ა(ა)იპ “მერცხალის” საქმე _ სუს-მა „გურია ნიუსის“ სტატიის შესწავლა უკვე დაიწყო

ჩვენს მიერ გამოქვეყნებულ სტატიას „ნენა, ნენა…”: ყალბი ბეჭედი, არარსებულ ააიპ-ში გაცემული ხელფასები და “კანონდარღვევათა ბუკეტი” ოზურგეთში“ რეაგირება უკვე მოჰყვა _ სახელმწიფო უსაფრთხოების სამსახურმა ოპერატიული შესწავლა დაიწყო.

_ ოპერატიული საქმის ფარგლებში დაიწყო ფაქტის გადამოწმება. თუ გამოიკვეთება სისხლის სამართლის დანაშაულის ნიშნები, დაიწყება გამოძიება, _ აღნიშნა ჩვენთან საუბრისას სახელმწიფო უსაფრთხოების სამსახურის საზოგადოებასთან ურთიერთობის სამმართველოს უფროსმა ნინო გიორგობიანმა.

მკითხველს შევახსენებთ, რომ საქმე ოზურგეთის მერის მიერ არარსებული ა(ა)იპ-ის გენდირექტორად დანიშნული პირს _ მურთაზ აბაშიძეს, საჯარო რეესტრის მიერ შეწყვეტილი რეგისტრაციის პროცესს, ყალბი ბეჭედს და ბიუჯეტიდან უკანონოდ გადახდილი ათი ათასებს ეხება.

საუბარია საფეხბურთო კლუბ “მერცხალზე”, რომელიც საჯარო რეესტრის ამონაწერის თანახმად, არა ოზურგეთის მუნიციპალიტეტის, არამედ გასულ წელს გაუქმებული ქალაქ ოზურგეთის მუნიციპალიტეტის კლუბია და ამდენი ხანია ოზურგეთის მუნიციპალიტეტი გაუქმებული მუნიციპალიტეტის გუნდს აფინანსებს.

თუმცა, ეს დარღვევის ერთი ნაწილია _ გაცილებით მძიმეა სხვა ფაქტები.

ოზურგეთის მუნიციპალიტეტის მერი, კონსტანტინე შარაშენიძე 22 თებერვალს გამოსცემს #22 ბრძანებას, რომლის საფუძველზე მტკიცდება ოზურგეთის მუნიციპალიტეტის ს/კ “მერცხალის” წესდების ახალი რედაქცია, რომელიც ეგზავნება საჯარო რეესტრს რეგისტრაციის მიზნით; ამავე ბრძანებით, რეგისტრაციაზე უფლება ენიჭება ს. კ. “მერცხალის” დირექტორს მამია გოგუაძეს.

თუმცა, რეგისტრაციის გახორციელებამდე, 27 თებერვალს, ოზურგეთის მუნიციპალიტეტის მერის კონსტანტინე შარაშენიძის #806 ბრძანების თანახმად, არასამეწარმეო (არაკომერციული) იურიდიული პირის _ “ოზურგეთის მუნიციპალიტეტის საფეხბურთო კლუბ მერცხალის” გენერალურ დირექტორად ინიშნება მურთაზ აბაშიძე.

შარაშენიძის მიერ ბრძანებით დანიშნული, რეესტრში არგატარებული ა(ა)იპ-ის გენერალურ დირექტორი, 9 მარტს, მიდის საჯარო რეესტრში და შეაქვს განაცხადი სუბიექტის რეგისტრირებულ მონაცემებში ცვლილებების რეგისტრაციის შესახებ, საიდანაც 12 მარტს მოსდის პასუხი, რომ დოკუმენტებში ხარვეზია და მის აღმოსაფხვრელად ეძლევა 30 კალენდარული დღე. ხარვეზად რეესტრმა დირექტორის და გენერალური დირექტორის ფუნქციების გაუმიჯნაობა დაასახელა.

თუმცა, ხარვეზი საბოლოოდ მაინც არ აღმოფხვრილა და შესაბამისად, საჯარო რეესტრის ეროვნულმა სააგენტომ 12 აპრილს მიიღო გადაწყვეტილება წარმოების შეწყვეტის შესახებ. გასაჩივრების ვადა არც ამ შემთხვევაში გამოიყენეს.

ამის პარალელურად მურთაზ აბაშიძე ამზადებს ბეჭედს, რომელსაც აქვს ძველი, ქალაქ ოზურგეთის მუნიციპალიტეტის საფეხბურთო კლუბის ფუნქციონირების დროს მინიჭებული საიდენტიფიკაციო კოდი და ახალი სახელი _ “ოზურგეთის მუნიციპალიტეტის საფეხბურთო კლუბი “მერცხალი”. ეს მაშინ, როცა მსგავსი ა(ა)იპი არ არსებობს.

ამის შემდეგ, აბაშიძე კლუბში ნიშნავს 15 თანამშრომელს, პირადად აფორმებს მათთან ხელშეკრულებებს და როგორც კლუბის დირექტორი მამია გოგუაძე ამბობს, აიძულებს მას, გასცეს ხელფასები.

ასევე, არსებობს “მერცხალის” თანამშრომელთა საერთო კრების ოქმი, რომლის თანახმადაც, მურთაზ აბაშიძე მთავარი მწვრთნელის პოსტზე ნიშნავს აკაკი ათუაშვილს, ხოლო გუნდის უფროსად _ შოთა გიორგაძეს (ასეთი სახის დოკუმენტი მურთაზ აბაშიძეს აჭარის ფეხბურთის ფედერაციაშიც აქვს გაგზავნილი).

ეს იმ დროს, როცა გუნდს ჰყავს მთავარი მწვრთნელი _ ხარიტონ ჩხატარაშვილი, რომელიც მხოლოდ სიტყვიერად გაათავისუფლეს და რომელიც, როგორც მთავარი მწვრთნელი, თვეებია, ანაზღაურებას იღებს.

კიდევ ერთი დეტალი _ 3 აგვისტოს, მერიის იურიდიული სამსახურის უფროსი, ლაშა თავაძე მამია გოგუაძეს აბარებს წესდებას და უზუსტებს, რომ ამით უნდა იხელმძღვანელონ. თუმცა, წესდება, რომელიც გოგუაძემ თავაძისგან ოფიციალურად ჩაიბარა, რეესტრში არ არის გატარებული.

ის, რომ კანონი დაარღვიეს, “გურია ნიუსთან“ საუბრისას არ დაუმალავს ოზურგეთის მერიის იურიდიული სამსახურის უფროსს ლაშა თავაძეს. ბეჭდის დამზადების და რეგისტრაციის პროცესის შეწყვეტის თაობაზე ინფორმაცია დაადასტურა მურთაზ აბაშიძემაც.

ერთადერთი ვინც თემაზე კომენტარი არ გააკეთა, კონსტანტინე შარაშენიძეა, რომელიც ჩვენ ზარებს არ პასუხობს. „გურია ნიუსის“ ინფორმაციით, მას სუს-ი ამ დღეებში დაკითხვას, რადგან უკვე გამოიკვეთა, რომ ამ საქმეში მისი უშუალო ჩართულობა და დანაშაულია.

როგორც ცნობილია, ოზურგეთის მერის წინააღმდეგ ორი სისხლის სამართლის საქმე უკვე აღძრულია: ერთი სიძისთვის გადარიცხულ 30 000 ლარს ეხება, რომელზეც გამოძიებას სახელმწიფო უსაფრთხოების სამსახური აწარმოებს.

აღსანიშნავია, რომ სუს-ის უფროსის მოადგილეს, გიორგი ლილუაშვილს შარაშენიძე საკუთარ მეგობრად ასახელებს _ ჩვენი წყარო ამბობს, რომ ოზურგეთის მერი პირად საუბრებში ყველგან აღნიშნავს, რომ ლილუაშვილი მას მფარველობს და რომ საშიში არაფერია, რადგან დაკითხვები, რომლებზეც, როგორც შარაშენიძე, ასევე, მისი თანამშრომლები თვეებია, დადიან, მხოლოდ ფორმალობაა.

ამ ინფორმაციას კატეგორიულად უარყოფენ სახელმწიფო უსაფრთხოების სამსახურში და ამბობენ, რომ მსგავს ფაქტს ადგილი არ აქვს.

ჩვენ შევეცადეთ ოზურგეთის მერის კომენტარიც მოგვეპოვებინა და გაგვეგო, რატომ სარგებლობს ის გიორგი ლილუაშვილის სახელით ბოროტად, თუმცა, მან ტრადიციას არ უღალატა და „გურია ნიუსის“ სატელეფონო ზარებს არ უპასუხა.

და რაც შეეხება მეორე საქმეს _ მას აჭარის პროკურატურა იძიებს და მასში ისევ მურთაზ აბაშიძე ფიგურირებს. როგორც ჩვენი წყარო ამბობს, საქმე ეხება აბაშიძისთვის ჩარიცხულ ფულს, რომელიც შარაშენიძემ აღსრულების ეროვნული ბიუროს წერილის საფუძველზე, წინა მერის დროს, უკანონოდ გათავისუფლებულ აბაშიძეს, ხელფასის განაცდურის სახელით ჩარიცხა. თუმცა, როგორც ირკვევა, ეს თანხა აბაშიძეს ბეგლარ სიორიძის მერობის დროსვე ჰქონდა მიღებული და ამის შემდეგ სააღსრულებლო პროცესი შეჩერებული იყო. სწორედ ამ გადარიცხვის კანონიერებას სწავლობს პროკურატურა და როგორც ჩვენი წყარო ამბობს, საქმე საკმაოდ მოცულობითია.

კონკრეტულად რას ედავებიან შარაშენიძეს, რატომ და რისი თანხა ჩაურიცხეს აბაშიძეს, ვინ მიმართა პროკურატურას და რა ეტაპზეა გამოძიება, ამის შესახებ „გურია ნიუსი“ უახლოეს მომავალში გიამბობთ.

ამავე თემაზე: “გურია ნიუსის” რესპონდენტის, უკიდურეს სიღატაკეში მყოფი თამუნა ჩხაიძის სახლის მშენებლობა დაიწყო