სოციალურ ქსელში ხშირად შეხვდებით სხვადასხვა ლოკაციაზე გადაღებულ ფოტო-ვიდეო მასალას, სადაც ნათლად ჩანს, თუ როგორაა გადავსებული ნაგვის ურნები. ურნაში ადგილი, რომ აღარ არის, მოსახლეობა ნაგავს ურნის გვერდით ტოვებს, რასაც შემდეგ მიუსაფარი ცხოველები აქეთ-იქით ფანტავენ.
ასეთივე მდგომარეობა იყო ორი დღის წინ ჩოხატაურის მუნიციპალიტეტის სოფელი ახალშენის ერთ-ერთ უბანში, სადაც ადრე ორი ურნა იდგა, ახლა კი, ერთი ცალიღაა შემორჩენილი, შემორჩენილი იმიტომ, რომ დაზიანებულია და საჭიროებს ახლით ჩანაცვლებას. ზაფხულია და დამსვენებლების რაოდენობის მატების შესაბამისად, იმატა ურნაში ნაგვის რაოდენობამაც. ამ უბანში, როგორც უბნის მცხოვრებლები ამბობენ, ზუსტად არავინ იცის, რა განრიგით დადის მანქანა ნაგვის გასატანად (კვირაში ერთხელ თუ 2 კვირაში ერთხელ ან უფრო ხშირად).
აღნიშნული უბნის მცხოვრებლებისვე თქმით, ცოტა ხნის წინ, მინიმუმ, ორი დღე მაინც იყო ნაგვის ურნა სავსე და ნაგავი გზაზე გაფანტული ძაღლების მიერ.
აღნიშნულ პრობლემასთან დაკავშირებით “გურია ნიუსი” მუნიციპალიტეტის მერს, დავით შარაშიძეს დაუკავშირდა, რომელმაც ჩოხატაურის სერვის ჯგუფის ხელმძღვანელთან თემურ კოროშინაძესთან გადაგვამისამართა:
_ ბატონო თემურ, სოფლის სხვადასხვა უბნებში ნაგვის მანქანა რა სიხშირით დადის და თითო უბანზე რამდენი ნაგვის ურნაა გამოყოფილი? დაბაში ძველი ურნები ახლით ჩანაცვლდა და სოფლის უბნებში რატომ არა? უბნებში, ხშირ შემთხვევაში, ერთი ურნა დგას, რომელიც, უმეტესად, განსაკუთრებით ზაფხულში, გადავსებულია ნაგვით, _ ვკითხეთ კოროშინაძეს და ფაქტის ამსახველი ფოტოც მივაწოდეთ.
_ ჩვენ არ გვაქვს ურნების პრობლემა. უბრალოდ, ძალიან დიდი მოთხოვნაა ბახმაროში და ამის გამო ხდება შეფერხება. მუნიციპალიტეტის მერის წარმომადგენელთან მაქვს ამ საკითხზე საუბარი. საჭიროების შემთხვევაში, დამატებით ვუშვებ ნაგავმზიდს. რაც შეეხება თქვენ მიერ გამოგზავნილ ფოტოს, ყოფილა შემთხვევები, სხვებსაც გამოუგზავნიათ. გამიშვია თანამშრომლები და ურნა თავისუფალი იყო. მსგავს შემთხვევაში, თუ კიდევ შენიშნავთ იმავეს, მომმართეთ და მზად ვარ, ვითანამშრომლოთ.
სერვისჯგუფის ხელმძღვანელმა გვთხოვა, აგვეხსნა, კონკრეტულად რომელ უბანზე იყო საუბარი. ჩვენც, რა თქმა უნდა, მივაწოდეთ ზუსტი ლოკაცია, რის შემდეგაც ნაგავმზიდმა ურნა დაცალა.
ავტორი
