ისრაელი უკრაინისთვის მოკავშირე ქვეყნების გავლით საკუთარი შეიარაღების გადაცემას დათანხმდა. ამის შესახებ ინფორმაციას გამოცემა Haaretz საკუთარ წყაროზე დაყრდნობით ავრცელებს.
როგორც გამოცემა წერს, ისრაელის მთავრობამ გადაწყვეტილება აშშ-სგან მომდინარე წნეხის შედეგად მიიღო – წყაროს ინფორმაციით პრეზიდენტი ბაიდენი დაჟინებით მოუწოდებდა ისრაელის პოლიტიკურ ხელმძღვანელობას გაეფართოებინათ უკრაინის დახმარების პროგრამა და არ შემოფარგლულიყვნენ მხოლოდ ჰუმანიტარული დახმარებით.
ამგვარად ისრაელმა ნატოს წევრ სახელმწიფოებს მისცა უფლება უკრაინისთვის გადაეცათ შეიარაღება, რომელიც ისრაელში დამზადებულ ტექნოლოგიებს შეიცავს. მაღალი ალბათობით საუბარია დიდ ბრიტანეთზე.
გარდა ამისა გამოცემის ცნობით, ისრაელი დათანხმდა დააფინანსოს უკრაინის სამხედრო ოპერაციებისთვის აუცილებელი “სტრატეგიული მასალები”, რომელთა ღირებულება ათეულობით მილიონ დოლარს შეადგენს.
ამერიკული წყაროების მიხედვით, ისრაელი უკრაინას ასევე სადაზვერვო ინფორმაციითაც ეხმარება.
ისრაელისგან რა სახის შეიარაღება გადაეცემა უკრაინას ამ დრომდე უცნობია, თუმცა განაცხადეს, რომ რამდენიმე ათეული მილიონი დოლარის ღირებულების სამხედრო დახმარებაზეა საუბარი.
დიდი ალბათობით საუბარია, უკრაინას ტელედამიზნების მქონე ტანკსაწინააღმდეგო მართვად კომპლექს Spike-ებს რამდენიმე შორსმსროლელ მოდიფიკაციას გადასცემენ
ომის დაწყების პირველი დღეებიდან, უკრაინელი მაღალჩინოსნები ისრაელს პირდაპირი და არაპირდაპირი კონტაქტებით, მიმართვებით სარაკეტო თავდაცვის სისტემებს, განსაკუთრებით რკინის გუმბათს სთხოვდნენ. თუმცა იერუსალიმი როგორც თავდაცვითი, ისე მოიერიშე სისტემებით კიევის დახმარებისგან თავს ამ დრომდე იკავებს. ისრაელი უკრაინისთვის დახმარებისგან თავს აქამდე სირიაში რუსული კონტინგენტის ყოფნის გამო იკავებდა. რუსეთი იცავს სირიის საჰაერო სივრცეს.
9 ნოემბერს, ისრაელის თავდაცვის მინისტრმა, ბენი განცმა, რომელიც მოვალეობის შესრულებას ამ კვირაში დაასრულებს, უკრაინის მიმართ ისრაელის პოლიტიკა განმარტა. მისი თქმით, ისრაელს არ აქვს უკრაინაში ექსპორტისთვის საკმარისი შეიარაღება.
“ჩვენი პროდუქციის მასშტაბი ექსპორტისთვის საჭირო რაოდენობაზე დაბალია. არ გვაქვს [უკრაინის საჭიროებების] შესაბამის წარმოების ბაზა. პოლიტიკის ცვლილება რომც გადაწყდეს, ჩვენი მხრიდან შეუძლებელი იქნება საჰაერო თავდაცვის სისტემების დაცარიელება. ეს საუბარი ფუჭია”. – თქვა განცმა.
ამას გარდა, ბენი განცმა აღნიშნა, რომ ისრაელი დახმარების შესაძლო ვარიანტებს გადახედავს.
“ვამოწმებთ რა შეიძლება გაკეთდეს და გაფართოვდეს, მაგრამ არ უნდა დაგვავიწყდეს, რომ უკრაინის უკან NATO დგას”. – თქვა განცმა.
ავტორი
