პარლამენტარი, „ქართული ოცნების“ ერთ-ერთი ლიდერი არჩილ თალაკვაძე „გურია ნიუსთან“ საუბრის დროს ამბობს, რომ დღევანდელ წინასაარჩევნო შეხვედრაზე, რომელიც ოზურგეთში გაიმართა, პარტიის ლიდერებმა ხალხს თავიანთი სათქმელი გადასცეს.
_ პირველ რიგში, მადლობა მინდა ვუთხრა ხალხს, საზოგადოებას, მოქალაქეებს მხარდაჭერისთვის.
ძალიან მნიშვნელოვანი საკითხები გააჟღერა ჩვენი პარტიის დამფუძნებელმა და ლიდერმა ბატონმა ბიძინა ივანიშვილმა. პირობას ვდებთ, რომ მაქსიმუმს გავაკეთებთ და ბოლომდე ვიბრძოლებთ ქვეყნის ინტერესების დასაცავად, რომ საქართველოს ჰქონდეს მშვიდობა, მეტი პროგრესი, მეტი კეთილდღეობა და ეს ყველაფერი გავაკეთოთ მშვიდობით, ღირსებით და რაც მთავარია, კეთილდღეობით შევიდეთ ევროპაში.
რაც შეეხება დღევანდელ შეხვედრას, ძალიან ბევრი ადამიანი მოვიდა ოზურგეთში. დარწმუნებული ვარ, რომ 26 ოქტომბერს საქართველო ჩაატარებს დემოკრატიულ და თავისუფალ არჩევნებს. ჩვენ გავიმარჯვებთ ღირსეულად და მომავალზეც ავიღებთ პასუხისმგებლობას ჩვენი მხარდამჭერების მეშვეობით.
_ სოციალურ ქსელში თქვენი ოპონენტები წერდნენ, რომ დღევანდელ შეხვედრაზე სხვა ქალაქებიდანაც ჩამოიყვანეთ ადამიანები…
_ კი, სხვა ქალაქებიდან _ ლანჩხუთიდან, ჩოხატაურიდან ნამდვილად იყვნენ ჩამოსულები. მთელი გურია იყო დღეს აქ შეკრებილი.
_ ბატონ არჩილ, აქ არ არის საუბარი გურიის ქალაქებზე…
_ ამ წყალწაღებულ ოპოზიციას მეტი სათქმელი არაფერი აქვს. მათ შეხვედრებზე ძალიან ცოტა ადამიანი დადის. ამდენ ხალხს რომ არაფრად თვლიან, ამის პასუხს ეს ხალხი 26 ოქტომბერს გასცემს.
_ ვრცელდება ინფორმაცია, რომ „ქართული ოცნების“ სიაში შეიძლება არ გიხილოთ. რამდენად შეესაბამება ეს ინფორმაცია სინამდვილეს?
_ არაერთხელ მითქვამს და ახლაც გავიმეორებ_ ვიქნები იქ, სადაც ყველაზე მეტად დავჭირდები ჩემს ქვეყანას. რაც შეეხება ჩვენს პარტიულ სიას, არ მინდა წინ გავუსწრო მოვლენებს _ სია უნდა წარადგინოს პარტიის ლიდერმა და შტაბის უფროსმა.
_ დღევანდელ შეხვედრაზე თქვენ არ მიგიმართავთ ტრიბუნიდან საზოგადოებისთვის. რატომ?
_ როგორც მცხეთაში და რაჭაში, აქაც იგივე ფორმატი იყო დაცული. კამპანიის ფარგლებში არა ერთი ფორმატი იქნება და აუცილებლად დაველაპარაკები ხალხს.
ავტორი
