ლანჩხუთის მუნიციპალიტეტის ტერიტორიაზე, მიზეზთა გამო, ავტობანის მშენებლობა გაჭიანურდა. ლანჩხუთის სოფლებზე გამავალი ავტობანის სამი ლოტიდან მხოლოდ ერთი დასრულდა და 2020 წლის ზაფხულში ჯაპანა-ლანჩხუთის 14-კილომეტრიან გზაზე ორივე მიმართულებით მოძრაობა ზარზეიმით გაიხსნა მაშინდელი პრემიერის, გიორგი გახარიას თაოსნობით.
აღნიშნული 14-კილომეტრიანი მონაკვეთი ლანჩხუთის მუნიციპალიტეტის სოფლებს: ჯაპანას, ქვიანს, ნიგოითს, შუხუთსა და ქალაქის ნაწილს გაივლის. შედეგად მივიღეთ ის, რომ ამ სოფლებში მოძრაობა განტვირთულია და მოსახლეობამაც შვებით ამოისუნთქა. სამაგიეროდ ქალაქში პირველ სკოლასთან მივიღეთ საკმაოდ რთული სიტუაცია, რამეთუ ავტობანთან დამაკავშირებელი გზა აქამდე არსებულ ცენტრალურ მაგისტრალს აქ უერთდება და გარკვეულ სატრანსპორტო ქაოსს ქმნის.
კვლავაც გადატვირთულია ლანჩხუთი-გრიგოლეთის მონაკვეთი, სადაც ავტობანის მშენებლობა ჯერ არ დასრულებულა და საქმეს ისეთი პირი უჩანს, კიდევ დიდი ხანი იქნება ასე. საქმე კი იმაშია, რომ ავტობანის მშენებარე ორი ლოტიდან ერთი დასრულების ფაზაში კია, მაგრამ როდის დაიწყება იქ მოძრაობა, ეს ცნობილი არაა. ეს ხაჯალია-სუფსის ლოტი ჯერ კიდევ შარშან უნდა დახურულიყო, მაგრამ გრუნტის გამაგრება ზედმეტი დაჭაობებობის გამო პრობლემა შეიქმნა და ამ მონაკვეთის ხარისხზეც იმოქმედა. მართალია ასფალტის საფარის დაგება აქ დაიწყო, მაგრამ რა იქნება სამომავლოდ, ეს ბევრ კითხვის ნიშანს აჩენს.
ეს მონაკვეთი, ალბათ, წლის ბოლომდე გაიხსნება, მაგრამ რა ბედი ეწევა მეორე _ ხაჯალია-გვიმბალაურის მონაკვეთს, ღმერთმა უწყის. ამ ლოტზე თავიდანვე პრობლემა გაჩნდა. ჯერ იყო და ტენდერში გამარჯვებულმა ერთმა კომპანიამ საქმე დაიწყო და მალე მიატოვა ისე, რომ ფაქტობრივად, არაფერი გაუკეთებია და ამბობენ სახელმწიფო რამდენიმე ასეული მილიონით აზარალაო. მერე თითქოს მეორე კომპანია ჩანაცვლდა, მაგრამ საქმე წინ არ წასულა და დიდი შანსია, თბილისიდან ბათუმამდე მთელი მაგისტრალი გაიხსნას და ხაჯალია-გვიმბალაური კვლავაც დარჩეს ისე, როგორც არის.
ასეა თუ ისე, ეს პრობლემა არსებობს, მაგრამ არსებობს მეორე პრობლემაც, რომელიც არანაკლებ აქტუალურია. ლანჩხუთი ქუჩების განათების კუთხით ერთ-ერთი გამორჩეული მუნიციპალიტეტია. ფაქტობრივად, სოფელი არ არსებობს, განათებული რომ არ იყოს, მაგრამ პარადოქსია ის, რომ არავის მოსვლია აზრად გაენათებინა ახლა არსებული ცენტრალური ტრასის საკმაოდ მნიშვნელოვანი მონაკვეთი, რომელიც სოფელ ნიგვზიანიდან იწყება და წყალწმინდაზე მთავრდება. ზემოთ აღვნიშნეთ, რომ ეს მონაკვეთი გადატვირთულია საავტომობილო მოძრაობით და განათების არარსებობის გამო მჭიდროდ დასახლებულ სოფლებში გამავალი ეს გზა ერთი-ორად სახიფათოა. სულ ახლახან ახალგაზრდა სამართალდამცავი ემსხვერპლა ავტოსაგზაო შემთხვევას, როცა სოფელ ხაჯალიაზე ქვეითად მოსიარულეს ავტომანქანა შეეჯახა და ეს შეჯახება მისთვის საბედისწერო აღმოჩნდა. ეს ფაქტი ღამის საათებში მოხდა და განათება რომ ყოფილიყო, დიდი ალბათობით, შეჯახების შანსი გაცილებით ნაკლები იქნებოდა.
ფაქტია, რომ ლანჩხუთის მუნიციპალიტეტის ტერიტორიაზე გამავალი ცენტრალური მაგისტრალის ამ მონაკვეთს რატომღაც არ ეღირსა თუნდაც მინიმალური სტანდარტების განათების მოწყობა და რატომ მოხდა ასე, ეს ბევრისთვის გაუგებარია.
ამ საკითხის თაობაზე მეტი დეტალის გასარკვევად “გურია ნიუსი” მერიის ინფრასტრუქტურის სამსახურის უფროსს ლევან ჩხაიძეს დაუკავშირდა, რომელიც ადასტურებს პრობლემის აქტუალობას.
“ღამის საათებში განათების კუთხით მართლაც ცუდი მდგომარეობაა ავტომაგისტრალის ამ მონაკვეთზე, თუმცა, რატომღაც მუნიციპალიტეტის ამ ზონის მოსახლეობისგან არასდროს არ წამოსულა ინიციატივა ამ პრობლემის აღმოსაფხვრელად. მოგეხსენებათ, ძირითადად, “სოფლის პროგრამის” თანხებიდან ხორციელდება გარე განათების მოწყობის პროექტები და ამისთვის სწორედ მოსახლეობის ინიციატივაა საჭირო. მაგალითად, სოფელ ნიგოითის შემთხვევაში სწორედ “სოფლის პროგრამის” თანხებით მოეწყო გარე განათება ცენტრალურ გზაზე, თუმცა, მუნიციპალიტეტის დასავლეთ ზონის სოფლის მოსახლეობა, ძირითადად, შიდა გზების მოწესრიგებას ითხოვს”, _ ამბობს ჩხაიძე.
ავტორი
