სოფლად მცხოვრები მოსახლეობა რომ არაერთი გამოწვევის წინაშე დგას, ამის შესახებ არაერთხელ ვწერდით. განსაკუთრებით ყურადსაღები კი, სოფლად მცხოვრები ქალების მდგომარეობაა.
4 თებერვალს, პარტია “ქართული ოცნების” გურიის ქალთა ორგანიზაციის რეგიონულ საბჭოს წევრები ჩოხატაურში მცხოვრებ ქალებს შეხვდნენ. შეხვედრაზე არსებულ გამოწვევებზე, ქალთა საჭიროებებზე, სოციალურ და ეკონომიკურ პრიორიტეტებზე იმსჯელეს.
რა საჭიროებები აქვთ სოფლად მცხოვრებ ქალებს ჩოხატაურში _ ამ საკითხის შესახებ გურიის რეგიონის ქალთა ორგანიზაციის საბჭოს თავმჯდომარის მოადგილეს ჩოხატაურში, თეა მამალაძეს ვესაუბრეთ.
_ რა არის ის ძირითადი გამოწვევები, პრობლემები, საჭიროებები, რაც ქალებმა გამართულ შეხვედრაზე დაასახელეს?
_ სოფლებში, ძირითადად, ინტერნეტის პრობლემა დასახელდა. ასევე, მუნიციპალიტეტში აუტიზმის სპექტრის მქონე ბავშვებისთვის სარეაბილიტაციო ცენტრი არ არსებობს. გარდა ამისა, გამოიკვეთა ქალთა ეკონომიკური გაძლიერების საჭიროება.
_ როგორ ფიქრობთ, ჩამოთვლილ პრობლემებს შორის რისი აღმოფხვრა არის უმთავრესი?
_ ვფიქრობ, რომ ყველა საჭიროება მნიშვნელოვანია, თუმცა, ამ ეტაპზე პრიორიტეტულად მიმაჩნია აუტიზმის სპექტრის მქონე ბავშვებისთვის სარეაბილიტაციო ცენტრის არსებობა და ქალთა ეკონომიკური გაძლიერება.
_ რა ნაბიჯების გადადგმა იგეგმება მდგომარეობის გასაუმჯობესებლად?
_ ჩვენ ვაპირებთ აქტიურად ვითანამშრომლოთ მუნიციპალიტეტის მერიასთან, საკრებულოსთან და სახელმწიფო სტრუქტურებთან. ქალების მაქსიმალური ჩართულობით ვეცდებით აღმოვფხვრათ გამოვლენილი პრობლემები.
_ რა უნდა გაკეთდეს ქალთა ეკონომიკური გაძლიერებისთვის?
_ ეკონომიკურ რესურსებზე წვდომა. დასაქმების პროგრამის შემუშავება. გადამზადება, პროექტების წერა. კვალიფიკაციის ამაღლება სხვადასხვა სფეროში…
მსგავსი შეხვედრები რამდენიმე დღის წინ ჩატარდა ოზურგეთსა და ლანჩხუთში მცხოვრებ ქალებთანაც.
რა პრობლემებს ასახელებენ ამ მუნიციპალიტეტებში მცხოვრები ქალები _ ამის შესახებ გურიის ქალთა ორგანიზაციის რეგიონული საბჭოს ხელმძღვანელს, ნათია გოლიაძეს კითხვებით მივმართეთ.
_ პარტია “ქართული ოცნების” ქალთა ორგანიზაცია კონცენტრირებულია ქალი ამომრჩევლების საჭიროებების იდენტიფიცირებაზე, მათ გადაჭრასა და ქალებისთვის მნიშვნელოვანი თემების ადვოკატირებაზე.
ჩვენ, პარტია “ქართული ოცნების” ქალთა ორგანიზაციის რეგიონული საბჭოს წევრები, არა ერთ შეხვედრას ვმართავთ მუნიციპალიტეტებში მცხოვრებ ქალებთან. გამოიკვეთა სხვადასხვა სახის საჭიროებები. მაგალითად, ქალებმა დააყენეს ინტერნეტის ხელმისაწვდომობის პრობლემა, სამეწარმეო კუთხით მხარდაჭერა მიიჩნიეს პრიორიტეტად, ასევე, ჯერ კიდევ გამოწვევად რჩება ქალთა მიმართ ძალადობა, _ ამბობს გოლიაძე.
_ ჩამოთვლილ პრობლემებს შორის რისი აღმოფხვრაა უმთავრესი?
_ ყველა თემა, რომელიც აწუხებს ქალებს, არის მნიშვნელოვანი. საჭიროა თითოეული საკითხის შესწავლა და მხარდაჭერის მობილიზება.
_ რა ნაბიჯების გადადგმა იგეგმება მდგომარეობის გასაუმჯობესებლად?
_ “ქართულმა ოცნებამ” მართლაც ბევრი გააკეთა ქალთა მხარდასაჭერად და ქალთა მიმართ უთანასწორობის, ძალადობისა და დისკრიმინაციის წინააღმდეგ საბრძოლველად. ამის საუკეთესო მაგალითია კანონი გენდერული კვოტირების შესახებ, რომელმაც პარლამენტსა და საკრებულოებში ქალთა მეტი მონაწილეობა მოიტანა შედეგად. ასევე, საკანონმდებლო და სისტემური რეფორმები გაატარა ოჯახში ძალადობის წინააღმდეგ. როგორც ცენტრალურ, ასევე, ადგილობრივ დონეზე არაერთი პროგრამა ხორციელდება ქალთა ეკონომიკური გაძლიერებისთვის. თუმცა ეს საკმარისი არ არის, მუშაობა ამ მიმართულებით გრძელდება.
_ თქვენ როგორ აფასებთ სოფლად მცხოვრები ქალების მდგომარეობას? რა გამოწვევებს ხედავთ და როგორ უნდა გამოსწორდეს ვითარება?
ჩვენ აქტიურად ვურთიერთობთ სოფლად მცხოვრებ ქალებთან, ვიცით რა მათი საჭიროებები, ვცდილობთ დავეხმაროთ მათ ძლიერი მხარეების გამოკვეთასა და რეალიზებაში, ვუზრუნველვყოთ მათი ჩართულობა არა ერთ აქტივობაში.
სოფლად მცხოვრებ ქალბატონებთან შეხვედრების დროს გამოიკვეთა, რომ ისინი არიან ძალიან ენერგიულები, მოტივირებულები, მათ აქვთ უნარი და შესაძლებლობა ჩვენი ქვეყნის ეკონომიკის ზრდაში მნიშვნელოვანი წვლილი შეიტანონ.
ქალებს ჩვენს ისტორიაში, კულტურასა და სოციალურ ცხოვრებაში, ყოველთვის ჰქონდათ თანასწორი და გამორჩეული ადგილი, ეს ადგილი ქალს ჩვენს საზოგადოებაში აწმყოსა და მომავალშიც უნდა ჰქონდეს.
ქალთა ორგანიზაცია ყველაფერს გააკეთებს იმისთვის, რომ ბევრი აქტიური, მაგრამ ჩრდილში მყოფი ქალი დააბრუნოს სხვადასხვა დონეზე გადაწყვეტილების მიღების პროცესში და მისცეს მათ ახალი შესაძლებლობები.
ავტორი
