ორი დღის წინ ცნობილი გახდა რომ თბილისის „დინამო“ მთავარმა მწვრთნელმა კახა ცხადაძემ დატოვა. გავრცელდა ფეხბურთის იმ სპეციალისტების ვინაობა რომელთაგანაც ერთ-ერთი უმწვრთნელოდ დარჩენილ კლუბს ჩაიბარებდა. ესენი იყვნენ თემურ ქეცბაია, ლევან კორღალიძე, გიორგი ჭიაბრიშვილი და ესპანელი ჩისკო მუნიოსი.
გუშინ ქართულ სპორტულ მასმედიაში გავრცელდა ცნობა, რომ თბილისურ კლუბს გიორგი ჭიაბრიშვილი ჩაიბარებს.
დღეს საქართველოს ეროვნული პირველობის მორიგი ტურია, ხოლო 7 ივლისს „დინამო“ კონფერენსლიგის პირველ საკვალიფაკაციო ეტაპზე ერთვება.
ესტონურ „პაიდესთან“ პირველ მატჩამდე ვიცე-ჩემპიონის ახალ მწვრთნელს ეროვნულ ლიგაში 3 მატჩი ექნება ჩასატარებელი: „გაგრასა“ და „ტორპედოსთან“ შინ, ბათუმის „დინამოსთან“ – სტუმრად.
გუშინ ცნობილი გახდა, რომ საქართველოს ნაკრების მოთამაშე გიორგი ჩაკვეტაძე ახალ სეზონს ახალ კლუბში დაიწყებს. ის ბელგიურ „გენტს“ ეკუთვნის მაგრამ თამაშის საშუალება არ ეძლევა და გუნდი ერთწლიანი იჯარით სხვაგან უშვებს. ჯერჯერობით, დაუზუსტებელი ინფორმაციით, ქართველი ნიდერლანდების პირველობის უმაღლეს დივიზიონში მოასპარეზე ერთ-ერთ კლუბში ჩაირიცხება.
გუშინ ვეტერანმა იტალიელმა ფეხბურთელმა და ამჟამად მოლდოვის ნაკრების მთავარმა მწვრთნელმა რობერტო ბორდინმა ხვიჩა კვარაცხელიას შესახებ ისაუბრა. ბორდინს 1993-1997 წლებში „ნაპოლის“ რიგებში უთამაშია.
„კვარაცხელია საინტერესო ტალანტია, ძლიერი მოთამაშე, თუმცა ჯერ განსხვავებულ ჩემპიონატსა და იტალიურ რეალობაში მოუწევს დამკვიდრება. ნეაპოლელი ფანები სითბოს გაგრძნობინებენ და ეს გაიძულებს უფრო მეტად დაიხარჯო, მაგრამ ჯერ ადაპტაცია უნდა გაიაროს. ნებისმიერ შემთხვევაში, გარწმუნებთ, რომ ის ძლიერი ფეხბურთელია“, – განაცხადა რობერტო ბორდინმა.
ხვიჩა კვარაცხელია „ნაპოლის“ ივლისის დასაწყისში შეუერთდება და 8 ივლისიდან, როდესაც ნეაპოლელები ახალი სეზონისთვის მზადებას დაიწყებენ, ლუჩანო სპალეტის განკარგულებაში იქნება.
აზერბაიჯანის ჩემპიონმა „ყარაბაღმა“ კი პოლონური „იაგელონიადან“ ლუკა გუგეშაშვილი გამოისყიდა.
„ყარაბაღმა“ ქართველ კარის დარაჯს 3-წლიანი კონტრაქტი გაუფორმა და ამიერიდან ის კლუბის სრულფასოვანი წევრია.
გუშინ ცნობილი გახდა, რომ მადრიდის „რეალის“ ყოფილი ფეხბურთელი გარეთ ბეილი შესაძლოა, ინგლისურ პრემიერ ლიგაში დაბრუნდეს.
უელსელის დამატების სურვილს „ასტონ ვილა“ იჩენს, რომლის მთავარი მწვრთნელიც სტივენ ჯერარდია.
ესპანური მასმედიის მტკიცებით, „ვალიადოლიდის“ მფლობელი, ახლო წარსულში ლეგენდარული ფეხბურთელი რონალდო თავისი გუნდის შემადგენლობის მნიშვნელოვნად გაძლიერებას გეგმავს.
ამჟამად უგუნდოდ მყოფი მარსელო და დანი ალვეში შესაძლოა სწორედ რომ „ვალიადოლიდში“ ვიხილოთ. რონალდოს ამის დიდი სურვილი აქვს და მათი დახმარებით „ლა ლიგაში“ ადგილის შესანარჩუნებლად ბრძოლას გეგმავს.
რონალდო, რომელიც კლუბის აქციების 51%-ს ფლობს და მისი პრეზიდენტია, ეროვნულ ნაკრებში თავისი ორი ყოფილი გუნდელის დამატება არა მხოლოდ სპორტული შედეგებისთვის სურს, არამედ ფინანსური კუთხითაც. ის თვლის, რომ სასპონსორო ხელშეკრულებების მხრივ კლუბში სიტუაცია მნიშვნელოვნად გამოსწორდება, თუ ისინი მარსელოსა და ალვეშს გაიფორმებენ.
რონალდო იმედოვნებს, რომ მარსელო და დანი ალვეში ხელფასების მნიშვნელოვან შემცირებას დათანხმდებიან, რადგან „ვალიადოლიდს“ არ შეუძლია გადაუხადოს მათ იმდენი, რამდენსაც წინა გუნდებში იღებდნენ.
რონალდოს გუნდმა გასულ სეზონში ესპანეთის მეორე დივიზიონში მეორე ადგილი დაიკავა და „ლა ლიგას“, დაქვეითებიდან ერთი წლის შემდეგ დაუბრუნდა.
ავტორი
