„შეწყდეს მუქარა ნატო გოგელიას და მისი არასრულწლოვანი შვილების მისამართით“

„ტვ პირველის“ ჟურნალისტ ნატო გოგელიაზე თავდასხმაში ბრალდებული მამუკა ანდღულაძე დღეს ქუთაისის სააპელაციო სასამართლომ სასჯელისგან გაათავისუფლა.

შეგახსნებთ, რომ სპეციალურმა საგამოძიებო სამსახურმა მამუკა ანდღულაძე 17 მარტს დააკავა და ბრალს დასდო სისხლის სამართლის კოდექსის 154-ე მუხლის მეორე ნაწილით, 126-ე მუხლის პირველი ნაწილით და 187-ე მუხლის პირველი ნაწილით გათვალიწინებული დანაშაულების ჩადენაში, რაც გულისხმობს ჟურნალისტისთვის პროფესიულ საქმიანობაში უკანონოდ ხელის შეშლას ძალადობის მუქარით, ცემას ან სხვაგვარ ძალადობას, სხვისი ნივთის დაზიანებას ან განადგურებას. დანაშაულებისთვის მაქსიმალური სასჯელი 2 წლით თავისუფლების აღკვეთაა.

გამოძიებით დადგინდა, რომ “2023 წლის 15 მარტს, სოფელ ბახვში, ჟურნალისტ ნატო გოგელიას თავს დაესხა „ალტ-ინფოს“ წარმომადგენელი, ჟურნალისტს ფიზიკური შეურაცხყოფა მიაყენა და მობილური ტელეფონი დაუმტვრია”.

სააპელაციო სასამართლოს სხდომის შემდეგ, ანდღულაძემ თქვა: „ჟურნალისტმა ნატო გოგელიამ ოჯახში მომიწყო პროვოკაცია. სამართალმა იზეიმა და აუცილებლად ბოლომდე მივიყვან საქმეს, რომ იქით ვცნო გოგელია დამნაშავედ ძალადობაზე, ოჯახის მიმართ შანტაჟსა და შეურაცხყოფისთვის“.

სააპელაციო სასამართლოს გადაწყვეტილების და ანდღულაძის განცხადების შესახებ კომენტარი ვთხოვეთ ნატო გოგელიას ადვოკატს, ორგანიზაცია „მედიაომბუდსმენის“ დირექტორს ნათია კაპანაძეს:

„ნატო გოგელიას, ისევე როგორც ნებისმიერი ჟურნალისტის ინტერესია იმუშაოს უსაფრთხო გარემოში, თავს არ ესხმოდნენ კითხვების დასმის გამო, მოახერხოს ინფორმაციის მიღება და გავრცელება ყოველგვარი ჩარევისგან დამოუკიდებლად.

გამოძიების დაწყება საქართველოს სისხლის სამართლის კოდექსის 154-ე მუხლით ერთ–ერთი ნაწილია ჟურნალისტების უფლებების დასაცავად.

ცხადია, ჩვენ გავაგრძელებთ სამართლებრივ პროცედურებს, რომ ნატო გოგელიაზე თავდასხმის ამ შემთხვევას შედეგად მოჰყვეს ჟურნალისტების უფლებების დარღვევის უარყოფითი პრაქტიკის შეწყვეტა.

ჩვენთვის პრიორიტეტია შეწყდეს მუქარაც ნატო გოგელიას და მისი არასრულწლოვანი შვილების მისამართით, ამიტომ კიდევ ერთხელ მივმართეთ განცხადებით სპეციალურ საგამოძიებო სამსახურს, გარდა კონკრეტული ინციდენტის გამოძიებისა, მიიღოს ზომები ჟურნალისტის და მისი არასრულწლოვანი შვილების მხარდასაჭერად“, _ გვითხრა ნათია კაპანაძემ.