დღეს, ჩემპიონთა ლიგის მესამე ტურში „ნაპოლი“ სტუმრად „უნიონ“ ბერლინს დაუპირისპირდება, რომელიც ამ ტურნირის დებიუტანტია.
გუშინ, ბერლინელთა მთავარმა მწვრთნელმა ურს ფიშერმა პრესკონფერენცია გამართა და იტალიური გუნდიდან ხვიჩა კვარაცხელია გამოარჩია:
„იტალიის ჩემპიონს ვეთამაშებით და თავდაჯერება გვჭირდება, მაგრამ ბოლო პერიოდის შედეგები ამ თვალსაზრისით არ გვეხმარება. მიუხედავად ამისა, ოპტიმისტურად უნდა ვიყოთ განწყობილი. არ ვიცი, „ნაპოლი“ კრიზისშია თუ არა, ამ ბოლო დროს ჩემპიონატში გუნდმა შედეგები გამოასწორა, ამიტომ არ მგონია, რომ საქმე კრიზისთან გვქონდეს. ვიცი, რომ ჩვენს მსგავსად მათაც აკლიათ რამდენიმე ფეხბურთელი, ოსიმენი, ანგისა და ცენტრალური მცველი, მაგრამ „ნაპოლი“ ძლიერი გუნდია და ყველა რგოლში სახიფათოა. ფლანგებზე ჰყავს კვარაცხელია და პოლიტანო, რომლებიც ერთი-ერთზე ძალიან სახიფათო ფეხბურთელები არიან. რთული თამაში გველოდება. ლობოტკას, რაც შეიძლება ნაკლებად უნდა მივცეთ ბურთთან შეხების საშუალება, მაგრამ განსაკუთრებული ხაფანგის მომზადებას მის წინააღმდეგ არ ვაპირებთ, რადგან შეცდომა იქნება, მხოლოდ მასზე ყურადღების გამახვილება. „ნაპოლის“ სხვა ძლიერი ფეხბურთელებიც ჰყავს. მაგალითად, პოლიტანო, კვარაცხელია, რასპადორი. გუნდში ბევრი ვისაუბრეთ „ნაპოლის“ შემტევ ტრიოზე, რადგან ისინი ძალიან სახიფათოები არიან”.
ამავე პრესკონფერენციაზე ასევე ისაუბრა „უნიონ ბერლინის“ ფეხბურთელმა რანი ხედირამ.
„რა თქმა უნდა, კვარაცხელია ძალიან კარგი ფეხბურთელია, კვარადონას შემთხვევით არ ეძახიან. ოსიმენთანაც მშვენიერ ტანდემს ქმნის, მიუხედავად იმისა, რომ ოსიმენი ხვალ ვერ ითამაშებს, ნეაპოლელთა შეტევა ძნელად მოსაგერიებელი იქნება.
კვარაცხელიამ წინა სეზონში იტალიის ჩემპიონობაში გადამწყვეტი წვლილიც შეიტანა და რასაკვირველია, ჩემთვის მისი შეჩერება რთული იქნება, მაგრამ გუნდურად უნდა დავიცვათ თავი, ნაკლები სივრცე დავუტოვოთ და როცა იძულებული ვიქნებით, ორმაგი მეურვეობითაც უნდა ვითამაშოთ. არა მხოლოდ დაცვაზე უნდა ვიფიქროთ, არამედ შეტევაზე და მეტოქისთვის პრობლემების შექმნაზე“, – თქვა ხედირამ.
„უნიონ ბერლინისა“ და „ნაპოლის“ მატჩი დღეს, თბილისის დროით 23:00 საათზე დაიწყება.
გუშინ, იტალიურმა გამოცემამ „Gazzetta Dello Sport“ ხვიჩა კვარაცხელიაზე დიდი სტატია გამოაქვეყნა.
„არსებობს ადგილები, რომლებიც ჯადოსნურია და წარუშლელ მოგონებებს ტოვებს. ხვიჩა კვარაცხელიასთვის ერთ-ერთი ასეთი ადგილია ვერონა. აქ მისი დებიუტი შედგა 2022 წლის აგვისტოში. „ვერონას“ წინააღმდეგ მან გოლი გაიტანა თავით და ჯადოსნური საგოლე პასი გაუკეთა ჟიელინსკის. გოლი აღნიშნა მისი კუმირის, სტეფ კარის სტილში, თითქოს ყველას დაძინებისკენ მოუწოდა. ამჯერად ვერონაში კვარამ მეტი გააკეთა, თუნდაც იმიტომ, რომ იტალიაში პირველ წელს ყველა მოხიბლა და MVP გახდა, ახლა მას მხოლოდ ზრდის უფლება აქვს, რათა თავისი ლურჯი ზღაპარი გააგრძელოს.
კვარასგან აღარ იღებენ „ჩვეულებრივ“ თამაშს, ეს მისთვის დამახასიათებელი აღარ არის. გულშემატკივრები ყოველთვის ელიან გენიალურ მოქმედებებს, ინტუიციურ თამაშს, მეტოქეებისადმი უპატივცემულო დრიბლინგებს. ვერონაში ხვიჩამ კვარა-მაგიას ფხვნილი გაისროლა მოედანზე და სცენა მთავარი გმირი იყო. დუბლი ფიზიკისა და ნიჭის წყალობით, ახალ სტილში აღნიშნული გოლები, რომელთაგანაც პირველი „ვერონას“ ფეხბურთელებმა და ტიფოზებმა პროვოკაციად აღიქვეს. კვარადონა დაბრუნდა, „ნაპოლისთვის“ და გარსიასთვის ყველაზე მნიშვნელოვან დღეს. ასევე, ოსიმენის გარეშე არაფერია უმნიშვნელო: საჭირო იყო ლიდერი, ვინც თანაგუნდელებს გაუძღვებოდა წარმატებისკენ. ნამდვილი კვარა იყო საჭირო და „ნაპოლის“ ახლა ისევ დაუბრუნდა იმედი.
კვარას მეორე დუბლი იტალიაში და პირველი სეზონში, ასევე პირველი „სტადიო მარადონას“ მიღმა. გოლები მან თავის სტილში გაიტანა, დამანგრეველი ფიზიკური ძალის, ტექნიკისა და სისწრაფის ნაზავით. დაუმიზნა მეტოქეს, მოატყუა და დარტყმით აჯობა მეკარეს. ძველი კვარას ციმციმები იმ დღეს, როცა ძველი „ნაპოლის“ ციმციმებიც გამოჩნდა, სპალეტის „ნაპოლის“ სტილის თამაში. გარსიას ნუ ეწყინება, რადგან როდესაც „ნაპოლი“ ასე თამაშობს, მის წინააღმდეგ ყველას გაუჭირდება.
მხოლოდ ოსიმენის არყოფნა ვერ იქნება საკმარისი დამოკიდებულების ცვლილების ასახსნელად და არც თამაშის მართვის განახლებული სურვილი. თუმცა, შემთხვევითი არ არის, რომ კვარა „ნაპოლის“ ცენტრალურ ზონაში დაბრუნდა. ახლა, როდესაც მისი მდგომარეობა ტოპ-დონეს უახლოვდება, მისი თამაში ისევ ბრწყინვალეა. ფინტები, გადახრები, თამაშის ცვლილება და გოლები: გუნდსა და ნაკრებში ბოლო 7 მატჩში მან 8 გოლში მიიღო მონაწილეობა და დომინანტი კვარა დაბრუნდა. თუ არის ერთი ფეხბურთელი, ვისაც „ნაპოლის“ ამ ქაოსური სეზონის სტარტის განათება და გაფერადება შეუძლია, ეს კვარაა, ვინაიდან ფიზიკურ ფორმას შეიძლება ახასიათებდეს აღმასვლა და ჩავარდნა, მაგრამ ნიჭი არ იკარგება. „ნაპოლიმ“ თავისი ხელოვანი კვლავ დაიბრუნა“, -დაწერა გამოცემამ.
ავტორი
