10 მარტს კიევში დაკრძალეს უკრაინის გმირი, დმიტრი კოციუბაილო, მეტსახელად „და ვინჩი“, რომელიც სიცოცხლეშივე იქცა ლეგენდად.
„და ვინჩისთან“ გამოსამშვიდობებლად კიევში, დამოუკიდებლობის მოედანზე, ასობით ადამიანი შეიკრიბა. მათ შორის იყვნენ: უკრაინის პრეზიდენტი, ვოლოდიმირ ზელენსკი, უკრაინის შეიარაღებული ძალების მთავარსარდალი ვალერი ზალუჟნი, თავდაცვის მინისტრი ალექსეი რეზნიკოვი, დაზვერვის მთავარი სამმართველოს უფროსი კირილ ბუდანოვი და სხვა ოფიციალური პირები.
დაკრძალვაზე იმყოფებოდა ფინეთის პრეზიდენტი სანა მარინიც, რომელიც 10 მარტს ოფიციალური ვიზიტით იყო ჩასული კიევში.
დმიტრი კოციუბაილო 2014 წლიდან იბრძოდა უკრაინის დასაცავად, ჯერ კიდევ იმ დროიდან, როცა თინეიჯერი იყო. იგი ომში მოხალისედ წავიდა და 18 წლის ასაკში მოხალისეთა ოცეულის, შემდეგ კი ასეულის მეთაური გახდა. 2014 წელს დონეცკის ოლქში მძიმედ დაიჭრა, მაგრამ გამოჯანმრთელების შემდეგ ფრონტზე დაბრუნდა.
მედიასთან იგი ამბობდა, რომ უნდოდა მხატვარი გამოსულიყო, სწორედ მის ამ ოცნებას უკავშირდება კოციუბაილოს საბრძოლო მეტსახელი – „და ვინჩი“.
8 წლის განმავლობაში, 2014 წლიდან 2022 წლამდე, რუსეთის უკრაინაში სრულმასშტაბიან შემოჭრამდე, დმიტრი კოციუბაილო აღმოსავლეთ უკრაინაში იბრძოდა. იგი ამბობდა, რომ სურდა სამოქალაქო ცხოვრებას დაბრუნებოდა, მაგრამ არ შეეძლო ეს, სანამ უკრაინა არ დაიბრუნებდა ყველა ოკუპირებულ ტერიტორიას.
21 წლის ასაკში „და ვინჩი“ მისი ცნობილი ქვედანაყოფის, „და ვინჩის მგლების“ მეთაური გახდა, რომელიც უკრაინელი მოხალისეების ბატალიონში შედიოდა.
2017 წელს „და ვინჩიმ“ მიიღო უკრაინის სახალხო გმირის ორდენი, 2021 წელს კი ის გახდა პირველი უკრაინელი მოხალისე, რომელმაც სიცოცხლეშივე მიიღო უკრაინის გმირის წოდება. მაშინ მას გმირის მედალი უკრაინის პრეზიდენტმა ზელენსკიმ თავად გადასცა.
უკრაინის გმირის წოდების მიღების შემდეგ მან თქვა, რომ ამ ჯილდოს აღიქვამს, როგორც ჯილდოს, რომელიც ეკუთვნის ყველა მოხალისეს, რომელიც იცავს ქვეყანას.
„და ვინჩი“ არ იყო ჩვეულებრივი სამხედრო და არ მსახურობდა უკრაინის შეიარაღებულ ძალებში, მას მხოლოდ 2022 წელს მიენიჭა უმცროსი ლეიტენანტის სამხედრო წოდება.
დმიტრი კოციუბაილო 7 მარტს დაიღუპა ბახმუტთან, 27 წლის ასაკში.
მის დაკრძალვაზე უკრაინის მთავარსარდალმა, ვალერი ზალუჟნიმ მუხლზე დაუჩოქა „და ვინჩის“ დედას.
„უკრაინის გმირი, მოხალისე, ადამიანი – სიმბოლო, ადამიანი – სიმამაცე. დაიღუპა ბახმუტთან ბრძოლაში, უკრაინისთვის ბრძოლაში. უკრაინის ერთ-ერთი ყველაზე ახალგაზრდა გმირი. ერთ-ერთი მათგანი, რომლის პირადი ისტორია, ხასიათი, სიმამაცე სამუდამოდ იქცა უკრაინის ისტორიად“ – განაცხადა ზელენსკიმ დმიტრი კოციუბაილოს დაკრძალვის შემდეგ.
