ჩეჩნეთი მონაგონი იქნება თუ რუსეთი გაბედავს და შემოვა უკრაინაში, არც ერთი სახლი, არც ერთი სადარბაზო უომრად არ დანებდება რუსეთს. ყველა აიღებს იარაღს და მოსახლეობის 70% გაუწევს წინააღმდეგობას, _ აცხადებს უკრაინაში მებრძოლი ქართველი სამხედრო, უკრაინის არმიის მაიორი ზურაბ ჩიხელიძე, “მთავარი არხის” შაბათის ეთერში საუბრისას.
მისი თქმით, ბოლო 8 წლის განმავლობაშ უკრაინის არმია გაძლიერდა და ყოველთვის მზადყოფნაშია, თავდასხმასაც ამ წლების მანძილზე სულ ელოდება. მისივე თქმით, პანიკა არ შეინიშნება არც ჯარში და არც მოსახლეობაში.
მისივე თქმით, იმ დროს, როდესაც საქართველოს უჭირდა და რუსული სამხედრო აგრესიის პირისპირ იდგა, უკრაინა იყო ქვეყანა, რომელიც გვერდში დაუდგა და ამ პირობებში მას არ ჰქონდა უფლება სხვანაირად მოქცეულიყო. იგივეს ფიქრობენ იქ მყოფი სხვა ქართველი მებრძოლებიც:
“დიდი ხანია აქ ვარ და ასე გადაწყვიტა უკრაინის მთავრობამაც და უკრაინის შეიარაღებული ძალების სარდლობამაც, რომ ჩემთვის აღედგინათ ის წოდება, რაც მქონდა საქართველოში და სამხედრო წოდებაც მოეცათ ჩემთვის და ჩაებარებინათ ის ქვედანაყოფები, სადაც ახლა ვმსახურობ და ვიბრძვი” ამბობს ქართველი მებრძოლი.
ის გაკვირვებულია საქართველოს ხელისუფლების მდუმარებით და გულგრილი პოზიციით, რომლსაც ისინი უკრაინის მიმართ ამ მძიმე პერიოდში იჩენენ:
“როდესაც შენი მეზობელი გეხმარება და როდესაც შენ მეზობელს გაუჭირდება და შენ მას არ ეხმარები, ის მეზობელი შენ მეორედ აღარასდროს აღარ დაგეხმარება. უკრაინას ქართველი ხალხი, საქართველო უზომოდ უყვარს. ქართველზე მეტ მეგობრად, მეტ შინაურად, უკრაინელ ხალხს არავინ არ მიაჩნია. თავიანთ მონათესავე და მოძმე ერად მიაჩნიათ“, _ ამბობს ჩიხელიძე.
