უკრაინაში ომის დაწყების შემდეგ ქვეყნიდან არაერთი ადამიანი იძულებით გადაადგილებული პირი გახდა. ომის დაწყების გამო სამშობლოში დაბრუნება ჩოხატაურის მუნიციპალიტეტის სოფელ ჩხაკაურას მცხოვრებს მალხაზ ირემაძესაც ოჯახთან ერთად მოუწია.
როგორც ირემაძე გვიყვება, უკრაინაში საცხოვრებლად 15 წლის წინ მეუღლესთან ერთად წავიდა.
“ჩემი მეუღლე იქ გაზრდილია. აქ იყო სტუმრად ჩამოსული და გავიცანით ერთმანეთი. საცხოვრებლად იქ წავედით. 15 წელია უკრაინაში, ლუგანსკის ოლქში, ქალაქ ლისაჩანსკში ვცხოვრობ. ჩემი ბიზნესი მქონდა”,_ ამბობს ირემაძე და გვიამბობს, რომ ომის გამო ოჯახმა ყველაფერი დაკარგა.
“სადაც მე ვიყავი იქედან დაიწყო ომი. სახლი, სადაც ვცხოვრობდით დაიშალა. ომის დაწყების დროს მე კიევში ვიმყოფებოდი, ჩემი მეუღლე და უმცროსი შვილი სხვა ქალაქში, ხოლო უფროსი ბიჭი ბიძასთან იყო, ისიც სხვა ქალაქში. სიტუაცია გამწვავებული იყო. რამდენიმე დღე ერთმანეთთან დაკავშირებასაც კი ვერ ვახერხებდით”,_ ამბობს ირემაძე.
მალხაზ ირემაძის უფროსი ვაჟი, ანდრეი ირემაძე მალე 15 წლის ხდება. მოზარდს საუბარი ნანახის შესახებ უჭირს. როგორც ანდრეის მონაყოლიდან ვიგებთ, 22 დღე მოზარდმა სარდაფში გაატარა.
“დავინახე ყველაფერი. როგორ კლავდნენ ხალხს, სახლებს როგორ ბომბავდნენ. 22 დღე ვიჯექი სარდაფში. ჩემი თვალით ვნახე ჩემი მეგობრები, ძმაკაცები როგორ მოკლეს”,_ გვიამბობს ანდრეი.
ანდრეის უმცროსი ძმა ჰყავს. მართალია, ომის დაწყების დროს კობა სხვა ქალაქში იმყოფებოდა დედასთან ერთად, მაგრამ ბავშვს ომის სისასტიკე ახსოვს.
“ვნახე მოკლული ადამიანები, ძაღლები, დანგრეული სკოლები, ბინები”,_ ამბობს კობა.
ოჯახს უკრაინის დატოვება პირადი ნივთების გარეშე მოუწია.
“რაც გვაცვია იმით წამოვედით უკრაინიდან. ერთი ჩანთაც კი არ გვქონია. საქართველოში არ გვაქვს საცხოვრებელი. გვჭირდება ტანსაცმელი, სამუშაო, ბავშვებს სკოლაში სიარული, განათლების მიღება”,_ ამბობს მალხაზ ირემაძე.
ინფორმაციისთვის, ჩხაკაურაში, სადაც მალხაზ ირემაძის მშობლიური სახლი მდებარეობს, მათთვის მუდმივი საცხოვრებელი პირობები არაა.
“აქ მყავს მამა, და-ძმა. 2 დღის წინ ამოვედი სანახავად. კიდევ 4 სული აქ ვერ ვიცხოვრებთ, ადგილი არაა. მეუღლე ბათუმში დარჩა ახლობელთან. სადაც უკეთესი პირობები იქნება ჩვენთვის, ვნახავთ ბინას ქირით, სამუშაოს, ბავშვები ივლიან სკოლაში, იქ ვიცხოვრებთ”,_ ამბობს მალხაზ ირემაძე.
უკრაინიდან ჩამოსულების სანახავად მუნიციპალიტეტის მერი დავით შარაშიძე, საკრებულოს თავმჯდომარე ირაკლი კუჭავა და მერიის სხვა თანამშრომლები იმყოფებოდნენ. მათ ირემაძეებს დახმარება დაპირდნენ და მცირედი საჩუქრები მიუტანეს.
“რაც შეგვეძლება ყველაფერს გავაკეთებთ”,_ განაცხადა მერმა მალზახ ირემაძესთან საუბრის დროს.
შეხვედრაზე აღინიშნა ისიც, რომ ოჯახის დასახმარებლად თანხა გამოიყოფა.
