შპს „ჯანმრთელობის სახლი გურიაში“ ის სამედიცინო დაწესებულებაა, რომელიც წლებია, ინოვაციურ და მაღალი ხარისხის სამედიცინო მომსახურებას სთავაზობს პაციენტებს. როგორც ცნობილია, კლინიკამ ცოტა ხნის წინ შეიძინა კომპიუტერული ტომოგრაფიის აპარატი. რამდენად რთული იყო ამ მიზნის განხორციელება, რა კვლევების ჩატარებაა შესაძლებელი აღნიშნული აპარატით? _ ამ და მკითხველისთვის სხვა საინტერესო კითხვებს პასუხობს შპს „ჯანმრთელობის სახლი გურიაში“ გენერალური დირექტორი სალომე გუდავაძე.
_ მოგესალმებით, ქალბატონო სალომე. კლინიკა „ჯანმრთელობის სახლ გურიაში“ ცოტა ხნის წინ გაიხსნა კომპიუტერული ტომოგრაფიის კაბინეტი. რას გვეტყვით ამის შესახებ _ რატომ ჩათვალა კლინიკის მენეჯმენტმა საჭიროდ ამ აპარატის შეძენა?
_ მოგესალმებით. გამომდინარე იქიდან, რომ თანამედროვე მედიცინაში სხვადასხვა დაავადებების დიაგნოსტირებისა და მონიტორინგის მიზნით ხშირად იყენებენ კომპიუტერულ ტომოგრაფიას, ის რუტინულ კვლევად ითვლება. რადიოლოგიური კვლევის ეს მეთოდი გამოირჩევა მაღალი ინფორმაციულობით და მგრძნობელობით. უფრო მეტიც, თუ გავითვალისწინებთ კომპიუტერული ტომოგრაფიის მნიშვნელობას გადაუდებელი შემთხვევების დიაგნოსტირების თვალსაზრისით, ცალსახაა, რომ წლების განმავლობაში ვიდექით ამ გამოწვევის წინაშე. აღსანიშნავია, რომ წლების მანძილზე ჩოხატაურის მუნიციპალიტეტში მცხოვრებ პაციენტებს კტ გამოკვლევისთვის უწევდათ სხვა რეგიონებში წასვლა. კვლევის ღირებულებას კი ემატებოდა აკომოდაციისა და ტრანსპორტირების ხარჯებიც. ამ კონკრეტულ შემთხვევაშიც, ჩვენი გადაწყვეტილება მიზნად ისახავს გურიის მოსახლეობისთვის ჯანდაცვის სერვისებზე ხელმისაწვდომის გაზრდას, რაც, დამეთანხმებით, ფინანსური და გეოგრაფიული ბარიერების შემცირების გზით მიიღწევა. აქვე მინდა აღვნიშნო, რომ ჩოხატაურის მუნიციპალიტეტში კომპიუტერული ტომოგრაფიის საჭიროება განსაკუთრებით კოვიდპანდემიის პირობებში გამოიკვეთა. ჯანდაცვის მსოფლიო ორგანიზაციის რეკომენდაციით, საერთაშორისო პრაქტიკითა და ჩვენი ქვეყნის გამოცდილებით, ახალი კორონავირუსით (SARS – CoV – 2) გამოწვეული ინფექციის (COVID -19) ფონზე განვითარებული ატიპიური პნევმონიის დიაგნოსტირებისთვის ზრდასრულ პაციენტებში მიზანშეწონილია გულმკერდის ღრუს კტ გამოკვლევა. რისთვისაც აქამდე ჩოხატაურის მუნიციპალიტეტში მცხოვრებ კოვიდინფიცირებულ პაციენტებს სახელმწიფო ხარჯებით უწევდათ სხვა მუნიციპალიტეტში ტრანსპორტირება. აღნიშნული გარემოებიდან გამომდინარე, ნიშანდობლივი იყო, რომ ჩვენს მუნიციპალიტეტში, ჩოხატაურში ყოფილიყო შესაძლებელი აღნიშნული კვლევის ჩატარება და ჩვენ ეს შევძელით.
_ რამდენად რთული იყო ჩანაფიქრის რეალურად ქცევა?
_ მიუხედავად იმისა, რომ კლინიკის დაარსების დღიდან ვაანალიზებდით კომპიუტერული ტომოგრაფიის ჩატარების საჭიროებას კლინიკის ბაზაზე, აღნიშნული მიზნის განხორციელება ბევრ დამაბრკოლებელ ფაქტორთან იყო დაკავშირებული. პირველ რიგში, გამოვყოფდი დროს. წლების წინ კლინიკაში არ გვყავდა შესაბამისი კვალიფიციური სპეციალისტი (რადიოლოგი), რომელიც ადგილზე შეძლებდა აღნიშნული კვლევის ჩატარებას. ამ გამოწვევის გადასაჭრელად ჩვენმა ექიმმა დამატებით გაიარა რეზიდენტურა რადიოლოგიაში. რა პერიოდშიც თეორიული ცოდნის პარალელურად, მუშაობა მოუწია ამ დარგის წამყვან სპეციალისტებთან. ეს ყველაფერი კი დროსთან იყო დაკავშირებული. დღეს სიამაყით შეგვიძლია ვთქვათ, რომ ჩვენს კლინიკაში ამ მიმართულებითაც პროფესიონალ ექიმთან ექნებათ შეხება პაციენტებს. ზოგადად, ჩვენი მენეჯმენტი ორიენტირებულია მომსახურების მაღალ ხარისხზე. ბუნებრივია, დიდი მნიშვნელობა ჰქონდა, კონკრეტულად რომელი ქვეყნის წარმოებულ და რომელი თაობის აპარატს შევიძენდით. ძალიან დიდი ყურადღება და რესურსი ჩავდეთ იმაში, რომ ჩვენს კლინიკაში კომპიუტერული ტომოგრაფიის აპარატი ყოფილიყო საუკეთესო. დღეს უკვე თამამად შეგვიძლია ვთქვათ, რომ 2020-2021 წლის აპარატურით ხდება ჩვენს სამედიცინო დაწესებულებაში კტ გამოკვლევის ჩატარება. თანამედროვე პროგრამა გვაძლევს იმის შესაძლებლობას, რომ დაბალი დოზირების რეჟიმში მივიღოთ მაღალი ხარისხის გამოსახულება. აქვე ხაზი მინდა გავუსვა, საზოგადოების გარკვეულ ნაწილში გავრცელებულ მითს იმის შესახებ, რომ თითქოს კტ კვლევის დროს ადგილი აქვს საშიში დოზებით დასხივებას. რაც არ შეესაბამება სიმართლეს. კტ გამოკვლევის დროს, ისევე, როგორც, მაგალითად, რენტგენოგრაფიის შემთხვევაში, დასხივების დოზა უნდა შეესაბამებოდეს კონკრეტული პროცედურისთვის დადგენილ ნორმას. ჩვენთან კვლევის ჩატარება უსაფრთხოა და შესაბამისობაშია კანონმდებლობით დადგენილ ნორმებთან. დარწმუნებული ვარ, რომ კტ კვლევასთან დაკავშირებული გარკვეული „შიში“ ძალიან მალე გადაილახება და საჭიროების შემთხვევაში, ექიმის მიმართვის საფუძველზე პაციენტები შეძლებენ აღნიშნული კვლევის ჩატარებას.
_ რა კვლევებს სთავაზობს კლინიკა პაციენტებს?
_ ჩვენს კლინიკაში შეგიძლიათ, ჩაიტაროთ თავის ტვინის, ქალას ძვლების, ხერხემლის სვეტის, გულმკერდის, მუცლისა და მენჯის ღრუს ორგანოების კომპიუტერული ტომოგრაფია. საჭიროების შემთხვევაში, კვლევები ტარდება კონტრასტის გამოყენების რეჟიმში. ამასთანვე, ხაზი მინდა გავუსვა კომპიუტერულ ტომოგრაფიას, როგორც არჩევის მეთოდს თავის ტვინის ინსულტისა და ხერხემლის ძვლოვანი სეგმენტის პათოლოგიების დიაგნოსტირების შემთხვევაში.
_ დღეს დიდი ყურადღება ექცევა კოვიდინფიცირებულ პაციენტებში კტ კვლევას. აქვს თუ არა გურიის მოსახლეობას შესაძლებლობა კვლევა ჩაიტაროს თქვენს კლინიკაში?
_ მოგეხსენებათ, რომ კოვიდით ინფიცირებული პაციენტების დიაგნოსტირება, ტრანსპორტირება და მკურნალობა იფარება სახელმწიფო ბიუჯეტიდან გამოყოფილი თანხებით. დიაგნოსტირებისა და სხვა ლაბორატორიული კვლევების მიზნით, ბინაზე მყოფი კოვიდ პაციენტის ტრანსპორტირება ტერიტორიული უპირატესობის პრინციპის დაცულობით უნდა ხორციელდებოდეს. დამეთანხმებით, ჩოხატაურის მუნიციპალიტეტში მცხოვრები პაციენტებისთვის ჩვენი კლინიკა ტერიტორიული უპირატესობის პრინციპს ცალსახად აკმაყოფილებს. შესაბამისად, 2021 წლის 9 დეკემბრიდან, ჯანდაცვის მინისტრის ბრძანების საფუძველზე, ჩართული ვართ კოვიდ შემთხვევების ამბულატორიული დიაგნოსტირების კომპონენტში. რაც მოიცავს სტანდარტულ ლაბორატორიულ კვლევებსა და რადიოლოგიურ დიაგნოსტირებას (გულმკერდის რენტგენოგრაფია და კტ). აღნიშნული პროგრამის ფარგლებში, ჩვენთან პაციენტი ხვდება „ონლაინ“ ექიმის გადაწყვეტილებისა და მიმართვის (ფორმა 3) საფუძველზე. ჩვენი კლინიკური ლაბორატორია აღჭურვილია თანამედროვე აპარატურით. რაც გვაძლევს შესაძლებლობას, რომ კვლევები ჩავატაროთ ადგილზე და მიღებული შედეგები პაციენტს ვაცნობოთ უმოკლეს დროში. რაც შეეხება გულმკერდის ღრუს კტ გამოკვლევას, კოვიდინფიცირებული პაციენტის მიღება შეგვიძლია ყოველდღე 2 საათიდან, უსაფრთხო, კომფორტულ და იზოლირებულ სივრცეში.
_ რამდენად ხელმისაწვდომია მოსახლეობააისთვის კტ კვლევა?
_ როგორც ვთქვით, კოვიდით ინფიცირებული პაციენტების კვლევას მთლიანად ფარავს სახელმწიფო. კტ კვლევა სხვა დანარჩენ შემთხვევაშიც ფინასურად ხელმისაწვდომია. ჩვენი კლინიკა სახელმწიფო საყოველთაო ჯანდაცვაში ჩართული კლინიკაა, ასევე, ვემსახურებით კერძო სადაზღვევო კომპანიების ბენეფიციარებსაც. სამედიცინო მომსახურების დაფინანსების სხვადასხვა პროგრამების მეშვეობით, ძირითად შემთხვევებში, კტ კვლევა მოსახლეობისთვის ფინანსურად ხელმისაწვდომია. ამ მხრივ სხვა დამატებითი ინფორმაციის მისაღებად დაინტერესებულ პირებს შეუძლიათ მოგვმართონ კლინიკაში ან დაგვიკავშირდნენ ჩვენი კლინიკის საკონტაქტო ნომერზე. აქვე, მინდა ვისარგებლო შემთხვევით და თქვენი გაზეთის მკითხველს მივულოცო კალანდა.
გისურვებთ ჯანმრთელობას!
დაინტერესებულ პირებს შეუძლიათ, მიმართონ კლინიკას მისამართზე: ჩოხატაური. ი. ჭავჭავაძის #1 ან დაუკავშირდნენ ნომერზე: 591 33 22 55.
