გუშინ, ინგლისურმა გამოცემამ „Daily Mail“ გაავრცელა ცნობა, რომ „მანჩესტერ სიტიმ“ ხვიჩა კვარაცხელიას გადაბირება სერიოზულად გადაწყვიტა.
საინტერესოა, რომ ორი დღის წინ კვარაცხელია უკვე დაუკავშირეს რამდენიმე ბრიტანულ გუნდს. ბოლო მათგანი ლონდონის „არსენალი“ გახლდათ, რომელიც მიხაილო მუდრიკის წარუმატებელი ტრანსფერის შემდგომ ახალ თავდამსხმელს ეძებს.
ბრიტანული მასმედიის მტკიცებით, „მანჩესტერ სიტი“ ქართველის ბრწყინვალე თამაშით აღფრთოვანებულია და მის სიტუაციას ყურადღებით აკვირდება.
ბრიტანელი მილიარდერი, სერ ჯიმ რეტკლიფის ქიმიური კომპანია „Ineos“ კი „მანჩესტერ იუნაიტედის“ შეძენის პროცესში ოფიციალურად ჩაერთო
ცოტა ხნის წინ ამ კლუბის ამჟამინდელმა მფლობელმა, გლეიზერების ოჯახმა დაადასტურა, რომ მის გაყიდვას აპირებს. ამ ამბის გავრცელებისთანავე, სერ ჯიმ რეტკლიფს გაუჩნდა კლუბის შეძენის ინტერესი.
სერ ჯიმ რეტკლიფი „მანჩესტერ იუნაიტედის“ დიდი გულშემატკივარია, მისი ქიმიური კომპანია კი წელიწადში დაახლოებით 50 მილიარდს გამოიმუშავებს და 29 ქვეყნის ტერიტორიაზე დაახლოებით 26 000 ადამიანს ამუშავებს.
„Ineos“ ჯგუფი საფრანგეთის „ლიგა 1“-ის გუნდ „ნიცას“ და შვეიცარიის ჩემპიონატის კლუბ „ლოზანას“ ფლობს.
გუშინ, იტალიურ მასმედიაში სენსაციური ინფორმაცია გავრცელდა. „მილანი“ მაიკ მენიოს გამო ახალ მეკარეს ეძებს და ჯანლუიჯი ბუფონი მოისურვა. აღმოჩნდა, რომ პაოლო მალდინი, რომელიც „მილანის“ გენერალური მენეჯერია, 45 წლის კარის დარაჯს უკვე ესაუბრა.
შეხვედრა ერთი კვირის წინ „ინტერისა“ და „პარმას“ მატჩის დასრულების შემდეგ შედგა, რომელიც მილანში გაიმართა. ჯერჯერობით უცნობია ბუფონის რეაქცია შესაძლო ტრანსფერთან დაკავშირებით, თუმცა იანვრის ბოლომდე, როცა სატრანსფერო ფანჯარა იხურება, სიტუაცია შესაძლოა შეიცვალოს.
ბუფონს „პარმასთან“ ხელშეკრულება 2024 წლის ზაფხულამდე აკავშირებს და „მილანში“ მის გადასვლაზე მიმდინარე სეზონის ბოლომდეა საუბარი. აღსანიშნავია, რომ მენიო ტრავმის გამო დაახლოებით ერთი თვე ვერ ითამაშებს.
ჯანლუიჯი ბუფონმა თავის დროზე კარიერა „პარმაში“ დაიწყო, შემდეგ „იუვენტუსში“ 19 სეზონი გაატარა, ხოლო ერთი „პარი სენ ჟერმენში“. 2021 წელს ის „პარმაში“ დაბრუნდა. ბუფონი 28 იანვარს 45 წლის გახდება.
ცოტა ხნის წინ ურუგვაელი ფეხბურთელი, 37 წლის ლუის სუარესი ბრაზილიურ „გრემიოში“ გადავიდა, სადაც პირველი მატჩიც ჩაატარა და თავი სამი გატანილი გოლით გამოიჩინა.
აღსანიშნავია, რომ თავდამსხმელმა სამივე გოლი პირველ ტაიმში შეაგდო, მისმა გუნდმა კი „სან ლუისი“ რეკოპა გაუშას სუპერთასზე 4:1 დაამარცხა.
„ჩემი აზრით, ეს ყველაზე წარმატებული დებიუტია. ბოლოს სადებიუტო მატჩში მაშინ გავიტანე, როდესაც სათამაშოდ მადრიდის „ატლეტიკოში“ გადავედი.“ – განაცხადა ლუის სუარესმა.
ლუის სუარესი ბოლოს ურუგვაის „ნასიონალში“ თამაშობდა, სადაც მსოფლიო ჩემპიონატისთვის ემზადებოდა. მუნდიალზე წარუმატებელი თამაშის შემდგომ, ის ბრაზილიაში გადავიდა და „გრემიოს“ ღირსებას იცავს, რომელიც წელს ბრაზილიის „სერია A“-ში დაბრუნდა.
მიუნხენის „ბაიერნი“ კი მანუელ ნოიერის შემცვლელს ეძებს, რომელიც ტრავმის გამო, მიმდინარე სეზონში ვეღარ ითაშებს.
მიუნხენური გუნდის მთავარი სამიზნე მიონხენგლადბახის „ბორუსიას“ შვეიცარიელი მეკარე იან ზომერი იყო, მაგრამ, მასთან მოლაპარაკება გართულდა. ამიტომ „ბაიერნი“ სხვა ვარიანტზე გადაერთო. გერმანული კლუბი ამჯერად იტალიური „ემპოლის“ კარის დარაჯის, გულიელმო ვიკარიოს შეძენას ცდილობს. 26 წლის მეკარის სანაცვლოდ გერმანელები 15 მილიონი ევროს გადახდას აპირებენ, მაგრამ „ემპოლი“ 20 მილიონ ევროს ითხოვს.
მიმდინარე სეზონში იტალიელმა მეკარემ 18 მატჩში 22 გოლი გაუშვა და 6-ჯერ კარი მშრალად შეინახა.
ავტორი
