ლანჩხუთის მუნიციპალიტეტის ახალი მოწვევის საკრებულო 32-წევრიანი იქნება და არსებული მონაცემებით, “ქართული ოცნების” გარდა, საკრებულოში “ძლიერი საქართველო _ ლელო“, “გახარია საქართველოსთვის” და “გირჩი” თითო–თითო წარმომადგენლით შევლენ. ცესკოს საბოლოო მონაცემები კი, მიმდინარე კვირაში გახდება ცნობილი.
საბოლოო შედეგების შეჯამებიდან 30 დღის ვადაში, კანონის შესაბამისად, ცენტრალური საარჩევნო კომისიის მიერ საკრებულოს ახალი წევრების უფლებამოსილების ცნობის შემდეგ, ძველი მოწვევის საკრებულო უფლებამოსილებას დაკარგავს. მანამდე კი, კულუარებში აქტიურად მიდის საუბარი, როგორ გადაინაწილებენ ახალი მოწვევის საკრებულოში თანამდებობებს მმართველი გუნდის წარმომადგენლები.
ცნობისთვის, ლანჩხუთის საკრებულოს 32 დეპუტატიდან “ქართულმა ოცნებამ” 17 მანდატი მაჟორიტარული წესით მიიღო, 12 _ პროპორციულით.
გავრცელებული ინფორმაციით, ახალი მოწვევის საკრებულოს თავმჯდომარის თანამდებობაზე “ოცნების” გუნდში ორ კანდიდატურას განიხილავენ _ მოქმედ თავმჯდომარეს ბესიკ ტაბიძეს და ვერიკო კვირკველიას, რომელიც ახლა მოადგილის პოსტს იკავებს.
ცნობისთვის, კვირკველიას თავმჯდომარეობაზე პრეტენზია წინა, 2021 წლის თვითმმართველობის არჩევნების შემდეგაც ჰქონდა, თუმცა, მაშინ ” ოცნებამ” არჩევანი ტაბიძის სასარგებლოდ გააკეთა. ამჯერად ვისზე გააკეთებს მმართველი პარტია არჩევანს, მას საბოლოოდ, ახალი საკრებულოს შეკრების შემდეგ ვიხილავთ.
რაც შეეხება მოადგილის თანამდებობებს, გავრცელებული ინფორმაციით, პოსტს შეინარჩუნებს გიორგი ჩახვაძე. მეტიც, ამბობენ, რომ მან შეიძლება პირველი მოადგილის თანამდებობაზეც გადაინაცვლოს.
რაც შეეხება მოქმედ პირველ მოადგილეს, ემზარ თევდორაძეს, იგი 4 ოქტომბრის არჩევნებში არ მონაწილეობდა, თუმცა, მის ნაცვლად აცანის მოსახლეობამ მაჟორიტარად მისი მეუღლე მაია ლომთაძე აირჩია, რომელიც წლებია, ლანჩხუთში პარლამენტარ ვასილ ჩიგოგიძის ბიუროს ხელმძღვანელია _ კულუარული ინფორმაციებით, საკრებულოში ლომთაძეს ერთ–ერთი კომისიის ხელმძღვანელობას ჩააბარებენ.
გავრცელებული ინფორმაციით, მოქმედი საკრებულოს წევრებიდან თანამდებობებს შეინარჩუნებენ საფინანსო-საბიუჯეტო კომისიის თავმჯდომარე ალექსანდრე მახათაძე, სოციალურ საკითხთა, განათლების, კულტურისა და ახალგაზრდულ საქმეთა კომისიის თავმჯდომარე კახა კვიტაიშვილი და ეკონომიკის, ქონების მართვისა და ბუნებრივი რესურსების საკითხთა კომისიის თავმჯდომარე ზაზა წულაძე.
საუბარია იმაზეც, რომ “ქართული ოცნების” ფრაქციას ისევ სუფსის მაჟორიტარი ია მოქია უხელმძღვანელებს. თუმცა, ზოგი არ გამორიცხავს მოქიას დაწინაურებას თავმჯდომარის მოადგილის პოსტზე.
რაც შეეხება საკრებულოს ოპოზიციონერ წევრებს, როგორც აღვნიშნეთ, მათ, ჯამში, სამი მანდატი ერგოთ და დიდი ალბათობით, ერთობლივ ფრაქციას შექმნიან.
ავტორი
