მიმდინარე წლის 28 მარტს, ბათუმში, ევროპის ჩემპიონატის საკვალიფიკაციო შეხვედრაში საქართველოს ნაკრები ნორვეგიას უმასპინძლებს.
გუშინ ცნობილი გახდა რომ ამ მატჩს „მანჩესტერ სიტისა“ და ნორვეგიის ეროვნული გუნდის უპირობო ლიდერი ერლინგ ჰოლანდი გამოტოვებს. ამის მიზეზად ნორვეგიელი თავდამსხმელის საზარდულის ტრავმა დასახელდა.
ჰოლანდმა ეროვნული გუნდის შეკრება უკვე დატოვა და ქალაქ მანჩესტერში დაბრუნდა. 22 წლის ფეხბურთელი საქართველოს ნაკრებთან შეხვედრის გარდა, ესპანეთთან მატჩსაც დააკლდება.
„ბარნლისთან“ მატჩის შემდეგ ჰოლანდმა საზარდულის არეში ტკივილი იგრძნო. იმედი გვქონდა, რომ ეს მხოლოდ დროებითი იყო, რომელსაც სანაკრებო თამაშამდე გადაიტანდა, მაგრამ გუშინდელი ტესტებისა და გამოკვლევების შემდეგ გაირკვა, რომ ის ესპანეთთან და საქართველოსთან ვერ ითამაშებს“, – დაიწერა ნორვეგიის ფეხბურთის ფედერაციის ოფიციალურ ვებგვერდზე.
ჰოლანდს მიმდინარე სეზონში „მანჩესტერ სიტის“ მაისურით, ყველა ტურნირზე 40 შეხვედრაში 44 გოლი დაუგროვდა, ნაკრებში კი მის ანგარიშზე ექვსი მატჩი და ამდენივე გოლია.
გუშინვე, ნორვეგიის ნაკრების მთავრმა მწვრთნელმა სტალე სოლბაკენმა ერლინჰ ჰოლანდის ტრავმაზე კომენტარი გააკეთა:
„ერლინგმა მძიმედ გადაიტანა, როცა მიხვდა, რომ ეროვნულ ნაკრებს ვერ დაეხმარებოდა. საბედნიეროდ, გუნდში კიდევ ბევრი ნიჭიერი და თავდაჯერებული მოთამაშე გვყავს, რომელიც ქულების მოპოვებაში დაგვეხმარება. მხოლოდ ერთ ფეხბურთელზე დამოკიდებული არ ვყოფილვართ და მუშაობას ვაგრძელებთ, რათა მაქსიმალურად მომზადებული შევხვდეთ ესპანეთთან და საქართველოსთან მატჩებს“.
გუშინ ერთი საინტერესო ინფორმაცია გავრცელდა. გერმანული „Transfermarkt“-ის მტკიცებით, ხვიჩა კვარაცხელიას საბაზრო ღირებულებამ უკვე 85 მილიონ ევროს მიაღწია. გასული წლის 11 ნოემბრის მონაცემებით ქართველის ღირებულება 60 მილიონ ევროს შეადგენდა.
გუშინ, ცნობილი იტალიელი მეკარე ჯანლუიჯი ბუფონი Bobo TV-ს ეთერში სტუმრად მიიწვიეს, სადაც „ნაპოლის“ შესახებაც ისაუბრა:
„სპალეტიმ ჯერ კიდევ „რომაში“ მუშაობის წლებიდან აჩვენა, რომ რაღაც განსხვავებული ჰქონდა. ამბობენ, რომ სეზონის გარკვეულ ეტაპზე მისი გუნდები რელსებიდან გადადიან, მაგრამ ამ ჭორების ნაკლებად მჯერა. სიმართლე ისაა, რომ რასაც წელს ვუყურებ, „ნაპოლი“ იტალიური ფეხბურთისთვის უნიკალური გამოფენაა. საზღვარგარეთ ხედავენ გუნდს, რომელიც სიამოვნებას იღებს და ნამდვილ ფეხბურთს თამაშობს, ჩემი აზრით, მეტოქეებში შიშსაც იწვევს.
ღვთიური თავდამსხმელ ოსიმენთან, კვარაცხელიასთან ერთად, ეს არის გუნდი, რომელიც ისეთ თამაშს აჩვენებს, როგორიც იტალიაში არ ყოფილა. რაღაც მსგავსი ალბათ იყო სარის „ნაპოლისგან“, მაგრამ ეს გუნდი უფრო ამაღელვებელია. ისინი ყველა თამაშს მარტივად იგებენ, თუმცა, ცხადია, როდესაც 20-ქულიანი უპირატესობა გაქვს, ეს გეხმარება.
ჩემპიონთა ლიგაზე ჩემი აზრით წილისყრაში გაუმართლა, რადგან იტალიურ გუნდს შეხვდება. ამიტომ, ამ მატჩს ისე მიუდგება, თითქოს „სერია A“-ს თამაში იყოს. ეს საკუთარ თავზე მაქვს გამოცდილი, როდესაც ჩემპიონთა ლიგის ფინალში „მილანთან“ ვითამაშე. მატჩამდე ძალიან მშვიდად ვიყავი, რადგან ყველა ფეხბურთელს ვიცნობდი. ჩემი აზრით, „ნაპოლის“ შეუძლია ფინალში გასვლა და ბედნიერი ვიქნები,“ – განაცხადა ჯანლუიჯი ბუფონმა.
გუშინ, „ნაპოლისა“ და „ვალენსიას“ ყოფილმა მთავარმა მწვრთნელმა ჯენარო გატუზომ იტალიურ მედიასთან ხვიჩა კვარაცხელიასა და ნეაპოლური გუნდის შესახებ ისაუბრა:
„ველოდი თუ არა ოსიმენისგან ასეთ აფეთქებას? დიახ, რადგან მასში დიდი ფულიცაა გადახდილი. „ლილში“ ის კარგად თამაშობდა და „ნაპოლიში“ ადაპტაცია ადვილი არ იყო. ჩემი გუნდში ყოფნის პერიოდში რამდენიმე თვე ვერ თამაშობდა და მისი არყოფნა გვეტყობოდა. ის არის ძალიან სწრაფი და ძალიან ტექნიკური, წარმოუდგენელი მოთამაშე. თუმცა, ეს „ნაპოლი“ მხოლოდ ოსიმენი არ არის, არის ასევე ლობოტკა, რომელმაც ჩემთან საკუთარი თავი საუკეთესოდ ვერ წარმოაჩინა.
რას ვფიქრობ კვარაცხელიაზე? თითქოს ისევ ჯორჯ ბესტი ვნახეთ. წარმოუდგენელ რაღაცებს აკეთებს, საოცარი სიმსუბუქით. ეს არის გუნდი, რომლითაც აღტაცებული ვარ და საოცნებო ფეხბურთს თამაშობს.“
გუშინ ცნობილი გახდა რომ „ბარსელონა“ მთავარ მწვრთნელ ჩავის კონტრაქტს გაუხანგრძლივებს.
კატალონიურ კლუბს სურს ჩავის კონტრაქტი მინიმუმ ერთი წლით გაუგრძელოს. ხელმძღვანელობა ამ საკითხის სპეციალისტთან განხილვას ივნისში გეგმავს.
თუმცა, ჩავისთან ხელშეკრულების განახლების რთული საკითხი მწვრთნელის ხელფასია. ახლა ჩავის ძალიან დაბალი ანაზღაურება აქვს. ეს პრობლემა ჯერ არ მოგვარებულა.
ჩავი ბარსელონას 2021 წლიდან ხელმძღვანელობს. სპეციალისტსა და კლუბს შორის კონტრაქტის ვადა 2024 წლამდეა გათვლილი.
26 ტურის შემდეგ, „ბარსელონა“ ესპანეთის „ლა ლიგას“ 68 ქულით ლიდერობს და უახლოეს მდევარ მადრიდის „რეალს“ 12 ქულით უსწრებს.
ავტორი
