საქართველოს მთავრობის გადაწყვეტილებით, ქვეყანაში ოქტომბერში ღვინის დღეები ტარდება. გურიაში, ოზურგეთში, ღვინის ფესტივალი 9 ოქტომბერს შედგა.
გურული მეღვინეები სამივე მუნიციპალიტეტიდან, ოზურგეთის თეატრის გვერდით მდებარე სკვერში, საგანგებოდ მოწყობილ სივრცეში წარდგნენ და საკუთარი ხელით დაწურული ღვინო შესთავაზეს სტუმრებსა და მასპინძლებს. ჩხავერის, ჯანის, საკმიელას, კლარჯულას, ტაკიძურას თუ სხვა გურული ჯიშის ყურძნისგან დაწურული ღვინით იწონებდნენ თავს გამრჯე, ვაზზე მართლაც შვილივით შეყვარებული გურულები: გურამ ტყეშელიაძე, ანდრო ვაშალომიძე, ლიკა მეგრელაძე, სოსო ხინთიბიძე და სხვები. თუმცა, გურიაში ბევრი მეწარმე დარჩა „კადრს მიღმა“. თუ რატომ არ შეატყობინეს მათ, მონაწილეობა მიეღოთ ფესტივალში, „გურია ნიუსს“ ორგანიზატორებმა უთხრეს, რომ ასეთ დროს თავადაც უნდა იაქტიურონ მეწარმეებმა.
მშრომელი ადამიანები, რომლებიც უმეტესად საკუთარი ვაზის ძირში ფუსფუსებენ, კარგი იქნება, ხელმძღვანელმა პირებმა, მუნიციპალიტეტებსა თუ სოფლებში (მომავალში მაინც) მოახერხონ და ჩართონ ფესტივალში. პოპულარიზაციაც ყველაზე მეტად ასეთი ნაბიჯებით მიიღწევა. ღვინის ფესტივალზე ასევე წარდგნენ სტუმრები კახეთიდან. ფესტივალზე მოსულ პატარებს ანიმატორები ართობდნენ.
„მგონი, ამინდი იცვლება, მაგრმ ჩვენ არ გვეშინია, გვინდა სიმღერა, გართობა, ცეკვა და თამაში ,” _ ისმოდა სივრცეში მუსიკალური ტექნიკით გაძლიერებული ხმა.
თუმცა, ამინდის ღვთაება ელიამ, როგორც გურულებმა იხუმრეს, არც პატარები დაინდო და არც საწნახელში ოზურგეთის მერის თამადობით ჩამდგარი, ხელგადაჭდობილი შემადგენლობა და „შვიდკაცას“ მიერ , „აგუნას“ გადაძახილისთანავე, ყურძნის წვენის ჩადგომამდე, ღვთიური მანანა ჩააპირქვავა საწნახელში.
წვიმამ და ქარმა ყველაფერი ააყირავა, _ უზარმაზარი ლარნაკები ქვევრების ჯიბრზე გორავდნენ. ერთგან მდგარ ეზოს ქოლგას კი ქალი და მამაკაცი მაშველი რგოლივით ეჭიდებოდნენ.
_ამინდის პროგნოზიზა არავის მოუსმენია ამ კვირაში? ამ კახელებს რომ თონე ეევსოთ წყლით?! მევიჯაყეთ….. ე, ძამა, ღვინის პირველ ფესტივალზე „პირველი მერცხალის“ ფინალი გვაქვს, _ მაინც ხითხითებდნენ გაწუწული გურულები.
კახელი ქალბატონი კი, ტელეფონით ხელში, ვიღაცას უბრაზდებოდა: „რა ვქნა? აივსო წყლით ყველაფერი… თონეში წყალია და ცომში…არ უნდა გადაეხურათ თავიდავე? სანამ ახლა ქოლგა მოიტანეს, კი აივსო წყლით ყველაფერი…“
მომეცით ერთი ლავაში! – დაიძახა პატარა ბიჭმა.
-ე არ მისცე, ჟეტონი თუ არ აქვს, _ გასცა ბრძანება კაპიუშონიანმა ახალაგაზრდამ.
_სადაა ჟეტონი?
_უნდა გეყიდა თავიდანვე..
_არ ვიცოდი..
_თუ არ იცოდი , იყავი ულავაშოდ!
_შენ კიდე უულვაშოდ! მაგიტომ დაგრჩათ ცომი წყალში…
მოკლედ, გაფორმებული, საზეიმო დასაწყისი, ოზურგეთული ღვინის ფესატივალისა, მართლაც დაემსგავსა „პირველი მერცხალის“ ფინალს… ესაა, „აბა ულას“ შემოძახება არავის მოსურვებია, რადგან დღეს უცხოა იასონასა და მისი გუნდის მიამიტობა თუ დიდსულოვნება! ყველანი თავქუდმოგლეჯლი გარბოდნენ სახლებისკენ!
ავტორი
