ოზურგეთის საკრებულოს მორიგ სხდომაზე, 5 ოქტომბერს, რომელიც 11 საათზე დაიწყო, ზუსტად ერთი საათი ჩხუბს დასჭირდა და ამ ერთ საათში ყველაზე ბევრჯერ ბიძინა ივანიშვილი ახსენეს, რომელსაც ნაციონალი დეპუტატი დავით მჟავანაძე, წამდაუწუმ „ბორენკად“ მოიხსენიებდა.
ის, ხელში ფოტოების და ნაბეჭდი თაბახების დასტით, წამოდგა და კატეგორიულად დებდა ბრალს ბიძინა ივანიშვილს, შეკვეთილში, რეკრეაციულ ზონაში, 2 ჰა ფართობის მიტაცებაში და ითხოვდა პასუხს საკრებულოსგან:
_ეს მოგწონთ? იქ, სადაც რეკრეაციული ზონაა, სადაც გამწვანებაა, ორი ჰა ფართობი უნდა გაასხვისოთ? მაინტერესებს, ეს როდის უნდა გახორციელდეს… უზღუდავს თუ არა ბიძინა ივანიშვილი იქ მცხოვრებ ხალხს უფლებებს. ყიდულობს ყველაფერს… რეკრეაციულ ზონას იტაცებს… საყანე ფართობებსაც შეუცვლა სტატუსი…- ყვიროდა მჟავანაძე.
მუნიციპალიტეტის მერის მოადგილემ გიორგი ღურჯუმელიძემ მას უპასუხა, რომ განაშენიანების გენგეგმით, რომელიც დამტკიცებულია, მითითებულია კონკტრეტული მიწის ნაკვეთები. ეს ინფორმაცია საჯაროა და ყველას შეუძლია, რომ ნახოსო.
_განაშენიანების გეგმაზე როცა არის საუბარი, ეს არის ორი ჰექტარი ტყე, რომელიც უნდა გაასხვისოთ. იქვე მოსახლეობაა, წინა ნაწილში. და როცა იქ შესაძლებელია, დასასვენებელი პარკი გაკეთდეს, რატომ უნდა გაიჩეხოს?… ყველა ნიშანი არსეობს იმისა, რომ აქ ოლიგარქი, ბორენკა ივნიშვილი ააშენებს, – არ ცხრებოდა მჟავანაძე.
_ვინ არის ბორენკა?
_ივანიშვილი, მოფერებით ვეძახი…
_შენ რა გქვია? შენ რას გეძახიან, შენ? _ არაერთხელ გაუმეორა დარჩიამ მჟავანაძეს.
_აგერ არის საპირფარეშოც, რომელიც ბორენკამ შეისყიდა, – კვლავ გადაფურცლა ფოტოები მჟავანაძემ.
_გადი გარეთ, წადი, იჩივლე, მიმართე სასამრთლოს, თუ ასეა, – უთხრა დათო დარჩიამ.
_კითხვა დასვი თუ გაქვს, _ არაერთხელ გაუმეორა ღურჯუმელიძემ.
_ნახე, რამხელა მტკიცებულება მაქვს! შეექმნა თუ არა იმ ხალხს პრობლემა, ვინც იქ ცხოვრობს? გზა დაუკეტა ხალხს. აგერ კიდე საპირფარეშო იყიდა, – კვლავ ყვიროდა მჟავანაძე, თუმცა მას არავინ უსმენდა.
„აუჰ“, „მტკიცებულება აქვს“..„წადი და იჩივლე“, „არაა კარგად“, „გადი გარეთ“… „უპასუხისმგებლო“ –ისმოდა საკრებულოს „ქართული ოცნების“ წარმომადგენლებისგან. ბოლოს კი ე.წ. ტაში დაუკრეს მჟავანაძეს, რომელიც არაერთგზის იმეორებდა თავისას.
–მთელი ერთი საათი, ჩემი რომ წაიღეთ თქვენ. იმის მაგივრად, რომ საქმეზე გელაპარაკათ, უაზრო, უშინაარსო, არაკომპეტნტური ლაპარაკით ხალხს ართმევთ დროს. გაკოტრებული პარტია ხართ, _ ასე მიადევნა გიორგი ღურჯუმელიძემ, როგორც იქნა დასაჯდომად წასულ მჟავანაძეს.
ავტორი
