გასულ კვირას, ხმაური და დაპირისპირება იყო ლანჩხუთის ცენტრში, რაც “ერთიანი ნაციონალური მოძრაობის” ლიდერების _ ხატია დეკანოიძისა და ლევან ხაბეიშვილის სტუმრობას მოჰყვა.
“ოცნების” ადგილობრივი შემადგენლობა ენმ-ის პარტიის ოფისის მიმდებარედ იყო მობილიზებული, განსაკუთრებით თვალშისაცემი კი, საკრებულოს მაღალჩინოსანთა სიმრავლე იყო. ფაქტობრივად, ქუდზე კაცი იყო გამოსული ადგილობრივი წარმომადგენლობითი ორგანოს მმართველი ძალის წევრებიდან. მიუხედავად სამუშაო საათებისა, ა(ა)იპ-ების თანამშრომლებიც იმყოფებოდნენ.
ოპოზიციური პარტიის წარმომადგენლებს, რომლებიც ლანჩხუთში მოქალაქეებთან შეხვედრის გამართვის მიზნით იმყოფებოდნენ, “ოცნების” მხარდამჭერები ხმაურით დახვდნენ, ვალში არც ხაბეიშვილი დარჩენილა _ იყო გინება, შეურაცხმყოფელი გამონათქვამები ერთმანეთის მისამართით და საქმე ფიზიკურ დაპირისპირებამდეც კი მივიდა. როგორც გაირკვა, ენმ-ის ერთ-ერთ ადგილობრივ ლიდერსა და საკრებულოს წევრს კახა ასკურავას ფიზიკურად გაუსწორდნენ.
“ხელი ვისაც დაურტყამს ჩემთვის, არ დამინახავს, რადგან მუხთლურად და არაკაცურად გვერდიდან ჩამარტყა იმ დროს, როცა მე წინიდან ვიგერიებდი თავდამსხმელებს.
არ ვაპირებ პოლიციას მივმართო და აქეთაც რომ მომართოს, არ ვცნობ თავს დაზარალებულად, პირიქით…(!)
ეს რად გიღირით? რის ფასად? საკუთარ თავთან რომ მარტო დარჩებით, ნუთუ არ შეგრცხვებათ?! ხელისუფლებები მიდიან და მოდიან, ჩვენ ხომ ვრჩებით?! ერთმანეთს ქუჩაში ხომ შევხვდეთ?! მესმის, დავალებაა, მაგრამ რაღაცას როცა გავალებენ, საკუთარ თავს არ უნდა ჰკითხო, რად გიღირს მისი შესრულება? ყველაფერს რომ თავი დავანებოთ, ჩვენს უკან ხომ ჩვენი ოჯახები დგას, ყველაზე წმინდა და ყველაზე ძვირფასი. იმათ რას ეუბნებით, სახლში პური რომ მოგიტანოთ იმიტომ ვკადრულობ, რომ კოლეგებს ქუჩაში დავხვდე და მას და მის სტუმრებს შეურაცხყოფა ვაყენოო?! ბევრს უთქვამს ზედმეტად გულუბრყვილო ხარო და მართალი ყოფილა.
როცა ერთი საათით ადრე ოზურგეთში ის სამარცხვინო კადრები ვნახე, ჩემებს ვუთხარი, ამას ლანჩხუთში არ იკადრებენ-თქო და თურმე მართლა რა ბრიყვულად გამომივიდა…(!)” _ დაწერა ფეისბუქში მოგვიანებით კახა ასკურავამ.
“საავადმყოფოში ვიყავი და შემთხვევით შევესწარი ამ ამბავს. ვერ გავიგე, რა ხდებოდა, არც პოზიციას ვიცნობ და არც ოპოზიციას. აქეთ რომ მოდიან, ასეთი შეურაცხმყოფელი სიტყვები არ უნდა იყოს _ შეხვდნენ ლამაზად ხალხს, დაელაპარაკონ, გაცვალონ აზრები ერთმანეთში. როგორ შეიძლება, რაც ხდება ეს?! ამ საქართველოს რა ეშველება, მართლა არ ვიცი!” _ ამბობდა ადგილზე მყოფი ქალბატონი, რომელიც ეთერ საგინაძედ გაგვეცნო.
საკრებულოს ინფრასტრუქტურის კომისიის ხელმძღვანელის გიორგი იმნაიშვილის მტკიცებით, იგი ადგილზე მიმდინარე ინფრასტრუქტურული სამუშაოების დასათვალიერებლად იმყოფებოდა, საკრებულოს თავმჯდომარის პირველი მოადგილის, ემზარ თედორაძის განმარტებით კი, რომელიც ინციდენტის ერთ-ერთი მონაწილეა, “ქართული ოცნების” წევრები პარტიის ოფისში იმყოფებოდნენ და იქედან გამოდიოდნენ, როდესაც კამერები დაინახეს და ამაზე გაღიზიანდნენ.
“მე შემდეგ გამოვედი და უკვე დაპირისპირება იყო. წარმოიდგინეთ, რომ უცხო ადამიანი მოვიდეს თქვენთან და გიღებდეს”, _ ამბობდა თედორაძე.
“რატომ მიღებ? რატომ მიღებ?” _ პროტესტი ისმოდა ხაბეიშვილის მისამართით, თუმცა, ამის პარალელურად ვიდეო გადაღებას “ოცნების” რამდენიმე დეპუტატი ახორციელებდა.
ლანჩხუთში განვითარებულ მოვლენებს “ოცნების” ძველი სახე და შემდეგ ოპოზიციაში გადასული ელგუჯა ჩხაიძეც გამოეხმაურა:
“გამოვიარე 90 წლების ძალიან ცუდი დრო. მონაწილე ვარ იმ მოვლენებისა, რაც მაშინ ხდებოდა.
არ შემიძლია, არ გამოვეხმაურო იმ მოვლენებს, რაც ხდება. გთხოვთ, ყველამ თავი შეიკავოთ ძალადობისგან _ ჩვენი ქვეყნისთვის ძალადობას კარგი არაფერი მოუტანია.
ჩვენ, ერთ მუჭა ქართველებს, გვაკვირდება ევროპა. ვართ თუ არა ღირსი, ვიყოთ ევროკავშირის წევრი, რაზეც განაცხადი გავაკეთეთ. გულახდილი ვიქნები და გეტყვით, დიდი პასუხისმგებლობა ხელისუფლებისაა.
ბუჩქებისთვის არასდროს შემიფარებია თავი და ახლაც არ ვაპირებ. 15 წელი სოფლის გამგებელი ვიყავი და ყოველთვის ოპოზიციიდან ვიღებდი არჩევნებში მონაწილეობას. მქონია უსიამოვნებები. ურთიერთობები ყველასთან ნორმალური მქონდა, მაგრამ მქონდა განსხვავებული ხედვა და მიდგომა საქმესთან.
2008 წელს უარი ვთქვი და განცხადებით წავედი, რა თქმა უნდა, პოლიტიკური იყო ჩემი გადაწყვეტილება. უარი ვუთხარი ძალადობას. ერთი ძალადობა არ მინდა მეორეთი შეიცვალოს. კანონის წინაშე უნდა ვიყოთ ყველა ვალდებული მიუხედავად სქესისა და პარტიული წარმოშობისა. მუდმივი არაფერია. ბევრს ეგონა, მაგრამ რადარებიდან არ ჩანს. ფრთხილად, მეგობრებო! ჩვენ ამ ქვეყნის დროებითი სტუმრები ვართ”.
“ძალიან მტკივა გული იმ კადრების ნახვის შემდეგ, გაოცებული და გულგატეხილი კიდევ და კიდევ მეფიქრება, არაფერიც არ გვეშველება ამის შემხედვარე. რა მაგალითი უნდა აიღოს მომავალმა თაობამ?
ასე წყდება საქვეყნო მნიშვნელობის საკითხები? ან საერთოდ რა შეიძლება დაერქვას ყველაფერ ამას?! გეკითხებით, ვისაც ლანჩხუთელმა მოსახლეობამ მანდატი გიბოძეთ და ხელფასს იღებთ ბიუჯეტიდან!” _ ასე ეხმაურება მომხდარ ფაქტს ლანჩხუთელი პედაგოგი ნინო დარჩიაშვილი.
თუმცა, აღმოჩნდა, რომ ლანჩხუთელთა ნაწილი ამართლებს მომხდარ ფაქტს და მათი ნაწილი სოციალურ ქსელში აღფრთოვანებას გამოხატავს _ “გენაცვალეთ! ასე უნდა დაუნაყოთ ამ სისხლისმსმელებს, უცხვირპიროებს. მოუნდათ დაბრუნება ამ ხალხის მკვლელებს და გამყიდველებს. მაგარი ხართ, ბიჭებო, ესე, ხმა არ უნდა ამოაღებინოთ ამ სისხლისმსმელებს.
ნაცების ადგილი და სალაპარაკო ამ ქვეყანაში არაა. როდის მერე შეტკივათ ხალხზე და ქვეყანაზე გული მაგ სატანათა მოდგმას?!” _ წერენ სოციალურ ქსელში.
ავტორი
