გუშინ, „ნაპოლის“ ყოფილმა ფეხბურთელმა სტეფან სვოჩმა განაცხადა, რომ ნეაპოლურმა კლუბმა ხვიჩა კვარაცხელიასა და ვიქტორ ოსიმენთან კონტრაქტების საკითხი სწრაფად უნდა მოაგვაროს, რათა მათ მხოლოდ თამაშზე იფიქრონ.
„მინდა, რაც შეიძლება მალე დაზუსტდეს კვარას და ოსიმენის კონტრაქტების საკითხი, რადგან ამ გაურკვევლობამ შეიძლება მათზე მენტალურად იმოქმედოს. ეს ასევე ეხება ჟიელინსკის, რომელიც იმსახურებს ახალ კონტრაქტს“, – განაცხადა სტეფან სვოჩმა.
„ნაპოლის“ ნახევარმცველის, პიოტრ ზელინსკის მომავალი კვლავ ბუნდოვანია. პოლონელმა გასულ ზაფხულს საუდის არაბეთიდან შესანიშნავი შეთავაზება იუარა და თავისი მომავალი ევროპულ ფეხბურთს დაუკავშირა, თუმცა ნეაპოლელებთან მისი კონტრაქტი 2024 წლის ივლისში იწურება.
გამოცემა „Il Mattino“-ს მტკიცებით, ნეაპოლური კლუბის პრეზიდენტმა აურელიო დე ლაურენტისმა პოლონელს აცნობა, რომ თუ გუნდის გამოცვლა არ სურს, ხელფასის შემცირებას უნდა დათანხმდეს.
ჯერჯერობით უცნობია, დათანხმდება თუ არა ლაურენტისის შეთავაზებას 29 წლის ნახევარმცველი. ამჟამად ზელინსკი წელიწადში 3.5 მილიონ ევროს გამოიმუშავებს.
ამსტერდამის „აიაქსში“ გადასულ გიორგი მიქაუტაძეს კი სათამაშო პრაქტიკა ისევ არ აქვს. ნიდერლანდურმა კლუბმა ევროპალიგის ჯგუფური ეტაპის მეორე ტურში სტუმრად ათენის „აეკ“-თან ქულა მოიპოვა – 1:1. 22 წლის ქართველმა თავდამსხმელი ისევ ისევ სათადარიგოთა სკამზე იმყოფებოდა.
„აეკ“-თან თამაშის შემდეგ გამართულ პრესკონფერენციაზე „აიაქსის“ მთავარმა მწვრთნელმა მორის სტეინმა ქართველის შესახებაც ისაუბრა. სპეციალისტს ჰკითხეს, რატომ ამჯობინა მიქაუტაძეს ჩუბა აკპომი, რომელიც მოედანზე ცვლილებაზე 73-ე წუთზე შეუშვა.
„აკპომს ცოტა უფრო მეტი სისწრაფე აქვს და ფიზიკურადად უკეთეს ფორმაშია. მოედანზე ფიზიკური ბრძოლა იყო და გადაწყვეტილებაც ამან განაპირობა. მიქაუტაძეც სულ უფრო კარგად წარმოაჩენს თავს, მაგრამ ადგილი მან ჯერ უნდა დაიმსახუროს. „ვალვაიკთან“ შეხვედრაში მსურდა მისი მოედანზე შეშვება, მაგრამ შემდეგ თამაში შეწყდა (მასპინძელთა მეკარის მძიმე ტრავმის გამო). ის განსაკუთრებით კარგი ისეთ თამაშშია, სადაც სივრცეები შეზღუდულია, ამჯერად კი ჩვენ მეტი სისწრაფე გვჭირდებოდა“, – განაცხადა მორის სტეინმა.
სომხურ „ალაშკერტში“ მოთამაშე ლევან კუტალია ტაილანდის ნაკრებთან ამხანაგური მატჩისა (12 ოქტომბერი) და კვიპროსთან შესარჩევი დაპირისპირების (15 ოქტომბერი) წინ გამოქვეყნებულ 24-კაციან სანაკრებო სიას სოციალურ ქსელში გამოეხმაურა.
„გამარჯობა მეგობრებო. მინდა, გამოვეხმაურო სანაკრებო სიას, გულდაწყვეტილი ვარ ისევ. ამდენი წელია ველოდები, რომ ვიღაც, სადღაც დაინახავს, თუ რამდენ შრომასა და მონდომებას ვდებ, არ ვჩერდები, ვთამაშობ, გამაქვს გოლები სხვადასვა ჩემპიონატში. რომ, აი, ერთ დღეს, ვიღაც შემომხედავს და დააფასებს ჩემს შრომას მაგრამ უშედეგოდ. კვლავ უყურადღებობა,იგნორირება. რისთვის გინდა ფეხბურთელს კარიერა? – იმისთვის, რომ ერთხელ მაინც, შენი ქვეყნის მაისური ჩაიცვა. ეს სიამაყეა, როდესაც შენი ქვეყნისთვის უნდა გაისარჯო. მაგრამ ისევ იგნორი. დრო გარბის და მეც მაქვს ძალიან სამართლიანი კითხვა – რატომ არ შეიძლება გამომიძახონ თუნდაც ამხანაგურ მატჩში? ვფიქრობ, რომ უსამართლოა ეს დამოკიდებულება და გადაწყვეტილება ჩემს მიმართ რასაც აკეთებენ. არცერთ სხვა ქვეყანაში ეს არ მოხდებოდა, ხშირად მესმის სანიოლისგან, რომ ის ვიღაცებს აკვირდება, რომ თუ მოუმატებენ, არ გამორიცხავს მათ კანდიდატურას და მე?
იცის ჩემი არსებობის შესახებ? ვიცი, რომ მედიამ ბევრჯერ დაუსვა კითხვა ჩემს შესახებაც, მაგრამ ბოლოს უთქვამს, გამოუძახებელ ფეხბურთელებზე კომენტარს არ გავაკეთებო! რატომ? მაქვს კითხვა – რატომ არ დაიმსახურა ლევან კუტალიამ, თუნდაც ერთხელ, სიაში მოხვედრა?!
მინდა, წარმატებები ვუსურვო ბიჭებს ამ თამაშებში“.
ლევან კუტალიას „ალაშკერტი“ სომხეთის ჩემპიონატში 22 ქულით მე-4 პოზიციაზეა, ხოლო 34 წლის ქართველ თავდამსხმელს 11 მატჩში 10 გოლი აქვს გატანილი და ბომბარდირთა სიას ლიდერობს.
ავტორი
