დონარუმამ „ნაპოლის“ ჩემპიონობა უწინასწარმეტყველა

ხვიჩა კვარაცხელიას „ნაპოლიმ“ თურქეთში პირველი ამხანაგური შეხვედრა ჩაატარა და „ანტალიასპორი“ დაამარცხა – 3:2. ქართველმა მოთამაშემ ტრავმის შემდეგ პირველად ითამაშა და მოედანზე პირველი ტაიმი გაატარა, მაგრამ გოლი არ გაუტანია, არც საგოლე გადაცემა გაუკეთებია.
მატჩის შემდეგ „ნაპოლის“ მთავარმა მწვრთნელმა ლუჩანო სპალეტიმ შემდეგი კომენტარი გააკეთა:
„კვარა კარგადაა, დაბრუნდა და ზურგის ტკივილი აღარ აქვს. მან დღესაც გვაჩვენა თავისი კლასის მცირე დოზა და ბედნიერები ვართ, რომ დაბრუნდა“.
ნეაპოლური გუნდი მომდევნო ამხანაგურ მატჩს 11 დეკემბერს, ინგლისურ „კრისტალ პალასთან“ გამართავს, ხოლო „სერია A“-ს უახლოეს ტურში 4 იანვარს, სტუმრად მილანის „ინტერს“ დაუპირისპირდება.
იტალიის ეროვნული გუნდისა და ფრანგული „პსჟ“-ის კარის დარაჯს, ჯანლუიჯი დონარუმას, იმედი აქვს, რომ „სერია – A“-ს მიმდინარე პირველობას „ნაპოლი“ მოიგებს.
„არ ვიცი, მილანში გადაბარგების შემდეგ რატომ აღიძრა ეჭვები ჩემი ნეაპოლის მიმართ სიყვარულის გამო. მიყვარს ნეაპოლი, ეს ჩემი ქალაქია, აქ არანაირი ეჭვი არ შეიძლება არსებობდეს.
ძალიან ბედნიერი ვიქნები, თუ „ნაპოლი“ „სერია A“-ს მოიგებს. მე მართლა ამის იმედი მაქვს“, – განაცხადა ჯანლუიჯი დონარუმამ.
გუშინ, ესპანურმა სპორტულმა ვებ-გვერდმა „EldesMarque“ „ვალენსიას“ ქართველი მეკარის, გიორგი მამარდაშვილის შესახებ წერილი გამოაქვეყნა, სადაც მის განსაკუთრებულ სტაბილურობას აღნიშნავს.
„გიორგი მამარდაშვილი „ვალენსიაში“ ზრდას აგრძელებს. გასულ სეზონში, წინააღმდეგობების მიუხედავად, მან ძირითად გუნდში თამაში დაიმსახურა, მიუხედავად იმისა, რომ წლის განმავლობაში იყო პერიოდი, რომლებშიც ის არ იყო ისეთი სტაბილური, როგორსაც თავად ისურვებდა. ახლა ის ჯენარო გატუზოს ერთგულია და ეჭვგარეშეა, რომ ის ძირითადი შემადგენლობის ფეხბურთელია. დამატებითი დროების ჩათვლით, მამარდაშვილმა ლა ლიგაში 1410 წუთი გაატარა.
სტატისტიკისა და მონაცემთა კომპანია „Wyscout“-ის მონაცემებით, გიორგი ის ფეხბურთელია, რომელსაც „ლა ლიგის“ ყველა მოთამაშეზე ყველაზე მეტი წუთი აქვს ნათამაშები. 14 თამაშში მან სამჯერ შეინახა კარი მშრალად, მისი მოგერიებული ბურთების მაჩვენებელი კი 71,7%-ს შეადგენს. ეს არის იმის დასტური, რომ ქართველი სპორტული კარიერის პიკშია. „ვალენსიაში“ გატარებული ერთი სეზონის შემდეგ, ის სარგებლობს ჯენარო გატუზოს სრული ნდობით.
გიორგი მამარდაშვილი ვალენსიელი მწვრთნელისთვის ამ სეზონში უმნიშვნელოვანესი ფიგურა იყო. მან შესანიშნავი სპექტაკლები შემოგვთავაზა, რამაც „იუვენტუსის“ მსგავსი დიდი ევროპული კლუბების დაინტერესებაც კი გამოიწვია. „ვალენსიაში“ მის შემდეგ ყველაზე მეტი სათამაშო დრო სამუელ ლინოს (1212), ტიერი კორეიას (1214) და უგო გილამონს (919) აქვთ, ეს ყველაფერი კი ქართველ მეკარეს „ვალენსიას“ გამძლეობისა და დისციპლინის საჩვენებელ ფიგურად აქცევს“.
გუშინ, ცნობილმა იტალიელმა ჟურნალისტმა ფაბრიციო რომანომ, მადრიდის „ატლეტიკოს“ თავდამსხმელის, ჟოაუ ფელიქსის სატრანსფერო ღირებულების შესახებ ისაუბრა.
„შანსი, რომ ფელიქსი 2023 წელს „ატლეტიკოს“ დატოვებს, არსებობს. კლუბი დაახლოებით 120 მილიონ ევროს მოითხოვს პორტუგალიელში. დანარჩენი კი მისი მსურველი კლუბის წინადადებაზე იქნება დამოკიდებული.
ჯერ ადრეა იმის თქმა თუ რომელ კლუბში გააგრძელებს კარიერას ფელიქსი. მისი აგენტი სწავლობს სატრანსფერო ბაზარზე არსებულ სიტუაციას და ბევრ კლუბთან აქვს კონტაქტი. თავად ჟოაუ ინგლისურ პრემიერლიგაში თამაშზე ოცნებობს.“ – დაწერა ფაბრიციო რომანომ.
გუშინ, პროფესიონალ ჩოგბურთელთა ასოციაციამ მილიონი დოლარით დააჯარიმა დიდი ბრიტანეთის საჩოგბურთო ასოციაცია. მიზეზი ისაა, რომ ბრიტანელებმა მიმდინარე წელს ქვეყნის მასშტაბით გამართულ ტურნირებზე რუსი და ბელარუსი სპორტსმენების დაშვებაზე უარი განაცხადეს.
„ATP-ს ამ გადაწყვეტილებით იმედგაცრუებულები ვართ, რადგანაც მათ ქმედებაში საერთოდ არ სჩანს რეაქცია, რომელიც რუსეთის უკრაინაში შეჭრაზე ყველას ერთად უნდა გვქონოდა. ATP მისი წესების დარღვევაზე საუბრობს, თუმცა, საოცარია, რომ მხედველობაში არ იღებს იმ რეალობას, რომელიც უკრაინაშია შექმნილი. მოვიფიქრებთ, რა შეიძლება გავაკეთოთ საპასუხოდ და აპელაციის შედეგებსაც დაველოდებით“, – ნათქვამია ბრიტანელთა განცხადებაში.
ადრე დიდი ბრიტანეთის საჩოგბურთო ასოციაცია ჯარიმით ქალთა საჩოგბურთო ასოციაციამაც დასაჯა, ATP კი დამატებით დაიმუქრა, რომ თუკი მსგავსი რამ გაისადაც განმეორდება, ბრიტანელთა დისკვალიფიკაციაზე იმსჯელებს.
შეგახსენებთ, რომ რუსეთის უკრაინას თავს 24 თებერვალს დაესხა. ამასთან დაკავშირებით, უიმბლდონის ტურნირის ორგანიზატორებმა აპრილშივე გადაწყვიტეს, რომ 2022 წლის ტურნირში რუსი და ბელარუსი ჩოგბურთელები არ დაეშვათ. ამ ქვეყნების წარმომადგენლები ასევე მოკვეთეს ბრიტანული ტურნირებიდან, რომლებიც LTA-ს ეგიდით ჩატარდა.