2023 წლის ერთიანი ეროვნული გამოცდები უკვე დაიწყო. აბიტურიენტებმა 3 ივლისს პირველი გამოცდა ქართულ ენასა და ლიტერატურაში ჩააბარეს. ხოლო 7 ივლისს გამოცდა მათემატიკაში ჰქონდათ. ბევრი აბიტურიენტი მათემატიკის გამოცდით უკმაყოფილოა და ამბობენ, რომ ტესტები განსაკუთრებული სირთულით გამოირჩეოდა, არ შეესაბამებოდა სკოლის პროგრამას და მაღალი ქულის მიღებას ვერ შეძლებენ:
“დღეს ბევრი ტიროდა, ბევრს სასწრაფო გამოუძახეს, ჩემს მოსწავლეს ნერვიულობის გამო სისხლი წასკდა ცხვირიდან, ასევე ჩემს რამდენიმე მოსწავლეს ნერვიულობის და სტრესის გამო სციოდა, კანკალებდა. ერთი რამ შემიძლია გითხრათ, ეს კონკურსია და გამოცდა მარტო თქვენთვის არ ყოფილა რთული. გაიკითხეთ და მიხვდებით. ძალიან ბევრი აიღებს დაბალ ქულას, თუ 30-ს ელოდებოდა – 15-ს და ასე შემდეგ”, – წერდა ერთ-ერთ ჯგუფში მასწავლებელი და ამბობდა იმსაც, რომ 100 აბიტურიენტიდან ამოცანები მხოლოდ ერთს ახსოვდა, დანარჩენები კი შოკში იყვნენ.
იმავეს წერდნენ სოციალურ ქსელში მშობლები და პედაგოგები:
- “რა დააშავეს აბიტურიენტებმა?! შუაღამეა და ჩვენი შვილები ამ წუთებშიც, ინტერნეტ სივრცეში, ისევ ამოცანებს განიხილავენ… ერთ მათემატიკოსს ამოუხსნია (ისიც, ოთხიანი კი არა, სამქულიანი!!!) და სამი გვერდიაო ნაწერი!!! მე ვნახე მათემატიკის გამოცდიდან ნაადრევად თუ დაგვიანებით გამოსული (მათ შორის “კომაროველებიც”), ჩვენი ულამაზესი ახალგაზრდების მხრებჩამოყრილი, დამარცხებული, კოვიდის სტრესგამოვლილი, სამი წლის მანძილზე უსისტემო სწავლებით სკოლადამთავრებული ბავშვების ნაკადი და მათ ხალას სახეებზე ეწერათ რატომ??? 1. ქართულის მისაღებ გამოცდაზე, ტექსტებთან შეუსაბამო სათაურებით, ისინი დააეჭვეს ამ პროცესში მონაწილე ფილოლოგთა კორპუსის კომპეტენციაში. 2. მტრულად შედგენილი მათემატიკის საგამოცდო საკითხებით კი ახალგაზრდებს აგრძნობინეს, რომ განათლების დაავადებული სისტემის ახალი რგოლისათვის მათ სიყვარულით არ ეგებებიან.რა ხდება??? მეტი დაბალი ქულა – ნაკლები გრანტი თუ უფრო უარესი?!”
- “გულახდილად გვაინტერესებს, მათემატიკის ტესტებს ვინც ადგენს, საერთოდ აზრზეა, როგორ ისწავლება ეს საგანი სკოლებში??? თუ მარტო კომაროველებზე და ვეკუელებზეა გათვლილი??? ის ბავშვები, რომლებიც სკოლაშიც და რეპეტიტორებთანაც ძლიერებად ითვლებოდნენ, დაშოკილები და დასტრესილები გამოვიდნენ დღეს გამოცდიდან… ცოტა გააზრებულად შეადგინეთ ეს ოხერი ტესტები, რააა! არავინ ითხოვს, უცოდინრობა აპატიოთ ბავშვებს, მაგრამ მხოლოდ მათემატიკური სკოლების მოსწავლეებზე არ უნდა გათვალოთ! 95 % ყურებჩამოყრილი გამოვიდა დღეს გამოცდიდან!”
- “ამ ტესტებს, ალბათ, ადგენენ ის მათემატიკოსები, რომლებსაც სკოლასთან, იმ პროგრამასთან, რომელსაც იქ ასწავლიან, შეხება არ აქვთ. მათ, ვითომ, არ იციან, რა დონეა დღეს სკოლებში. ბავშვები, რომლებმაც წელს ჩააბარეს ან გაისად ჩააბარებენ გამოცდებს, გამოიარეს ონლაინ სწავლება. მოგეხსენებათ, რა დასწრება და დონე იყო”.
- “საერთოდ რის საფუძველზე დგება ტესტები და რა ცოდნას ითხოვენ? ერთიანი ეროვნული გამოცდები თუა, ერთიანი მონაცემები უნდა იყოს გათვალისწინებული. როცა სკოლების ნახევარი თითქმის დაინგრა და დაიკეტა და ბავშვების დიდმა ნაწილმა ონლაინ ისწავლა ან საოცრად გართულებულ პირობებში, როცა სკოლა ისედაც ვერ აძლევს ნორმალურ ცოდნას და რეპეტიტორების გარეშე გამოცდებს ვერ აბარებენ, კიდევ შეიძლება, უარესად გაართულო გამოცდები და მოსთხოვო მოსწავლეებს ის შედეგი, რის მისაღწევადაც შენ, სამინისტროს, ნაბიჯი არ გადაგიდგამს? ანუ რა გამოდის, ავალდებულებ ყველას, თუ გინდა, რომ გახდე სტუდენტი, თუნდაც ნუ ივლი სკოლაში, მაგრამ აუცილებლად იქონიე ბევრი ფული, რომ რეპეტიტორებთან მიიღო გამოცდებისთვის საჭირო ცოდნა? და ახლა ეს ცოდნაც კი არ აღმოჩნდა საკმარისი. რას ნიშნავს ეს?”
- “მათემატიკის ტესტმა გვიჩვენა იგივე პრაქტიკა, რაც წინა წლებში. ყველა არჩევით საგანში (ისტორიისა და ბიოლოგიის გარდა) გრანტის აღება შედარებით დაბალი ქულით იქნება შესაძლებელი. გეოგრაფიაში, ფიზიკასა და სამოქალაქოშიც ველოდები რთულ დონეს, თუმცა ეს ავტომატურად გამოიწვევს დაბალი ქულებით გრანტების აღებას. მაგალითად, 60 დან 33 ქულა შარშან გეოგრაფიაში 100% გრანტი იყო. არ ვფიქრობ, რომ ისტორიასა და ბიოლოგიაში დაბალი ქულები დაიწერება, გრანტის მოსაპოვებლად ამ საგნებში მაღალი ქულა იქნება საჭირო”.
აბიტურიენტები ასევე საკუთარ შეფასებებს ჯგუფებში აფიქსირებდნენ და აღნიშნავდნენ, რომ ტესტი, წინა წლებთან შედარებით, განსაკუთრებული სირთულით გამოირჩეოდა:
- “მათემატიკიდან გამოვედი, მეორე ვარიანტი ვარ. ერთი რამის თქმა შემიძლია, მადლობა ღმერთო, რომ სამოქალაქოს ვაბარებ.”
- “რაც კი ეროვნულები ყოფილა, ყველაზე რთული ტესტი იყო. ერთადერთი, 2019 წელს შეიძლება ამ სირთულის ყოფილიყო. მაგრამ, იქ 2-ქულიანები იყო ცოტა ადვილი.”
- “ჩემი აზრით, რთული იყო, ყველა წლის მაქვს ნაწერი და თან დრო იყო უზომოდ ცოტა.”
- “ასეთი რთული არც ერთ წელს არ ყოფილა. ვფიქრობ, ბარიერის გადალახვა მარტივია, მაგრამ კარგი ქულის აღება რთული… ალბათ, ბევრს ბარიერიც გაუჭირდება.”
- “რა უსამართლოდ ექცევიან მათ, ვინც საჯარო სკოლა დაამთავრა! ასეთ დონეზე რომელ საჯარო სკოლაში ასწავლიან მათემატიკას? თუ ვეკუას და კომაროვის სკოლების მოსწავლეებზეა მხოლოდ მათემატიკის გამოცდის საკითხები?”
- “წელს ვინც მათემატიკის გამოცდაში მაღალ ქულას აიღებს, ჩათვალეთ, უნივერსიტეტს ისე დახურავს, ოდნავადაც არ გაუჭირდება.” – წერდნენ აბიტურიენტები ჯგუფებში.
თუმცა, იყვნენ ისეთებიც, რომლებიც ამბობდნენ, რომ ტესტი საშუალო სირთულის იყო და მისი დაძლევა განსაკუთრებულ სირთულეს არ წარმოადგენდა.
შეფასებისა და გამოცდების ეროვნულ ცენტრში გვითხრეს, რომ სტატისტიკასა და ტესტის სირთულეზე საუბარი ჯერჯერობით ნაადრევია და ეს შედეგების გამოქვეყნების შემდეგ იქნება შესაძლებელი. ხოლო, იმ ვარიანტში, სადაც შედარებით დაბალი შედეგები დაფიქსირდება, ქულათა გათანაბრების პრინციპით, აბიტურიენტებს ქულა მოემატებათ.
აღსანიშნავია, რომ შეფასებისა და გამოცდების ეროვნული ცენტრი ყველა საგნისათვის აქვეყნებს პროგრამას, რომელთა ცოდნაც აბიტურიენტებს გამოცდაზე მოეთხოვებათ.
mshoblebi.ge
