რუსეთის მხრიდან უკრაინაში სრული მასშტაბით შეჭრის შემდეგ ჩადენილია სექსუალური ძალადობის სულ მცირე 1004 შემთხვევა.
ეს მონაცემი გამოაქვეყნა გაეროს ადამიანის უფლებების კომიტეტმა. რეალური რიცხვი შესაძლოა ბევრად დიდი იყოს, რადგან სადამკვირვებლო ჯგუფის წევრებს კონტაქტი ჰქონდათ მხოლოდ იმ დაზარალებულებთან, რომლებიც მზად იყვნენ თავიანთი გამოცდილება მოეყოლათ, და მხოლოდ იმ ტერიტორიებზე, რომლებსაც უკრაინა აკონტროლებს. სექსუალიზებული ძალადობის აღრიცხული შემთხვევებიდან 89 პროცენტი ჩაიდინეს რუსეთის სამხედროებმა და ძალოვანი უწყებების – ეფესბესა და სასჯელაღსრულების სისტემის – წარმომადგენლებმა. 11 პროცენტი მოდის უკრაინის სამხედრო მოსამსახურეებზე, უსაფრთხოების სამსახურის და პენიტენციური სისტემის თანამშრომლებზე. ძალადობის მსხვერპლნი იყვნენ მშვიდობიანი მოქალაქეებიც და სამხედრო ტყვეებიც.
“რადიო თავისუფლება”
