გუშინ ესპანურმა გამოცემამ „AS“ გიორგი მამარდაშვილის შესახებ საინტერესო ინფორმაცია გამოაქვეყნა. აღმოჩნდა რომ ქართველი კარის დარაჯით ინგლისური კლუბები დაინტერესდნენ. მათ შორის განსაკუთრებული აქტიურობით „მანჩესტერ იუნაიტედი“ გამოირჩევა.
ზაფხულის სატრანსფერო ფანჯარაზე „იუნაიტედს“, სავარაუდოდ, მეკარე დინ ჰენდერსონი დატოვებს. მის შემცვლელად გიორგი მამარდაშვილი სახელდება. ტრანსფერის შემთხვევაში გიორგი მანჩესტერული გუნდის კარს ევროპა ლიგაზე დაიცავს, ინგლისური პრემიერ ლიგის შეხვედრებში კი კვლავინდებურად დე ხეა იასპარეზებს.
რასაკვირველია „ვალენსია“ ახალგაზრდა ქართველის ხელიდან გაშვებას არ აპირებს. გუშინ გამოცემამ „Eldesmarque Sports COPE Valencia“ გაავრცელა ცნობა, რომ ესპანური გუნდი გიორგი მამარდაშვილს ხელშეკრულებას 2027 წლამდე გაუგრძელებს, გამოსასყიდ თანხას კი 20 მილიონი ევროდან 100 მილიონამდე გაუზრდის.
გამოცემა წერს, რომ მამარდაშვილი გასულ სეზონში გუნდის ერთ-ერთი მთავარი სიურპრიზი გახდა, ყველა მოლოდინს გადააჭარბა. ამიტომ გადაწყვიტეს თანამშრომლობის გაგრძელება და კონტრაქტის გამოსასყიდი ფასის გაზრდა.
გუშინ იტალიურმა გამოცემამ „Areanapoli“ გაავრცელა ცნობა, რომ ხვიჩა კვარაცხელია „ნაპოლის“ მიმდინარე წლის 8-დან 19 ივლისამდე ოფიციალურად შეუერთდება. კლუბი წინასასეზონო შეკრების გავლას ამ დროს დაიწყებს და მისი პრეზიდენტის სურვილია, რომ ხვიჩა თავიდანვე გუნდთან ერთად იყოს.
გუშინ ხვიჩა კვარაცხელიას შესახებ იტალიელმა ჟურნალისტმა სანდრო საბატინიმ ისაუბრა.
„ზაფხულის მომავალ სატრანსფერო ბაზარზე „ნაპოლი“ პრეზიდენტ აურელიო დე ლაურენტისის ხელმძღვანელობით ერთ-ერთი ყველზე აქტიურია. უკვე განახორციელა ორი ოპერაცია. თუ ჩავთვლით ანდრე-ფრანკ ზამბო-ანგისას კონტრაქტის „ფულჰემისგან“ გამოსყიდვას, უკვე სამია. ესენი მატიას ოლივეირა და ხვიჩა კვარაცხელია არიან. ოლივეირა? ჩემი აზრით, ნეაპოლელთა საუკეთესო შენაძენი კვარაცხელიაა. გასულ ზაფხულს მის „მილანში“ შესაძლო გადასვლაზე ვწერდი. შემიძლია გითხრათ, რომ მილანური გუნდი ქართველს კარგა ხანი აკვირდებოდა, მაგრამ „ნაპოლი“ იმითაა კარგი, რომ მილანელებს აჯობა.
კვარაცხელია ლორენცო ინსინიეს შეცვლის? მე მგონია, ნეაპოლელები არ ინანებენ, რადგან ეს ფეხბურთელი კარგად ხედავს მოედანს, მეტოქის კარს, ძალიან ტექნიკურია და ის თვისებები გააჩნია, რაც უდავოდ გამოადგება ბატონ ლუჩანო სპალეტის“, – განაცხადა სანდრო საბატინიმ.
საინტერესო ცნობა გამოაქვეყნა თურქულმა გამოცემამ „Ajansspor“. შოთა არველაძის ინგლისურ „ჰალ სიტის“ 27 წლის საბა ლობჟანიძის ტრანსფერი სურს და შესაბამისი წინადადებით თურქულ „ჰატაისპორს“ უკვე მიმართა.
„ჰატაისპორს“ ინგლისური „ჰალიდან“ დაუკავშირდნენ, რომლის მფლობელიც თურქი ბიზნესმენი აჯუნ ილიჯალია. „ჰალს“ ორი ფეხბურთელის – ქართველი საბა ლობჟანიძისა და მაროკოელი აიუბ ელ კააბის დამატება სურს“, – დაწერა გუშინ გამოცემამ „Ajansspor“.
კომენტარი გააკეთა „ჰატაისპორის“ ვიცე-პრეზიდენტმა მუსტაფა ოზატმაც:
„ვადასტურებ, რომ „ჰალიდან“ დაგვიკავშირდნენ და ამ საკითხზე კლუბის დირექტორთა საბჭოზე ვისაუბრეთ, თუმცა, გადაწყვეტილი არაფერია. პირველ რიგში ლობჟანიძისა და ელ კააბის სატრანსფერო თანხის დადგენაა საჭირო“.
საბა ლობჟანიძემ თურქეთის ჩემპიონატში მესამე სეზონი ჩაატარა. პირველი ორი წელი ქართველმა „ანკარაგუჯუში“ ითამაშა, 2021 წლის ზაფხულში კი „ჰატაისპორს“ შეუერთდა. ქართველ შემტევს თურქული სუპერლიგის ბოლო პირველობაზე 8 გოლი და 8 საგოლე გადაცემა მოუგროვდა. ორი თვის წინ გავრცელდა ცნობა რომ მისი შეძენა თურქული ფეხბურთის ერთ-ერთ ლიდერს „ფენერბაჰჩეს“ სურდა.
რუსების მიერ ოკუპირებულ ნოვაია კახოვკაში დაპატიმრებული მსაჯი ირინა პეტროვა უკვე გაათავისუფლეს და კიევში დაბრუნდა, – ამის შესახებ ინფორმაცია უკრაინის ფეხბურთის ასოციაციის პრეზიდენტმა ანდრეი პაველკომ გაავრცელა.
„ირინა პეტროვას გამო მთელი საფეხბურთო უკრაინა ნერვიულობდა. საბედნიეროდ, ყველაფერ იმის შემდეგ, რაც გადაიტანა, მისი გადმოყვანა მოვახერხეთ. ახლა კიევში უსაფრთხოდაა.
ის ნოვაია კახოვკაში ყოველდღე გამოდიოდა საპროტესტო აქციებზე და რუსი ფაშისტების ამხანაგურ მატჩებზე მსაჯობაზე სასტიკი უარი განაცხადა. ამისათვის დააპატიმრეს და თავისუფლების ხანგრძლივი აღკვეთით ემუქრებოდნენ. ვერ გატეხეს! ირინა უკრაინის თავისუფლებისა და დაუმორჩილებლობის სიმბოლოა. გულწრფელად უყვარს ფეხბურთი და ფეხბურთის ასოციაციის ერთიან გუნდში მუშაობას დათანხმდა. ვამაყობ იმით, რომ ასეთი პროფესიონალი პატრიოტები გვყავს! ირინას რაშისტული ბოროტების მალე დამარცხებას და ერთიანი უკრაინის აღორძინებას ვუსურვებ! “.
ავტორი
