ხვიჩა კვარაცხელიას ხელფასი მნიშვნელოვნად გაიზრდება

გუშინ, იტალიურ მედიასთან ჟურნალისტმა ჩირო ვენერატომ ისაუბრა და რამდენიმე მნიშვნელოვანი ინფორმაცია გაახმაურა:

„კვარაცხელიას მიმართ ოპტიმისტურად ვართ განწყობილნი. თავად მას „ნაპოლიში“ სურს დარჩენა, მიუხედავად იმისა, რომ მისით მადრიდის „რეალი“ და „ნიუკასლი“ ინტერესდებიან.

დე ლაურენტისი ქართველისთვის ახალ კონტრაქტს ამზადებს, რომლის მიხედვითაც მისი ხელფასი 2.5 მილიონ ევრომდე გაიზრდება და ამას ბონუსებიც დაემატება. კონტრაქტი კიდევ 1 წლით გახანგრძლივდება, რაც იმას ნიშნავს, რომ ის 5 წლამდე გაიზრდება და მასში გამოსასყიდი თანხა არ იქნება ჩადებული”, – ჩირო ვენერატომ.

ახლო წარსულში „მილანის“ ყოფილმა მცველმა, ალესანდრო კოსტაკურტამ კი ჩემპიონთა ლიგაზე „ნაპოლის“ შანსებზე ისაუბრა:

„კვარაცხელიას აღმოჩენა 6 კგ – იანი ტრიუფელის აღმოჩენას გავს. ის გასაოცარი ფეხბურთელია და არც ვიცი საიდან მოვიდა ან საერთოდ რა ჯანდაბას აკეთებდა ექვსი თვის წინ.

არ მინდა ეს სისულელედ ჩამითვალოთ, თუმცა „ნაპოლი“ ევროპაში საუკეთესო გუნდია. რა თქმა უნდა, სხვა გუნდებიც ძალიან მაღალ დონეს აჩვენებენ და კარგად ვიცით, რომ ჩემპიონთა ლიგას შეუძლია მოთამაშეების ისეთი მოტივაცია გამოავლინოს, რომლებსაც შიდა ჩემპიონატებში ვერ ვიხილავთ.

ამ მომენტში „ნაპოლი“ „მანჩესტერ სიტიზე“ და სხვებზე უკეთესი გუნდია, თუმცა ევროპის უძლიერეს გუნდებს თავიანთი ნამდვილი ძალა ადგილობრივ ჩემპიონატებში ჯერ არ უჩვენებიათ, სწორედ ამიტომ მგონია, რომ „ნაპოლის“ აქვს შესაძლებლობა ასე ხმამაღლა და ასეთი დიდი მიზნებისთვის იოცნებოს,“ – ასეთია ალესანდრო კოსტაკურტას მოსაზრება.

გუშინ, „ნაპოლის“ ყოფილმა მთავარმა მწვრთნელმა რაფაელ ბენიტესმა განაცხადა, რომ ამ გუნდს ჩემპიონთა ლიგის მოგება შეუძლია.

„მიყვარს ნეაპოლი. „ნაპოლიც“ თავდაჯერებულია და კარგად თამაშობს. ისინი კარგად გამოდიან „სერია A“-შიც. რაც უფრო წინ მიიწევენ, მით უფრო გაიზრდებიან. ჩემპიონთა ლიგა? რატომაც არა. მე არ ვამბობ, რომ გაიმარჯვებენ, მაგრამ რატომაც არა? სპალეტი ჭკვიანი ადამიანია, მას ესმის გუნდის, ისინი კარგად მუშაობენ.

მათ ასევე კარგი გარემო აქვთ, ეს ეხმარება ახალგაზრდა ფეხბურთელებს, რომლებიც გუნდში ახლახან მივიდნენ. თითქმის დარწმუნებული ვარ, რომ ისინი გააგრძელებენ ამ სეზონში ასე თამაშს. როცა სკუდეტო მრავალი წელი არ არის მოგებული, მოტივაცია უფრო დიდია,” – განაცხადა რაფაელ ბენიტესმა.

გუშინ, „ნაპოლის“ ნახევარმცველმა ანდრე-ფრანკ ზამბო ანგისამ იტალიურ მასმედიას ინტერვიუ მისცა, რომელშიც საჩემპიონო შანსებსა და ჩემპიონთა ლიგაზე ისაუბრა.

„იტალიის ჩემპიონობას თუ ვერ მოვიგებთ, ეს სრული კრახი იქნებოდა. არა, ეს შეუძლებელია, ამის წარმოდგენაზეც კი უარს ვამბობ, არ მინდა, ამაზე ვიფიქრო. ამიტომ, ყველაფერს გავაკეთებთ ჩემპიონობისთვის და საიმისოდ, რომ ეს ჩვენი სეზონი იყოს.

მეტოქეების მატჩებს დიდად არ ვუყურებ, არ მინდა, წინასწარ ვნახო, როგორ თამაშობენ ისინი, მირჩევნია, უშუალოდ მოედანზე გამოვცადო ყველაფერი, მაგრამ „აინტრახტის“ რამდენიმე თამაში ვნახე, შესანიშნავი გუნდია, რომელიც დიდი ინტენსივობით თამაშობს. არ მიკვირს, რომ ისინი ჩემპიონთა ლიგის მერვედფინალში არიან.

ჩვენს გუნდში არავინაა ლიდერი. ყველანი გუნდურად ვმოქმედებთ და ახლა ჩემპიონთა ლიგაზე ვართ კონცენტრირებული. სპალეტი? არცერთ მწვრთნელს მოუცია ჩემთვის იმდენი, რამდენიც მან, ადამიანურ დონეზეც“, – თქვა ანგისამ.

ტურინის „იუვენტუსის“ ყოფილმა თავდამსხმელმა ფაბრიციო რავანელიმ აღნიშნა, რომ ხვიჩა კვარაცხელიასა და ვიქტორ ოსიმენთან ერთად დიდი სიამოვნებით ითამაშებდა.

„ნაპოლის“ ვუსურვებ, რომ ჩემპიონატში ყველა შეკითხვა სწრაფად გააქროს და შემდეგ შეძლოს ჩემპიონთა ლიგაზე სრულად ფოკუსირება. ამ გუნდს ევროპაში ყველას წინააღმდეგ თამაში შეუძლია, თუნდაც დიდი გუნდების წინააღმდეგ და მათ ეს უკვე აჩვენეს ჯგუფურ ეტაპზე შესანიშნავი გამოსვლით. მოკლედ: მათ არავის არ უნდა ეშინოდეთ, პირიქით, ალბათ, „ნაპოლის“ სხვებს უნდა ეშინოდეთ.

მომწონს ოსიმენის ფიზიკური ძალა და მონდომება: ის არასოდეს თმობს ბურთს. მე ნამდვილად ვფიქრობ, რომ ის ახლა მსოფლიოში ერთ-ერთი საუკეთესო თავდამსხმელია. მასთან და კვარასთან ერთად ტრიოში ძალიან სასიამოვნო იქნებოდა თამაში და ბევრ გოლს გავიტანდი“, – განაცხადა ფაბრიციო რავანელიმ.

რავანელი თავის დროზე „იუვენტუსის“, „მიდლსბროს“, „მარსელის“, „ლაციოს“, „პერუჯას“ და იტალიის ნაკრების თავდამსხმელი იყო.