გუშინ ცნობილმა იტალიელმა სპორტულმა ჟურნალისტმა ალფრედო პედულამ საინტერესო ინფორმაცია გაავრცელა.
„ნაპოლის“ სელექციონერების მუშაობა შექებას იმსახურებს. ეს ჩემპიონატის ორი ტურის შემდეგ გამოჩნდა. ხვიჩა მარტში შეიძინეს, 10 მილიონ ევროზე ცოტა მეტი დაუჯდათ, ხელშეკრულება 2027 წლამდე გაუფორმეს და მისი სეზონური გასამრჯელო 1 მილიონზე ოდნავ მეტი და პლუს ბონუსებია. მოდით, მოვემზადოთ პირველი განახლებისთვის, მალე, რამდენიმე თვეში, კვარაცხელიას ხელფასს მინიმუმ გაუორმაგებენ, რათა ჯაკომო რასპადორის ანაზღაურებას – 2.5 მილიონი მიაღწიოს“.
ხვიჩა კვარაცხელიას საინტერესო წერილი მიუძღვნა გამოცემამ „ფორბსმა“.
„ნაადრევია ლაპარაკი, მაგრამ „ნაპოლის“ ახალწვეული ხვიჩა კვარაცხელია ყველაფერს აკეთებს იმისათვის, რათა ნეაპოლელებმა დაივიწყონ ახლახან წასული ლორენცო ინსინიე. ეს ადვილი გმირობა არაა. ინსინიე ადგილობრივია, კლუბში თითქმის 10 წელი თამაშობდა და კარგი ფეხბურთელი იქ გახდა. მან კონტრაქტის დასრულების შემდეგ „ტორონტოში“ ახალი გამოწვევისათვის წასვლა გადაწყვიტა. მიუხედავად იმისა, რომ თავიდან მისმა გამგზავრებამ ქომაგებში შოკი გამოიწვია, ფაქტია, 31 წლის ინსინიე გასულ სეზონში შედეგიანობით არ გამოირჩეოდა. თავიდანვე არასოდეს არ იყო ყველაზე სწრაფი, ხოლო გასულ სეზონში კიდევ უფრო ნელა მოქმედებდა, მისი მოედანზე ყოფნა ანელებდა შეტევებს და ძალიან ცოტას სძენდა გუნდს. გასულ სეზონში 11-დან 9 გოლი პენალტით გაიტანა, ამიტომ მისი წასვლის პირველმა შოკმა გადაიარა თუ არა, ბევრმა აღიარა, რომ შეიძლება ეს უკეთესიც იყო.
„ნაპოლის“ გულშემატკივრები, ალბათ, ფიქრობდნენ, რომ კლუბის მფლობელი დე ლაურენტისი მათი სევდის გასაქარვებლად ცნობილ გარემარბს მიიყვანდა. ამის ნაცვლად ფანებმა ქართველი მიიღეს, რომლის თაობაზეც ყველაზე ცნობილმა საფეხბურთო მიმომხილველებმაც ძლივს მოახერხეს რამის გაგება.
ხვიჩა კვარაცხელიამ პირველ ორ ტურში გაიბრწყინა და როგორც „ვერონას“ ასევე „მონცას“ განადგურებაში მნიშვნელოვანი როლი ითამაშა. „მონცასთან“ პირველი გოლი განსაცვიფრებელი გამოდგა, პეტრ ზილენსკის შემთხვევითი პასი მიიღო, ბურთის ორი შეხება გააკეთა და მესამეთი შორიდან გაიტანა. ამ გოლით ინსინიე იამაყებდა. მეორე გოლიც ასევე კარგი იყო, თუმცა არა ისეთივე შთამბეჭდავი. ლობოტკამ, რომელიც სპალეტის ეპოქის ერთ-ერთი აღმოჩენა გახდა, ბურთი მარცხნივ კვარაცხელიას მოლოდინში გადაიტანა, მან სწრაფი და მკვეთრი მოძრაობით მარჯვენა ფეხით მცველი ვალენტინ ანტოვი ჩამოიცილა და ცაციათი ძლიერად გადაგზავნა ბურთი მიკელე დე გრეგორიოს კარში.
ნეაპოლელებმა ახალი გმირი აღმოაჩინეს. ის მაღალი კლასის მოთამაშეა, შესანიშნავი პროფესიონალი და კარგი ბიჭი. მოწინააღმდეგეების მოტყუების ასეთი მანერა აქვს და იცის, როგორ გაიტანოს მარჯვენათი და მარცხენათი. ეს გოლები მღელვარების ნაწილობრივ მოხსნაში დაეხმარება. როგორც კი ბოლომდე განთავისუფლდება წნეხისგან, ნეაპოლელებს შეუძლიათ საბოლოოდ დაივიწყონ ინსინიე“.
ხვიჩა კვარაცხელიას გარდა იტალიის „სერია – A“-ში ლუკა ლოჩოშვილის დებიუტიც შედგა. ჟოზე მოურინიოს „რომას“ წინააღმდეგ, ლოჩოშვილმა მოედნის მოთამაშეებს შორის საუკეთესო შეფასებები მიიღო. ავსტრიული „ვოლფსბერგიდან“ „კრემონეზეში“ გადასული 24 წლის დებიუტანტი გუნდის მწვრთნელმა მასიმილიანო ალვინიმ „რომასთან“ 85-ე წუთამდე ათამაშა.
ქართველ მცველს საუკეთესო შეფასებები დაუწერეს „Whoscored“-მა და „Sofascore“-მა.
10-ბალიანი სისტემით პირველმა ყველაზე მაღალი ქულა (8.7) „კრემონეზეს“ მეკარე იონუც რადუს დაუწერა, ლოჩოშვილის თამაში კი 7,5-ით შეაფასა.
საუკეთესო ქულა (9,0) „Sofascore“-მაც მეკარე რადუს დაუწერა, ხოლო აქ ლოჩოშვილს 7,6 აქვს, შემდეგი – გუნდის კაპიტანი, ასევე რუმინელი ვლად კირიკეშია (7.3).
გუშინ უკრაინაში ამ ქვეყნის მორიგი საფეხბურთო პირველობა გაიხსნა.
ორგანიზატორებმა ყველა რისკ-ფაქტორი გაითვალისწინეს და არსებობს რამდენიმე მნიშვნელოვანი წესი და შეზღუდვა, საჭიროების შემთხვევაში გაქცევის გეგმაც.
მთავარი შეზღუდვა ისაა, რომ ჩემპიონატი უმაყურებლოდ დაიწყება. გარდა ამისა, საჭიროების შემთხვევაში არსებობს გეგმა, რომ ფეხბურთელებმა და პერსონალმა სტადიონი, რაც შეიძლება მალე დატოვონ და უსაფრთხო ადგილზე გადაიყვანენ.
უკრაინის ჩემპიონატის დაწყების წინ „შახტარის“ სპორტულმა დირექტორმა დარიო სრნამ სპეციალური კომენტარი გააკეთა.
„პირველ რიგში ძალიან მიხარია უკრაინის ჩემპიონატის დაწყება, მეორე მხრივ, ძალიან ფრთხილი ვარ, რადგან უკრაინაში სიტუაცია გაურკვეველია. ჩვენთვის ომი 2014 წელს დაიწყო. ჩვენ დავკარგეთ ჩვენი სტადიონი, დონეცკი და ჩვენი გულშემატკივარი. ხარკოვსა და ლვოვში ვთამაშობდით. „შახტარი“ არის გუნდი, რომელმაც ორი ომი გამოიარა. ახლა, ფეხბურთელებს 1-2 საათით დაივიწყონ სიტუაცია და ფეხბურთი ითამაშონ. ლეგიონერების წასვლის გამო ჩვენთან ყველაფერი შეიცვალა. ლასინა ტრაორე ერთადერთია, ვინც პროფესიონალიზმი გამოიჩინა და ჩვენთან ერთად კიევში დაბრუნდა. მან თქვა, რომ „შახტარში“ მისი ისტორია არ დასრულებულა და მისგან ასეთი რამის მოსმენა საოცარი იყო. მიმართვა რუსებს და უკრაინელებს? რუსებზე არაფრის თქმა არ მინდა, არ ვიცი, ვინ არიან. უკრაინელებს მინდა ვუთხრა, რომ ერთმანეთს დავეხმაროთ და იგივე საქმე ვაკეთოთ. რაც შეეხება რუსეთს, ეს ქვეყანა ჩემთვის მკვდარია“.
