ციტრუსოვანთა ცუკატებს მრავალი მეთოდით ამზადებენ. ჩვენ შემოგთავაზებთ ფორთოხლის კანის მარტივად, სახელდახელოდ, სახლის პირობებში დამზადებული ცუკატების რეცეპტს, რომლის გასაკეთებლად არც სპეციალური ხილის საშრობი აპარატი გამოგვიყენებია და არც რაიმე ოფიციალური ტექნოლოგია _ ხალხური მეთოდით, საოჯახო პირობებში საუკეთესო ცუკატები მომზადდა.
ერთჯერადი მომზადების დროს, შესაძლებელია, ორი-სამი კილოგრამი ფორთოხლის კანი გამოვიყენოთ.
გავრეცხოთ ფორთოხალი ისე, რომ ლაქები არ შეყვეს და კარგად გავხეხოთ. გაშრეს. შემდეგ ავიღოთ, სათითაოდ გავჭრათ შუაზე, თითოეული ნაჭერი კიდევ გავჭრათ. რბილობი გამოვაცალოთ და განვაგრძოთ თითოეულის გაჭრა. თანაბარი სიგრძის და და ზომის რომ გამოვიდეს, მეოთხედი კიდევ გავჭრათ სიგრძივად. ერთი დიდი, კარგი ფორთოხლისგან (“ვაშინგტონი”) გამოდის 32 ცალი, თხელი, სიგრძივი ნაჭერი, თითქმის, ყველა თანაბარი ზომის. სავალდებულო არაა , ზუსტად ასე დაჭრათ. თუ ვინმეს სურს, ოთხკუთხედებად, რომბისებურად და ა. შ. დაჭრის.
შემდეგ ეს დაჭრილი კანები ჩავყაროთ ცივ წყალში. ორი დღის განმავლობაში, ხუთჯერ გამოვუცვალოთ წყალი. მეორე დღის ბოლოს ამოვიღოთ წყლიდან. დაიწრიტოს კარგად და ჩავყაროთ ორი ჭიქა წყლის და ორი ჭიქა შაქრისგან მომზადებულ სიროფში (ეს საკმარისია ორი კილოგრამი ფორთოხლისგან მომზადებული კანის წამოსახარშად).
სიროფს დავუმატოთ ვანილი, ცოტ-ცოტა მუსკატის კაკალი, მიხაკი და დარიჩინი. როცა სითხე შეაშრება, გადმოვალაგოთ თხელ, საგანგებოდ მომზადებულ ცხაურზე (ამ ცხაურის გაკეთება ძალზე ადვილია შინ, უჟანგავი ლითონის ფირფიტის გამოყენებით).
შემდეგ ეს ფირფიტა დავდოთ საცხობ სინზე (“ჟარონა”) და როცა მზიანი ამინდი იქნება, გავიტანოთ გარეთ. საღამოს კი აირღუმელში, დაბალ ტემპერატურაზე გამოვაშრობთ.
შრობის პროცესი დღეში 2-3 საათის განმავლობაშია სასურველი. სამი დღის შემდეგ, გაგრილებული “ლიფსიტები” ამოვავლოთ შაქრის პუდრაში, ჩავაწყოთ პატარა კონტეინერებში და შევდგათ მაცივარში.
[sexy_author_bio]
