“აქცენტები გავაკეთოთ სასარგებლო და არა ტოქსიკურ საწარმოებზე”

ოზურგეთის მუნიციპალიტეტის საკრებულოში დაიწყო და გრძელდება საკრებულოს წევრების მიერ 2020 წელს გაწეული საქმიანობის შესახებ ანგარიშის მოსმენა.

მართალია, გასულ წლებში ანგარიშების ჩაბარება უფრო ვრცელი და მრავალმხრივი იყო, თუმცა, როგორც საკრებულოს აპარატის წარმომადგენლები გვეუბნებიან, პანდემიამ ყველა მიმართულებას დაატყო თავისი კვალი. მიუხედავად ამისა, ოზურგეთის საკრებულო, სხვა მუნიციპალიტეტებთან შედარებით, მაინც კარგად ახერხებს ამომრჩევლისთვის ანგარიშის ჩაბარებას.

5 თებერვალს მოისმინეს ფრაქციის _ “მშრომელთა და ხელმოკლეთა ინტერესებისთვის” წევრების გაწეული მუშაობის ანგარიში, რომელიც პირდაპირი ეთერით გადაიცემოდა.

ამ ფრაქციაში ოპოზიციური პარტიების წარმომადგენლები არიან გაერთიანებული და მათი მოსმენა საყურადღებო იყო.

საკრებულოს თავმჯდომარემ, დავით დარჩიამ მოსმენის დაწყებამდე, მოკლედ ისაუბრა ფრაქციის ლეიბორისტი წევრის დავით მამალაძის შესახებ:

_ ის ჩვენი საკრებულოს აქტიური წევრია. მთელი წლის განმავლობაში, ყველა სხდომას ესწრება და ჩართულია ყველა პრობლემური საკითხის გადაჭრაში. ახლა კი ანგარიშს წარმოგიდგენთ, _ თქვა მან.

დავით მამალაძემ, თავის მხრივ, მადლობა გადაუხადა საკრებულოს თავმჯდომარეს და ჩვეული რიტორიკით დაიწყო ანგარიშის წარდგენა:

_ ჩვენ პოსტსაარჩევნო პირობებში ვმუშაობდით. გაყალბებული არჩევნების შემდეგ, ცოტა გაბრაზებულიც კი ვიყავი, თუმცა, მერე ვიფიქრე, რომ ისინი, ჩვენი მუნიციპალიტეტის მცხოვრებლები, ჩვენი ახლობელი ადამიანები არიან და ვისაც დანაშაული არ მიუძღვის არჩევნების გაყალბებაში, საბოლოოდ, ნავსაყუდელს იპოვის ჩვენს პარტიაში, _ ლეიბორისტულ პარტიაში გაწევრიანება უწინასწარმეტყველა მან ოზურგეთის საკრებულოს წევრებს.

მამალაძემ ისაუბრა სხვადასხვა სახის პრობლემის შესახებ, რომელთა ირგვლივ აქტიურად მონაწილეობდა საკრებულოს სხდომების მსვლელობისას თუ მოსახლეობასთან შეხვედრისას. მან, ასევე, ისაუბრა მცირე ჰესების მშენებლობის, ქვიშა-ხრეშის მოპოვების, ზოგადად, კარიერებზე არასწორი მუშაობის გამო მოსახლეობის პროტესტზე, რასაც, მისივე თქმით, “ხელისუფლება აიგნორებს”.

როგორც მამალაძემ თქვა, მომავალშიც აქტიურად დაიცავს მშრომელი ადამიანების ინტერესებს.

პირდაპირი ტრანსლაციის დროს, მოსახლეობისგან შემოსულ რამდენიმე კითხვას: “თავად თუ სჯერა, რასაც ამბობს?” და “შეკვეთილში გზა როდის დაიგება?” _ ლეიბორისტმა მხიარულად უპასუხა:

_ ვინც ასეთ კითხვას მისვამს, არის ტროლი, ქოცპარტიიდან, კითხვაზე კი ასე ვუპასუხებ: “შეკვეთილში ისეთი კაცი გყავთ მეზობლად, გზაც ექნებათ და კვალიც არ მიგაკლდებათ და არ ინერვიულოთ”.

ანგარიშს მოსმენის დასასრულს, დავით დარჩიამ ღიმილით მადლობა გადაუხადა მამალაძეს და უთხრა, რომ მისი გამოსვლა პოლიტმოხსენებას ჰგავდა:

_ ცოტა პოლიტიკური მოხსენება კი გამოგივიდა, _ უთხრა დარჩიამ, რაზეც მამალაძემ უპასუხა, რომ იმპერიალისტებს ებრძოდა:

_ მე ვებრძვი იმპერიალისტებს, _ იყო ოზურგეთელი ლეიბორისტის პასუხი.

ოზურგეთის საკრებულოში, ამომრჩეველთათვის ანგარიშის ჩაბარებისას, ვრცლად ისაუბრა “პატრიოტთა ალიანსის” წარმომადგენელმა, საკრებულოს წევრმა, შოთა გოგიბერიძემ, რომელიც, ამავდროულად, ფრაქცია “მშრომელთა და ხელმოკლეთა ინტერესებისთვის” თავმჯდომარეა:

_ საანგარიშო პერიოდში დავესწარი და მონაწილეობა მივიღე საკრებულოს სხდომებში. ფრაქციის 8 სხდომა ჩავატარეთ, ხოლო საანგარიშო პერიოდში არა ერთი მნიშვნელოვანი საკითხის ინიცირება მოვახდინეთ. კერძოდ, ეს იყო ა(ა)იპ “ოზურგეთის სერვისცენტრის კომუნალური სამსახურის და დასუფთავების სამსახურის” მუშებისთვის სახელფასო ანაზღაურების ოცპროცენტიანი ზრდა; ოზურგეთის მუნიციპალიტეტის ეკონომიკაში ე. წ. სოციალური საწარმოების შექმნის პრაქტიკის დანერგვის შესახებ; ოზურგეთის მუნიციპალიტეტში ჩაის კულტურის აგრარულ მეურნეობაში დარგვა-განაშენიანების პოპულარიზაციისთვის სპეციალური სააგიტაციო საქმიანობის გახორციელების ხელშეწყობისა და ჩაის სანერგე მეურნეობის შექმნის და ფუნქციონირების შესახებ, _ თქვა შოთა გოგიბერიძემ და ხაზი გაუსვა იმ გარემოებასაც, რომ ზოგჯერ დასმულ საკითხებს და პრიორიტეტად მიჩნეულ თემებს ვერ ახორციელებენ:

_ მიზეზი ისაა, რომ თვითმმართველობის უფლებამოსილებათა ჯაჭვი არ გვაძლევს საშუალებას, საკრებულომ ცენტრალური ხელისუფლების გარეშე გადაწყვიტოს ესა თუ ის საკითხი, _ თქვა მან და აღნიშნა, სკოლამდელი აღზრდის პედაგოგთათვის ხელფასის ზრდას რამდენი ბრძოლა დასჭირდა.

შოთა გოგიბერიძემ ხაზგასმით ისაუბრა საკრებულოს აპარატის ინოვაციური მეთოდების შესახებ, რომელიც სწორი გადაწყვეტილებების, ზოგადად, წარმატებულ მუშაობაში ეხმარება საკრებულოს თითოეულ წევრს:

_ ოზურგეთის მუნიციპალიტეტის ეკონომიკაში ე. წ. სოციალური საწარმოების შექმნის პრაქტიკის დანერგვის შესახებ ვისაუბრეთ და საანგარიშო პერიოდში ინიცირება მოვახდინეთ. ასეთი ინიციატივები უნდა გავითვალისწინოთ, რასაც ჩვენგან მხარდაჭერა არასდროს აკლია, _ თქვა მან და ვრცლად ისაუბრა გასული წლის სეზონზე, გურიაში არსებულ მძიმე ვითარებაზე, როცა ხალხმა ციტრუსოვნების მოსავლის დიდი ნაწილი იზარალა.

შოთა გოგიბერიძემ, ასევე, აქცენტი გააკეთა გურიის, როგორც საუკეთესო რეგიონის, ტურისტულ რუკაზე ნიშანდობლივად მოხვედრაზე:

_ ვხედავთ, რა კარგად ჩანს საქართველოს ტურისტულ რუკაზე აჭარა და სვანეთი. ამ ფონზე მკრთალია გურია. ყველაფერი უნდა გავაკეთოთ, რომ მოხდეს რეგიონის პოპულარიზაცია, ამას კი ინფრასტრუქტურის განვითარება სჭირდება.

ბოლოს მან მოითხოვა ექადიის უბნის მცხოვრებთა მხარდაჭერა, რომლებიც კატეგორიულად ეწინააღმდეგებიან თაყაიშვილის ქუჩაზე, ყოფილი მანქანათმშენებელი ქარხნის ტერიტორიაზე ფერადი ლითონების საწარმოს გახსნას:

_ აქცენტები უნდა გაკეთდეს სასარგებლო საწარმოს გახსნაზე და არა ტოქსიკური საწარმოს ამოქმედებაზე. ჩვენ საკრებულოს სხდომებზე არა ერთხელ გვქონდა ამაზე საუბარი. მოსახლეობამ მოაწყო საპროტესტო აქციები. ექადიის უბანში ჯერ ტყვიის გადამამუშავებელი საწარმოს მშენებლობა შეაჩერა ხალხმა, ახლა ალუმინის წარმოება-გადამუშავების საკითხი დადგა. ეს საკითხი მოსახლეობის სასარგებლოდ უნდა გადაწყდეს _ მოვუსმინოთ მათ. ოზურგეთის მუნიციპალიტეტში, ზოგადად, ეკოლოგიური ვითარების გაუარესების ფონზე, საკითხებს, რაც მდინარეებიდან ინერტული მასალების უკანონო ამოღებას, მდინარეთა ხეობების დაწევას, წყლის არტერიული მარაგების კლებას ეხება, სერიოზულად უნდა მივუდგეთ და ყურადღება არ შენელდეს. ამას ითხოვს ამომრჩეველი, რასაც ჩვენ მუდამ ვახმოვანებთ, _ თქვა გოგიბერიძემ და დასძინა, რომ აღნიშნულის გარდა, პანდემიის გამო, ქვეყანაში არსებული ურთულესი ვითარების მიუხედავად, ამომრჩეველთან 40-ზე მეტი გასვლითი შეხვედრა ჩაატარეს: “ეს კარგი იყო, რადგან პანდემიურმა ვითარებამ ადგილზე მოქალაქეთა მიღების საშუალება შეზღუდა”, _ თქვა გოგიბერიძემ.

ფრაქციის მესამე წევრმა, ნანული ორაგველიძემ, თავის გამოსვლაში, მრავალ სოციალურ პრობლემაზე ისაუბრა, თუმცა, მთავარი აქცენტი ოზურგეთში ტოქსიკურ საწარმოდ მიჩნეულ ფერადი ლითონების საწარმოს გახსნაზე შეაჩერა;

_ მუნიციპალიტეტს დამოუკიდებლად არ შესწევს უნარი და მის პირდაპირ მოვალეობას არ შეადგენს საწარმოთა შექმნა და ადამიანების დასაქმება. გურიის რეგიონი უღარიბესია და მასთან მიმართებაში მთავრობა შეცდომას შეცდომაზე უშვებს. შეცდომა კი არა დანაშაულია, სუბტროპიკული ზონის ღვთისნიერ პირობებში, სასოფლო-სამეურნეო კულტურების გადამამუშავებელი ქარხნის ნაცვლად, უკვე მეორედ, ტოქსიკური საწარმოს შექმნის დაგეგმვა.

და ეს ხდება საკითხზე ხალხის, მუნიციპალიტეტის ხელმძღვანელთა არა ერთი დასაბუთებული შენიშვნის მიუხედავად, პრობლემის ანალიზის გარეშე, _ თქვა ორაგველიძემ და მოიყვანა დოკუმენტური ინფორმაცია იმის თაობაზე, თუ როგორ გახდა ინდოეთში არა ერთი ქალაქი საცხოვრებლად უვარგისი, მსგავსი ტოქსიკური საწარმოების განთავსების შემდეგ.

შოთა გოგიბერიძემ გაკვირვება გამოხატა იმის გამო, რომ თუ ხალხის დასაქმება, საწარმოს აშენება ბიზნესის საქმეა, კონკრეტულად კი ასეთი პასუხი ისმის მაშინ, როცა ადამიანები ციტრუსის ქარხნის აშენებას ითხოვენ, ტოქსიკური საწარმოს გახსნას რატომ მფარველობს სახელმწიფო?

ნანული ორაგველიძემ კმაყოფილება გამოთქვა, რომ დროებით გადაიდო აღნიშნული საწარმოს პროექტის განხილვა და გამოთქვა სამომავლოდ ხალხის მხარდაჭერისთვის მზადყოფნა.

საკრებულოს თავმჯდომარემ, დავით დარჩიამ, ფრაქციის სამივე წევრს მადლობა კიდევ ერთხელ გადაუხადა კარგი მუშაობის, ზოგადად, მნიშვნელოვანი პრობლემების ირგვლივ, წლის განმავლობაში გამოჩენილი აქტიურობისთვის.