ლანჩხუთის წარმომადგენლობითი ორგანოს ბიუროს სხდომაზე წინასწარ ის საკითხები განიხილეს, რომელზეც 26 სექტემბრისთვის ჩანიშნულ საკრებულოს მორიგ სხდომაზე მოუწევთ მსჯელობა დეპუტატებს.
საკრებულოში მერიის მხრიდან წარმოდგენილი განმარტებითი ბარათის მიხედვით ირკვევა, რომ წლის მთავარ საფინანსო დოკუმენტში გასახორციელებელი ცვლილებებიდან გამომდინარე, ადმინისტრაციული წარმოების დაწყება იგეგმება. სხვა რიგ განსახილველ საკითხებთან ერთად, ბიუროს წევრებმა, ამ კუთხითაც მოისმინეს მერიის მხრიდან წარმოდგენილი განმარტებები.
მერიის განმარტებით, მთავრობის 22 აგვისტოს განკარგულებით, მილიონ 550 ათასი ლარით იზრდება მუნიციპალიტეტში გზების რეაბილიტაციისთვის გამოყოფილი თანხები. აქედან, აკეთის ადმინისტრაციულ ერთეულში სოფელ შუხუთიდან სოფელ გაგურის ცენტრამდე გზის რეაბილიტაციისთვის, რომლის ჯამური ღირებულება 4 108 888 ლარით იყო განსაზღვრული, დამატებით 300 001 ლარი მიიმართება. ამ თანხიდან 285 ათას ლარს _ რეგფონდი, ხოლო ადგილობრივი ბიუჯეტი _15 001 ლარს გაიღებს.
მთავრობისვე განკარგულებით, მზარდია მუნიციპალიტეტის შიდა სასოფლო გზების რეაბილიტაციისთვის გამოყოფილი თანხაც. ამ კუთხით 869 800 ლარიანი მატება განსაზღვრული _ 826 310 ლარი რეგფონდის ხარჯზე, ხოლო ადგილობრივი ბიუჯეტი 43 490 ლარს დააფინანსებს.
ბიუჯეტში დაგეგმილი აღნიშნული ცვლილების შესაბამისად, ჩიბათის ადმინისტრაციულ ერთეულში, სოფელ ჭალაში გზის რეაბილიტაციისთვის რეგფონდის თანხიდან 35229 ლარი უნდა მიიმართოს, ხოლო ადგილობრივი ბიუჯეტიდან _ 1 855 ლარი.
ირკვევა, რომ თუ წლის დასაწყისისთვის რეგფონდის დაფინანსებით ქალაქის ტერიტორიაზე სამი ქუჩის რეაბილიტაცია იყო დაგეგმილი, კერძოდ, ნინოშვილის ქუჩის შესახვევი, ნუგზარ ურუშაძის და წერეთლის ქუჩები და რისთვისაც 570 ათასი ლარის გახარჯვა იგეგმებოდა, ახლა ეს მაჩვენებელი 424 696 ლარით იზრდება და შესაბამისად, იზრდება ქუჩების რაოდენობაც.
როგორც მერიის ინფრასტრუქტურის სამსახურის უფროსის მოვალეობის შემსრულებელმა ალეკო კირვალიძემ გვითხრა, მიმდინარე წელს ქალაქში რეაბილიტაციას ექვემდებარება: მშვიდობის, ხომერიკის, ურუშაძის, ვაჟა ფშაველას, წერეთლის, ჭანტურიას, ნათლისმცემლისა და გორგასლის ქუჩები.
ბიუჯეტში გასახორციელებელ ცვლილებებთან დაკავშირებული საკითხი ბიუროს წევრებს მერიის საფინანსო სამსახურის უფროსმა, როლანდ ლაშხიამ წარუდგინა და იქვე განმარტა, რომ “აღნიშნული ღონისძიებების ბიუჯეტში ასახვის მიზნით, მიზანშეწონილია, დაიწყოს ბიუჯეტის ცვლილებაზე ადმინისტრაციული წარმოება”.
ავტორი
