წმინდა მიქაელ მთავარანგელოზის სახელობის კლინიკური საავადმყოფოს კლინიკური მენეჯერი, ზაზა ლურსმანაშვილი ინფორმაციას ავრცელებს, რომ თითქოს ოზურგეთელმა ექიმმა, ონკოლოგმა, პროფესორმა ალექსანდრე თავართქილაძემ შექმნა კოვიდის საწინააღმდეგო წამალი, სახელად “სულაჟერი”.
„ფაქტ-მეტრის“ მიერ ფაქტის გადამოწმების შედეგად დგინდება, რომ რეალურად, „სულაჟერი“ არ არის კორონავირუსის საწინააღმდეგო წამალი. შ.პ.ს „სულაჟერის“ ვებგვერდზე მოცემული ინფორმაციის თანახმად, „სულაჟერი“ წარმოადგენს ბიოლოგიურად აქტიურ კვებით დანამატს და მისი გამოყენება რეკომენდებულია:
⦁ ანტიპროლიფერაციული და პროაპოპტოზური საშუალების სახით
⦁ ქიმიოთერაპიულ საშუალებებთან კომპლექსური გამოყენებისათვის მათი ტოქსიკური
გვერდითი მოვლენების შესამცირებლად
⦁ ინფექციური დაავადებების დროს სტანდარტული თერაპიის პარალელურად და შემდგომ
რეკონვალესცენციის პერიოდში
⦁ ღვიძლის ფუნქციების გასაუმჯობესებლად მისი დაზიანების შემთხვევაში (ვირუსული,
მედიკამენტოზური, ალკოჰოლური)
⦁ სისხლის არტერიული წნევის რეგულაციისათვის
⦁ ნახშირწყლოვანი ცვლისა და სისხლის ლიპიდური სპექტრის გასაუმჯობესებლად
⦁ ძვალ-სახსროვანი სისტემის ფუნქციის გასაუმჯობესებლად
⦁ იმუნორეზისტენტობის ასამაღლებლად ფილტვების ქრონიკულად მიმდინარე სპეციფიკური
ინფექციების (მაგ; ტუბერკულოზური ინფექცია, ქრონიკული ბაქტერიული და ვირუსული
ინფექციები) დროს.
ვებგვერდზე განთავსებული ინფორმაციის თანახმად, „სულაჟერი“ შეიცავს Polygonum Cuspidatum-ის ფესვების მშრალ ექსტრაქტს 300 მგ, რომელიც თავის მხრივ შედგება ტრანსრესვერატროლის, ფიტოალექსინებისა და სხვა ფენოლური ანტიოქსიდანტების კონცენტრატებისგან.
„ფაქტ-მეტრი“ ინფორმაციის დასაზუსტებლად ჯანდაცვის სამინისტროს დაუკავშირდა. სამინისტროს განმარტებით, „სულაჟერი“ არ არის საკვლევი მედიკამენტი. ის არის ბიოლოგიურად აქტიური დანამატი. ბიოლოგიურად აქტიური ნივთიერებების ანუ სხვადასხვა ჯგუფის ვიტამინებისა და მიკროელემენტების გამოყენება პაციენტებში შესაძლებელია მკურნალი ექიმის გადაწყვეტილებით.“
COVID-19-ის კლინიკური მართვის გაიდლაინის ერთ-ერთმა ავტორმა და ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკული ცენტრის ექიმმა აკაკი აბუთიძემ „ფაქტ-მეტრთან“ საუბარში განაცხადა: „სულაჟერი“ არ არის მედიკამენტი, ეს არის ბიოლოგიურად აქტიური დანამატი, რომელსაც იყენებენ სხვადასხვა პათოლოგიის დროს და ახლა კოვიდის დროსაც. მისი ანტივირუსული და ანტიბაქტერიული მოქმედება არ არის დამტკიცებული. საჭიროა კლინიკური კვლევის ჩატარება. ამიტომაც რეკომენდაციის გაცემა, როგორც კოვიდის სამკურნალო საშუალება, არ შეიძლება.“
