“საარჩევნო დაპირება უვადო არ უნდა იყოს!” _ მელექედურელები გზის გაკეთებას ითხოვენ

ოზურგეთის მუნიციპალიტეტის სოფელ მელექედურში, მეორე ბრიგადად წოდებულ უბანში, ადგილობრივი მცხოვრებლები (ამ ოჯახების რაოდენობა ოცდაათამდეა), ერთკილომეტრიანი გზის მონაკვეთზე, ბეტონის საფარის დაგებას ითხოვენ.

მოსახლეობის თქმით, გზა, რომელიც დიდი არ არის, უბნისთვის სასიცოცხლო მნიშვნელობისაა.

_ ამ გზაზე სამარშრუტო ტრანსპორტი დღეში ორჯერ შემოდიოდა _ დილის 9 საათზე და შუადღეზე, სამიდან ოთხის ნახევრამდე, შემდეგ კი უკან ბრუნდებოდა. ხალხმაც იცოდა ეს, დროულად იყვნენ გამოსული, მომზადებულები ხვდებოდნენ კონკრეტულ რეისს. ახლა ერთი კილომეტრი მანძილის გავლა, მძიმე ტვირთით უწევთ, რადგან მთლიანად ამორტიზირებულ გზაზე ტრანსპორტი ვერ შემოდის. რა ვქნათ, სანამ ველოდოთ ამ გზის გაკეთებას? არჩევნებზე დაპირება უვადო არ უნდა იყოს. არც უნდა გვჭირდებოდეს შეხსენება, _ ამბობენ ამ უბნის მცხოვრებლები.

გზაზე, რომლის ზედაპირზე აყრილია ადრე დანაგები ბეტონის საფარი, ყველანაირ ტრანსპორტს უჭირს გავლა.

_ ყველანაირად ვცდილობთ, ხალხს მოვემსახუროთ. აბა, რატომ დავდივართ? მაგრამ ისეა ბეტონი ამოცვენილი და ორმოებიც ბლომადაა ყველა მხარეს, გავლა არ შეიძლება. ორ დღეში დაგვეშლება ეს მანქანები და მერე რა ვქნათ? ხალხი გვეცოდება, მაგრამ თუ გზა არ გაკეთდა, ვერ ვივლით ამ უბანში. შევდიოდით ამ გზით, დღეში ორჯერ. შემდეგ მოვბრუნდებოდით უკან და დანარჩენ რეისს ვასრულებდით დღის განმავლობაში. ვწუხვართ, მაგრამ გზა არ იძლევა არანაირ საშუალებას, იქით ვიმოძრაოთ, _ ამბობენ სამარშრუტო მიკროავტობუსების მძღოლები.

_ საარჩევნო პერიოდებში, ფიანდაზების დაგებას დაგვპირდნენ. ოღონდ ეს არჩევნები ჩვენი მოგებით დასრულდეს, ოღონდ კაბინეტში შევიდეთ და რას არ გაგიკეთებთო. ასე გვპირდებოდნენ გასულ წელს მერის არჩევნებზე. სადაა ეს დაპირება? გზა ისეა დანგრეული, ვირს შეეზარება გავლა. დავათრევთ ამ ტვირთებს პაპანაქება სიცხეში. ადამიანები ვართ ჩვენ! ერთ კილომეტრზე ამდენი ტვირთის თრევა გვიჭირს. ტვირთის გარეშე სიარულიც ჭირს ამ სიცხეში, _ ამბობს ადგილობრივი მკვიდრი ელისო ბენდელიანი და გვთხოვს, საარჩევნო დაპირება შევახსენოთ მერიას.

_ მერს უნდა ვკითხოთ. თავად შეგვპირდა და რომელ წელს გაკეთდება? ოქტომბერში, დეკემბერშიო, რომ იძახის ერთი და მეორე, ვისაც შევახსენებთ დანაპირებს, რომელი წლის ოქტომბერში გაკეთდება? გავიდა ერთი წელი და საერთოდ არ გამოჩენილან აქ, _ ამბობს უბნის მცხოვრები ელისო ბენდელიანი.

მეორე უბნის მცხოვრებლები, ასევე, საუბრობენ სოფელში ჩამომდინარე პატარა მდინარის, “დედაბერას” სივრცეზე მდებარე ხიდის დაზიანებული ნაწილის შესახებ, რომელიც ახლა ზერელედაა გაკეთებული და შეიძლება ვინმე ხიფათშიც ჩავარდეს.

_ ამ პატარა მდინარის ჩავარდნილი ადგილი შეაკეთეს, თუმცა, ეს ერთჯერადი შეკეთება, უხარისხოა ყოველთვის. იქვე მოხრეშეს აღმართი, მაგრამ წვიმა რომ მოვიდა, ნიაღვარმა ეს ხრეში კი ჩაიტანა მდინარეში. საქმეს უნდა საგულდაგულო გაკეთება. სოფელია, უსწორმასწორო რელიეფია და ხომ უნდა ამას გათვალისწინება? _ ამბობს ადგილობრივი მცხოვრები მარინა ჭანუყვაძე და გვთხოვს, როგორმე მალე მივიტანოთ ეს ამბავი მერიის ყურამდე.

_ ისიც გადაეცით, უვადოდ არ დაგვპირდნენ. ერთ კვირაში არ გაკეთდება, მაგრამ როგორმე დაიწყონ. მძღოლებს როგორ დავაძალოთ ამ გზაზე შემოსვლა, როცა ჩვენ თვითონ ფეხით გავლა გვიჭირს და გვეზარება? _ გვეუბნება მარინა ჭანუყვაძე.

ლიზი ხინთიბიძე ის ახალგაზრდაა, რომელიც თანატოლებთან ერთად ცდილობს, სოფლის პრობლემების მოგვარების საქმეში საკუთარი წვლილი შეიტანოს:

_ ჩვენ ახალგაზრდულ ორგანიზაციასთან ერთად მივმართეთ მერიას. ხიდთან ჩავარდნილი ნაწილი იყო. როცა ვუთხარით, გააკეთეს და მადლობელი ვართ, მაგრამ მაინც გაფუჭდა. წვიმამ ჩარეცხა. როგორმე უნდა დაჩქარდეს და კარგად გაკეთდეს. სოფელში ადამიანს ისედაც უჭირს ყოფა-ცხოვრება. ეს ყველამ უნდა გაითვალისწინოს. დაგვეხმარონ დროულად, _ გვითხრა მან.

თეა ხინთიბიძე ჯერ გვეუბნება, რომ ამ უბანში უმეტესობა ხინთიბიძეები ცხოვრობენ და პრობლემაზე საუბრითაც ამ გვარის წარმომადგენლები გამოირჩევიან:

_ რამდენჯერ გავიმეოროთ, რამდენჯერ შევუთვალოთ დეპუტატს, რომ გვიჭირს სოფლის ცენტრამდე ერთ კილომეტრიანი მანძილის ტვირთით გავლა. ერთი წელია, ვიძახით, რომ გვითხრან წესიერი, საიმედო პასუხი. მონდომებაა მთავარი, რომელიც ყველას აკლია და კი ვართ ასე, _ გვითხრა თეა ხინთიბიძემ.

მან აღნიშნა, რომ არანაკლებადაა დაზიანებული მოპირდაპირე მხარეს მდებარე გზა, სადაც, ასევე, დაზიანებულია სავალი ნაწილი და ტრანსპორტს გავლა უჭირს:

_ თუ დაინტერესდებიან, თუ მოინდომებენ, ერთ კვირაში გაკეთდება ეს ერთკილომეტრიანი გზა, რომლის გამოც ასე ვეხვეწებით ამდენი ხანია.

ადგილობრივებმა გვითხრეს, რომ მათ მიმართეს სოფლის დეპუტატს, ოზურგეთის მუნიციპალიტეტის საკრებულოს წევრს, ნინო მახარაძეს, რომელიც მათი არჩეულია:

_ მივმართეთ, მაგრამ ერთხელ ამოვიდა აქ და მერე არ გვინახავს. დაგვპირდა, ალბათ, მასაც დაპირდნენ და ვართ ასე მოლოდინში, _ გვეუბნებიან ქალბატონები, რომლებიც საგანგებოდ დაგვიკავშირდნენ და დახმარება გვთხოვეს.

“გურია ნიუსი” სოფლის დეპუტატს ნინო მახარაძეს ესაუბრა და ჰკითხა, იცის თუ არა ამ გზის პრობლემის შესახებ, რის შესახებაც უბანში მცხოვრები ოცდაათი ოჯახი საუბრობს.

_ დიახ, ვიცი და წლის ბოლომდე, კიდევ უფრო ადრე, ოქტომბერშიც გაკეთდება ეს გზა. აქ მცხოვრებლები ითხოვენ ბეტონის საფარის დაგებას აღნიშნულ გზაზე. უცებ არ ხერხდება ყველაფრის გაკეთება. თუმცა, არავის დავიწყებია. მთლად მართებული არაა ეს საყვედურები. მესმის, რომ გზა უნდა გაკეთდეს. უკვე შეძენილია საჭირო მავთულები. ვიმეორებ, აუცილებლად დაიგება ამ გზაზე ბეტონის საფარი. ამას სრული პასუხისმგებლობით ვაცხადებ. შეგიძლიათ, ეს თქვენც გადაამოწმოთ. დაზუსტებით, ახლა, კონკრეტულ დღეს ვერ დაგისახელებთ, თუმცა, წლის ბოლომდე ეს გზა გაკეთებული იქნება, _ გვითხრა ნინო მახარაძემ.

მელექედურის მეორე უბნის მცხოვრებლები კი კვლავ იმეორებენ, რომ არ სჯერათ ამდენი დაპირების და აქციის მოწყობასაც გეგმავენ.