16 წლის ოზურგეთელი გოგონა, ოზურგეთის მეორე საჯარო სკოლის მეთორმეტე კლასის მოსწავლე, სპორტში (მძლეოსნობაში) წარმატებულ ნაბიჯებს, 13 წლის ასაკიდან ითვლის.
ახლახან ის საქართველოს ჩემპიონი გახდა ბადროს ტყორცნაში.
27 – 29 მაისს თბილისში, მძლეოსნობაში საქართველოს ახალგაზრდული ჩემპიონატი – 2006-2007-2008 წლებში დაბადებულთა შორის გაიმართა.
ასპარეზობაში ოზურგეთის მუნიციპალიტეტის სპორტულ- გამაჯანსაღებელ დაწესებულებათა გაერთიანებასთან არსებულმა მძლეოსანთა სექციის სპორტსმენებმა, ზოგადად, მაღალი შედეგი აჩვენეს.
საქართველოს ჩემპიონის ტიტული და ოქრო ქეთევან მამალაძემ 1კგ ბადროს ტყორცნაში მოიპოვა.
ქეთევან მამალაძე ასევე ვერცხლის მფლობელი გახდა 3კგ ბირთვის კვრაში, სადაც ის მხოლოდ ორი სანტიმეტრით ჩამორჩა ოქროს მედალოსანს.
ახლა კი უკვე ევროპის ოლიმპიურ ფესტივალზე გასამგზავრებლად ემზადება.
როგორც თავად გვეუბნება, ემზადება გამარჯვების, პირველობის მოსპოვებლად, რომ ძალიან გაახაროს სამშობლო, ოჯახი, მეგობრები, თავისი სკოლა და ყველაზე საყვარელი ადამიანები, _მწვრთნელები.
_ახლა თბილისში ვარ. ვემზადები ევროპის ოლიმპიურ ფესტივალზე წასასვლელად, რომელიც ივლისის ბოლო კვირაში გაიმართება. ჩემი წარმატება ჩემი მწვრთნელების, მარინა კოტრიკაძის და დათო მანთიძის დამსახურებაა. თავიდან, სამი წილის წინ, დედამ ფიტნესკლუბში მიმიყვანა. ცოტა პრობლემები მქონდა, ვუჩიოდი ზედმეტ წონას. სწორედ აქ მირჩია ქალბატონმა მარინა კოტრიკაძემ, რომ სპორტს , მძლეოსნობის მიმართულებით, ვზიარებოდი. დავიწყე ვარჯიში ბადროს ტყორცნასა და ბირთვის კვრაში. ოზურგეთის მუნიციპალიტეტის სპორტულ- გამაჯანსაღებელ დაწესებულებათა გაერთიანებაში, მოტივაციისთვის საუკეთესო პირობებია შექმნილი. უკვე სამი წელია, რაც სპორტის ეს სახეობა ჩემთვის ჰობი გახდა. ვარჯიშის დროს, ხან ხის კუნძებს და წყლიან ბოთლებს ვისროდი. კიდევ სხვადასხვა მძიმე საგნებს. ყოველ მომდევნო ვარჯიშზე თუ შეჯიბრზე შედეგს ვაუმჯობესებდი. ახლა 35 მ. მანძილზე ვისროლე. ასე გავხდი საქართველოს ჩემპიონი… უდიდეს მადლობას ვუხდი ასევე ჩემს მეორე საჯარო სკოლას. სწავლაშიც მოწინავე ვარ. ძალიან მიწყობენ ხელს და ყველას უხარია ჩემი წარმატება. ახლა მეც უნდა გავახარო ყველა და მინდა, ევროპის ფესტივალიდან გამარჯვებული დავბრუნდე, _ ამბობს „გური ნიუსთან“ ქეთევან მამალაძემ.
„ვარჯიშის დროს, წყლით სავსე ბოთლებს და ხის ნაჭრებს სულ კენჭებივით ისროდა. საოცარი ენერგიის პატრონია. ამავე დროს ძალზე მოქნილი, ბზრიალაა, ცეკვაში ნარნარი და სწავლაში ათოსანი“, – საუბრობენ მასზე მეგობრები, მასწავლებლები თუ კეთილგანწყობილი გულშემატკივრები.
23 ივლისიდან – 31 ივლისს, ევროპის ოლიმპიურ ფესტივალს სლოვაკეთი უმასპინძლებს. 16 წლის ქეთევან მამალაძე, რომელიც ოზურგეთის მუნიციპალიტეტის სპორტულ- გამაჯანსაღებელ დაწესებულებათა გაერთიანების მძლეოსნობის სექციის აღზრდილია, ამ ოლიმპიადაზე იასპარეზებს და სამშობლოს, მშობლიურ ოზურგეთს გამარჯვებას ჰპირდება!
„გურია ნიუსი“ გულშემატკივრობს და წარმატებას უსურვებს ქეთევან მამალაძეს!
ავტორი
