მისი თქმით, მათი ბრენდის გაძვირების მიზეზებს შორისაა, ადგილობრივი ნედლეულის ფასი, რაც ექსპორტზე მოთხოვნის ზრდამ განაპირობა, ასევე, თავად „რითეილის“ მიერ იმპორტირებული პროდუქცია.
„თხილის მიმართ მოთხოვნა ძალიან გაიზარდა, განსაკუთრებით ამ ბოლო წელს. 2025 წელს დაფიქსირდა საკმაოდ დიდი მაჩვენებელი. თუ თხილის გულის ღირებულება ადგილობრივ ბაზარზე დაახლოებით იყო 15-დან 18 ლარამდე (20 ლარზეც ადიოდა), დღეს თხილის გულის ფასი არის 33-დან 35 ლარამდე.
კითხვაზე, არათანაბარ კონკურენციაში ხარ იმპორტთან, „ქალაქურის“ დამფუძნებელმა უპასუხა:
„პირდაპირ გეუბნებით, რა თქმა უნდა. ქართული ბრენდის პროდუქცია, რომელიც შემაქვს ქსელში, პირობითად გადასახადი თუ უნდა გადავიხადო X რიცხვი, მას შეიძლება უფრო მეტი უჯდებოდეს [იმპორტი], მაგრამ ჩემით ბალანსდებოდეს ეს სხვაობა.
მე ბოლო 2 წლის განმავლობაში ფასი არ შემიცვლია. ფასი შევცვალეთ დეკემბრის პირველი რიცხვიდან. ჩირეულის სეგმენტში სადღაც 8-დან 12%-მდე და თხილეულის სეგმენტში 30-დან 40%-მდე.
თხილზე მოთხოვნა ექსპორტის მიმართულებით გაიზარდა. როგორც გითხარით, თხილის გულის საშუალოდ 20 ლარამდე იყო ადგილობრივ ბაზარზე (ანუ, ფერმერისგან რომ მიგვეღო ნაჭუჭიანი თხილი, გადაგვემუშავებინა, დაგვჯდომოდა 18-20 ლარი). ამ თხილის ფასი დღეს არის 33 ლარიდან 35 ლარამდე, მისი ხარისხისა და კალიბრაციის მიხედვით. ანუ, 50%-ით გაძვირდა თხილის ღირებულება, წინა წელთან მიმართებით“,- განაცხადა მურად ღოღაძემ.
ფასების შემსწავლელი დროებითი კომისია პარლამენტში გასულ კვირას შეიქმნა. კომისიის შემადგენლობაში 14 პირია, კვოტები კი ასე გადანაწილდა: „ქართული ოცნება“ – 7; „ხალხის ძალა“ – 3; „საქართველოსთვის – 3; ევროსოციალისტები“ – 1. კომისიის პირველი სხდომა კი, 11 თებერვალს გაიმართა. შეხვედრაში ადგილობრივი ხორცპროდუქტების, რძის პროდუქტების და კვერცხის მწარმოებელი კომპანიები მონაწილეობდნენ.
ცნობისთვის, 2026 წლის იანვრის დასაწყისში ფასებთან დაკავშირებით საკოორდინაციო სამუშაო კომისია მთავრობამაც შექმნა. პრემიერის ხელმძღვანელობით აღნიშნულმა კომისიამ შეხვედრები უკვე გამართა სააფთიაქო ქსელების და ფარმაცევტთა ასოციაციის წარმომადგენლებთან; ქართველ მწარმოებლებთან, რითეილ სექტორთან, სადისტრიბუციო კომპანიებისა და ნავთობკომპანიების წარმომადგენლებთან.
ამასთან, გამოითქვა მოსაზრება რომ კომისია მუშაობას სავარაუდოდ, აპრილის ბოლომდე დაასრულებს.
შეგახსენებთ, პრემიერ-მინისტრმა ირაკლი კობახიძემ 2025 წლის 24 დეკემბერს განაცხადა, რომ სურსათის ევროპულ და ქართულ ფასებს შორის დიდი სხვაობა განპირობებულია სადისტრიბუციო კომპანიებისა და მარკეტების მაღალი ფასნამატით, რაც საქართველოს საზღვრიდან დახლამდე საშუალოდ 86%-ს შეადგენს. 24 დეკემბერს კი სახელმწიფო უსაფრთხოების სამსახურში განაცხადეს, რომ სასურსათო ფასებთან დაკავშირებული საკითხის შესწავლას იწყებენ.
