ირანის უშიშროების ძალებმა, ორი ცნობილი ირანელი მსახიობი მას შემდეგ დააკავა, რაც მათ საჯაროდ მხარი დაუჭირეს საპროტესტო მოძრაობას, ვინაიდან ხელისუფლება აძლიერებს დისიდენტების დარბევას.
საინფორმაციო სააგენტო Tasnim-ის ცნობით, ჰენგამე ღაზიანი და კატაიუნ რიაჰი ეროვნული საპროტესტო აქციების საჯაროდ მხარდაჭერისთვის დააკავეს.
კატაიუნ რიაჰი ირანის უსაფრთხოების ძალებმა კვირას დააკავეს, იტყობინება სააგენტო Tasnim. მსახიობმა, რომელიც ცნობილია თავისი როლებით სატელევიზიო სერიალებში “იოსებ წინასწარმეტყველი” და “მეათე ღამე“, ისევე როგორც ფილმები, როგორიცაა “უკანასკნელი ვახშამი“, საკუთარი “ინსტაგრამის” ექაუნთზე გამოაქვეყნა ვიდეო თავსაბურავის გარეშე მაჰსა ამინის გარდაცვალებიდან ორი დღის შემდეგ.
ჰენგამე ღაზიანიმ, რომელიც ირანში ცნობილია ფილმებში “ასე მარტივი” და “ცხოვრების დღეები“, შაბათს თავის “ინსტაგრამის” ანგარიშზე გამოაქვეყნა ვიდეო, სადაც ირანელი მსახიობი საჯაროდ თავსაბურავის გარეშე დგას და გაშლილ თმას იკრავს.
“ეს შეიძლება იყოს ჩემი ბოლო პოსტი. ამ მომენტიდან, თუ რამე დამემართება, იცოდე, რომ ბოლო ამოსუნთქვამდე მუდამ ირანის ხალხთან ვიქნები“, – თქვა მან.
საინფორმაციო სააგენტო Tasnim-ის ცნობით, ღაზიანი უშიშროების ძალებმა სასამართლოს განკარგულებით დააკავეს ვიდეოს გამოქვეყნებიდან მხოლოდ ერთი დღის შემდეგ. ამის შემდეგ იგი გადაიყვანეს პროკურატურაში და მას წაუყენეს ბრალი ირანის უსაფრთხოების წინააღმდეგ მოქმედებისა და ირანის რეჟიმის წინააღმდეგ მიმართული პროპაგანდისტულ საქმიანობაში, იტყობინება სახელმწიფო საინფორმაციო სააგენტო Fars.
კვირას, ირანის სასამართლომ განაცხადა, რომ სიკვდილით დასაჯეს მეექვსე პირი, რომელიც ბრალდებულია ბოლო საპროტესტო აქციებში მონაწილეობისთვის
ირანში ადამიანის უფლებათა დაცვის ორგანიზაციის ცნობით, სექტემბრის შემდეგ დემონსტრაციების დროს სულ მცირე 378 ადამიანი დაიღუპა, მათ შორის 47 ბავშვი. პროტესტის ტალღა კი მას შემდეგ დაიწყო რაც “მორალის პოლიციამ” 22 წლის ქალი – მაჰსა ამინი ჯიჰაბის “არასწორად ტარების” მიზეზით დააკავა და სცემა. მიღებული დაზიანებების შედეგად, ახალგაზრდა ქალი რამდენიმე დღეში საავადმყოფოში გარდაიცვალა.
ავტორი
