გამოცემა Sky Sport-ის სატრანსფერო ექსპერტმა ლუკა მარკეტიმ ხვიჩა კვარაცხელიას კონტრაქტის განახლების საკითხზე ისაუბრა.
„ჩემი აზრით, კონტრაქტის განახლება ადრეც მომწიფებული იყო, ამ საკითხზე განცდები დადებითია, მაგრამ ასევე იყო ზაფხულში ჟიელინსკის და ოსიმენის კონტრაქტებზეც, მაგრამ მოლაპარაკებები ჯერაც არ დასრულებულა. კონტრაქტის განახლების საკითხი წარმოადგენს პრობლემას, რომელიც დე ლაურენტისმა აუცილებლად უნდა გადაჭრას, რათა თავიდან აიცილოს მტკივნეული საკითხების მომატება“, – განაცხადა ლუკა მარკეტიმ.
ხვიჩა კვარაცხელიას ნეაპოლურ კლუბთან ხელსეკრულება 2027 წლამდე აკავშირებს და სეზონში 1.2 მილიონ ევროს გამოიმუშავებს.
გამოცემა Kiss Kiss Napoli-ს დირექტორმა ვალტერ დე მაჯომ კი განაცხადა, რომ ხვიჩა კვარაცხელია თუ „ნაპოლის“ დატოვებს, სურს მადრიდის „რეალში“ იხილოს.
„წავიკითხე კვარაცხელიას მიმართ „ჩელსის“ ინტერესის შესახებ, მაგრამ თუ ერთ დღეს კვარაცხელია „ნაპოლის“ დატოვებს, ვისურვებდი მადრიდის „რეალში“ მენახა“, – თქვა დე მაჯომ.
ვეტერანმა ფეხბურთელმა დარიო მარკოლინმა „ატალანტასა“ და „ნაპოლის“ შეხვედრაზე ისაუბრა:
„მაძარის ხელში ველოდები უფრო ცენტრალიზებულ ლობოტკას, როგორც სპალეტის დროს იყო, რომელიც ბურთს უფრო ხშირად შეეხება. ის იქნება „ნაპოლის“ თამაშის საყრდენი წერტილი. ვინც ინდივიდუალურ დუელებს უფრო მეტად მოიგებს, მატჩსაც ის მოიგებს. სკალვინი ძლიერი მოთამაშეა, ფაკეტის მაგონებს, მაგრამ კვარაცხელიას წინააღმდეგ მოედნის ყველა ნაწილში მოქმედება შეიძლება ძალიან გაუჭირდეს“, – განაცხადა დარიო მარკოლინმა.
„ატალანტასა“ და „ნაპოლის“ მატჩი დღეს, თბილისის დროით 21:00 საათზე გაიმართება.
თორნიკე შენგელიას „ვირტუს ბოლონიამ“ ევროლიგის მეათე ტურში თურქულ „ფენერბაჰჩეს“ უმასპინძლა და მეტოქეს სძლია – 87:79.
თორნიკე შენგელიამ მოედანზე 28:57 წუთი გაატარა, რა დროშიც 15 ქულა, 8 მოხსნა და 5 პასი დააგროვა. შენგელიამ 8-დან 5 ორქულიანი, 3-დან ერთი სამქულიანი და 2-დან 2 საჯარიმო ჩააგდო. სტუმრებს ჯონათან მოტლიმ ულიდერა, მან მეტოქეს 25 ქულა ჩაუგდო.
იტალიურ გუნდს ევროლიგის მიმდინარე სეზონში 7 მოგება და 3 მარცხი აქვს, რითიც მესამე ადგილზეა.
ბრაზილიის საფეხბურთო ნაკრებს კი შესაძლოა, ქულები ჩამოაკლონ მსოფლიოს 2026 წლის საკვალიფიკაციო ციკლში. ამისი მიზეზი ის არეულობაა, რომელიც არგენტინასთან შესარჩევ მატჩში მოხდა.
მეტოქეების თამაში „მარაკანაზე“ 27 წუთის დაგვიანებით დაიწყო, რასაც წინ ტრიბუნებზე ატეხილი აურზაური უძღოდა. ბრაზილიელ და არგენტინელ ფანებს შორის შეტაკება ჰიმნების შესრულების დროს დაიწყო, საქმეში კი პოლიცია ჩაერია, რომელმაც ბევრის აზრით გადამეტებული ძალა გამოიყენა.
ამ ამბავს ფიფას პრეზიდენტი ჯანი ინფანტინო გამოეხმაურა და მომხდარი დაგმო.
ახლა ფიფაში იმას განიხილავენ, როგორ დასაჯონ ბრაზილიის ფეხბურთის კონფედერაცია, რადგანაც რეგლამენტის თანახმად, ამგვარ შემთხვევებში პასუხს სწორედ მასპინძელი მხარე აგებს.
ყველაზე კარგ შემთხვევაში ბრაზილიელები ფულადი ჯარიმით გადარჩებიან, შემდეგ მოდის „მარაკანას“ დისკვალიფიკაცია და რამდენიმე მატჩის ცარიელი ტრიბუნების წინაშე ჩატარება ანაც ნეიტრალურ სარბიელზე თამაში.
ყველაზე მძიმე სასჯელი ქულების ჩამოკლება ან სულაც საკვალიფიკაციო ციკლიდან მოხსნაა.
ფიფას ვერდიქტის გამოსატანად ჯერ საკმარისი დრო აქვს, რადგანაც ბრაზილიელებს საკვალიფიკაციო ციკლში მომდევნო თამაში მხოლოდ გაისად სექტემბერში უწევთ.
ავტორი
