“ახლა მიდის ჩემი ბულინგი _ ეს რა დავწერე!“

კოალიცია „ცვლილებებისთვის“ წარმომადგენელი ოზურგეთის მუნიციპალიტეტის #60/20 საარჩევნო უბანზე თიკო გობრონიძე ამბობს, რომ მას შემდეგ, რაც უბანზე, მისი თქმით, კომისიის წევრს, ამომრჩეველსა და “ქართული ოცნების“ წარმომადგენელს შორის კომუნიკაციის ფაქტი დააფიქსირა, მის მიმართ ბულინგი არ წყდება.

საქმე ეხება “გადაკოცნის გამო“ დაწერილ საჩივარს, რომელსაც მასობრივად ავრცელებენ სახელისუფლებო მედია და სოციალური ჯგუფები. გობრონიძე მიიჩნევს, რომ ამგვარი მინიშნებებით ამომრჩევლის ნების გამოხატვაზე გავლენის მოხდენას ჰქონდა ადგილი.

თიკო გობრონიძე: „ამის ინიციატორი არის „ქართული ოცნების“ წარმომადგენელი მარი ჩხიკვიშვილი. მე, როგორც ვიცი, მან მიაწოდა სამთავრობო მედიას ეს ინფორმაცია. დიახ, საარჩევნო უბანზე რეგისტრატორი გადაკოცნა ერთ-ერთმა ამომრჩეველმა. ამის შემდეგ, ამომრჩეველმა ჩაილაპარაკა, რომ მან იცოდა, ვინც უნდა გაეფერადებინა და მარი ჩხიკიშვილმა ჩაუკრა თვალი. აეღო ბიულეტენი, მიეცა ამ ადამიანს ხმა და მერე ენახა, როგორც ისინი ამბობენ, მისი დიდი ხნის უნახავი მეგობარი…

ახლა მიდის ჩემი ბულინგი, _ ეს რა დავწერე და არის ინტერნეტში ერთი ამბავი. მინდა ვთქვა, რომ ამ ბრძოლაში ბოლომდე ვიქნები და დღესაც გავდივარ აქციაზე“, _  გვითხრა თიკო გობრონიძემ.

მარიკა ჩხიკვიშვილის თქმით, ამ ამბავთან დაკავშირებით დაწერილ საჩივარს შესაბამისი უწყება განიხილავს:

„ეს ფაქტი მიანიშნებს იმაზე, რომ ოპოზიციას მეტი ფაქტები და არგუმენტები არ აქვთ. ადამიანმა გადაკოცნა თავისი მეგობარი და მიულოცა დაოჯახება. ეს არის კანონის დარღვევა?!” _ გვითხრა მარი ჩხიკვიშვილმა

ჩხიკვიშვილი ოზურგეთის მუნიციპალიტეტის საკრებულოში “ქართული ოცნების“ ფრაქციის თავმჯდომარეა და იგი, ამ უბანზე  “ქართული ოცნების“ წარმომადგენელი იყო.

ოზურგეთში, საარჩევნო უბანში გადაკოცნის ფაქტზე დაწერილ საჩივარს, საოლქო კომისია განიხილავს