გუშინ, საქართველოსა და შოტლანდიის მატჩს ნეაპოლური გამოცემა Area Napoli გამოეხმაურა და ყურადღება ხვიჩა კვარაცხელიას ფაქტორზე გაამახვილა.
„კვარაცხელია საქართველო-შოტლანდიის მატჩის აბსოლუტური გმირი იყო. „ნაპოლის“ ფეხბურთელმა დუბლი შეასრულა და შესანიშნავი მატჩი ჩაატარა მეორე ფორვარდისა და გიორგი მიქაუტაძის დამხმარის როლში. დაცვის დროს 5-4-1 სქემა იყო, შეტევისას 3-5-2 და კვარაცხელია განსხვავებულ პოზიციაზე მოქმედებდა, ვიდრე „ნაპოლიში“. ხვიჩას სტატისტიკა ეროვნულ ნაკრებში მნიშვნელოვან გავლენაზე მეტყველებს. ამან შეიძლება „ნაპოლის“ სამწვრთნელო შტაბი აიძულოს სერიოზულად განიხილოს მისთვის პოზიციის შეცვლის ვარიანტი, ინდივიდუალური და კოლექტიური თამაშის გაუმჯობესების იმედით.
ვალტერ მაძარი ყურადღებით ადევნებდა თვალს ქართველის თამაშს და მის მოძრაობებს აუცილებლად გაითვალისწინებს. ახალ სქემაზე გადასვლა ყოველთვის შეიცავს რისკებს, მაგრამ ეს შეიძლება იყოს კვარაცხელიას შესაძლებლობების სრულად ათვისების და „ნაპოლის“ სატურნირო ცხრილის გაუმჯობესების გასაღები. გასარკვევია, რეალურად მიიღებს თუ არა მაძარი ამ გადაწყვეტილებას სანაკრებო პაუზაზე და როგორ იმოქმედებს ეს „ნაპოლის“ სეზონის მსვლელობაზე“, – დაწერა Area გამოცემამ.
ხვიჩა კვარაცხელია შეაქო შოტლანდიის ნაკრების მთავარმა მწვრთნელმა სტივ კლარკმაც.
„ხვიჩა კვარაცხელიამ მაგარი გოლები გაიტანა და მაღალი დონის ფეხბურთელია.
კვარაცხელიას სახით ჯადოსნური ფეხბურთელი გყავთ, ვილი სანიოლიც კარგი მწვრთნელია, შესაბამისად, ამ გუნდის წინააღმდეგ თამაში რთულია“, – განაცხადა სტივ კლარკმა.
ხვიჩა კვარაცხელია კი საქართველოს ნაკრების ყველა დროის ბომბარდირობისკენ დიდი ტემპით მიიწევს. მიუხედავად იმისა, რომ ჯერ შოთა არველაძის რეკორდამდე მაინც შორია, კვარაცხელიას ამ რეკორდის მოხსნა უახლოეს წლებში ნამდვილად შეუძლია.
შოტლანდიასთან დუბლით ხვიჩა უკვე მეოთხე ადგილზე გადავიდა. მას 27 სანაკრებო შეხვედრაში 14 გოლი აქვს გატანილი და გადაასწრო, როგორც ვაკო ყაზაიშვილს, ისე თორნიკე ოქრიაშვილს. წინ მხოლოდ შოთა არველაძე (26), თემურ ქეცბაია (17) და ალექსანდრე იაშვილი (15) არიან.
კვარაცხელიას ეროვნულ ნაკრებში დებიუტი 2020 წელს ჰქონდა. მას საქართველოს ნაკრებში თამაშში საშუალოდ 0.52 გოლი გააქვს, ყველა დროის ბომბარდირის, შოთა არველაძის მაჩვენებელი ამ მხრივ 0.43-ია.
„ნაპოლის“ ახალი მთავარი მწვრთნელი ვალტერ მაცარი კი გუშინ ვიქტორ ოსიმენს ესაუბრა და უთხრა, რომ ახალი გუნდის აწყობას მის გარშემო გეგმავს.
ნიგერიელმა 61 წლის სპეციალისტს განუცხადა, რომ ძალიან მოტივირებულია და მოედანზე დაბრუნებას მოუთმენლად ელოდება.
„მაცარის ოსიმენთან ხანგრძლივი საუბარი ჰქონდა. ნიგერიელი სპორტდარბაზში ვარჯიშობს და დიდი ალბათობით, „სერია A“-ს მომდევნო ტურში „ატალანტასთან“ გასამართ მატჩში ძირითად შემადგენლობაში ვიხილავთ.
მწვრთნელი მისი ფიზიკური კონდიციებით დაინტერესდა და აუხსნა, რომ ახალი გუნდის აწყობას მის გარშემო გეგმავს, ნიგერიელმა მწვრთნელს ნდობისთვის მადლობა გადაუხადა და უთხრა,რომ მოედანზე დაბრუნებას მოუთმენლად ელოდება”, – დაიწერა იტალიურ მასმედიაში.
ევროპის 2024 წლის ჩემპიონატის საკვალიფიკაციო ეტაპს საქართველოს ნაკრები 19 ნოემბერს, ვალიადოლიდში, ესპანეთის ნაკრებთან მატჩით დაასრულებს.
უეფას გადაწყვეტილებით ამ შეხვედრაზე რუმინელი მსაჯები იმუშავებენ. მთავარი არბიტრი ოვიდიუ ჰაცეგანი იქნება, რომელსაც საქართველოს ნაკრების თამაშზე მუშაობის გამოცდილება აქვს.
ჰაცეგანმა იმსაჯა 2015 წლის 4 სექტემბერს, თბილისში, საქართველოსა და შოტლანდიის მატჩი, რომელიც ვაკო ყაზაიშვილის გოლით მასპინძლებმა მოიგეს.
ავტორი
