჩააგდო. შედეგად, შენგელიას სარგებლიანობის კოეფიციენტი 37-ს გაუტოლდა და მატჩის უძვირფასესი მოთამაშის ტიტულის მფლობელი გახდა. მეტიც, დიდი შანსია ქართველი თავდამსხმელი ზედიზედ მეორედ ევროლიგის ტურის საუკეთესო კალათბურთელიც გახდეს (გასულ ტურში თურქულ „ეფესს“ 23 ქულა ჩაუგდო და საუკეთესო მაჩვენებელი ჰქონდა).
მატჩის დასრულების შემდეგ ქართველმა საკუთარი წარმატება შემდეგნაირად შეაფასა:
„ვფიქრობ ნებისმიერი რეკორდი მაგარია და ძალიან მახარებს ეს ამბავი, მაგრამ დღეს რომ გუნდს არ მოეგო, ყველაფერს ფასი დაეკარგებოდა. ასე რომ, მიხარია, რომ მოვიგეთ, კმაყოფილი ვარ გუნდით და იმ თამაშით, რომელიც ვაჩვენეთ. ასე უნდა გავაგრძელოთ. ევროლიგაში სეზონის პირველ მატჩში პრობლემები გვქონდა, მაგრამ ყველაფერი გავაანალიზეთ და შევეცადეთ, შეცდომები აღარ დაგვეშვა“.
კატალონიის რეგიონული მთავრობის გადაწყვეტილებით, გარე სპორტულ აქტივობებზე, „კოვიდ-19“-ის პანდემიის გამო დაწესებული დასწრების შეზღუდვა გაუქმდა. ამის შესახებ კატალონიის რეგიონული მთავრობის პრეზიდენტმა პერე არაგონესმა განაცხადა.
ეს იმას ნიშნავს, რომ „ბარსელონასა“ და „ესპანიოლს“ შეეძლებათ საშინაო არენებზე მაყურებელთა 100 პროცენტი დაუშვან. „კამპ ნოუ“ 2020 წლის მარტის შემდეგ არ გავსებულა.
24 ოქტომბერს „ბარსელონა“ მადრიდის „რეალს“ უმასპინძლებს. ეს იმას ნიშნავს, რომ გაუქმებული რეგულაციის გამო, „ელ კლასიკოც“ სავსე ტრიბუნების ფონზე გაიმართება. კატალონიელთა საშინაო არენა 99 354 მაყურებელს იტევს.
„მანჩესტერ სიტის“ კი დორტმუნდის „ბორუსიას“ ფეხბურთელის, ერლინგ ჰოლანდის გადაბირება სურს. გამოცემა „Times“-ის ინფორმაციით, მანჩესტერელებისათვის ნორვეგიელი შემტევის ტრანსფერი ნომერ პირველ პრიორიტეტს წარმოადგენს და ისინი მიზნის მიღწევას ზამთარში შეეცდებიან.
ბრიტანული გამოცემა წერს, რომ იანვარში ჰოლანდის აგენტი, მინო რაიოლა „სიტის“ წარმომადგენლებს შეხვდება და მათთან სამომავლო გეგმებს განიხილავს.
ჰოლანდს „ბორუსიასთან“ კონტრაქტი 2024 წლამდე აქვს გაფორმებული. ხელშეკრულებაში ჩადებულია პუნქტი, რომლის მიხედვითაც, 2022 წლიდან მისი გამოსასყიდი თანხა 75 მილიონი ევრო იქნება.
მიმდინარე სეზონში ნორვეგიელი თავდამსხმელი შესანიშნავად გამოიყურება. ჰოლანდს მონაწილეობა 8 მატჩში აქვს მიღებული და მის ანგარიშზე 11 გოლი და 4 შედეგიანი გადაცემაა.
[sexy_author_bio]
