ალექსანდრე მაკედონელის პიროვნება ყოველთვის ხიბლავდა კინემატოგრაფისტებს. მიუხედავად ამისა, ამ დიდი მხედართმთავრისა და მსოფლიო მბრძანებლის შესახებ უმეტესწილად სატელევიზიო ფილმები იდგმებოდა. 1956 წელს რეჟისორმა რობერთ როსენმა გადაიღო “ალექსანდრე დიდი” რიჩარდ ბერთონით მთავარ როლში. და აი, თითქმის ოთხი ათეული წლის განვლის შემდეგ ამერიკული კინოს ერთ-ერთმა ყველაზე გამორჩეულმა ხელოვანმა, სამგზის ოსკაროსანმა ოლივერ სთოუნმა დადგა ფილმი ,,ალექსანდრე”, საკუთარი ცხოვრების მთავარი პროექტი, როგორც მას უწოდებდა რეჟისორი.
ფილმის გადაღებები მიმდინარეობდა 2003 წლის სექტემბრიდან 2004 წლის თებერვლის ჩათვლით. სთოუნმა სპეციალურად საფრანგეთის მოქალაქეობა მიიღო, რათა ამ გრანდიოზული პროექტისათვის ადვილად ეშოვნა ფული ევროპაში. აღსანიშნავია, რომ სთოუნის დედა ფრანგია, ასე რომ მას მოქალაქეობის მიღება ალბათ არ გაუჭირდებოდა. სხვადასხვა მონაცემებით ფილმის წარმოებაზე 160 _ 200 მილიონი დოლარი დაიხარჯა. ფილმის შემოსავალმა კი 160 მილიონი შეადგინა. გადაღებები სხვადასხვა ქვეყნებში მიმდინარეობდა: 36 დღე მაროკოში, 18 დღე ტაილანდში, დარჩენილი დრო კი ლონდონის ფაინვუდის სტუდიის პავილიონებში. ფილმისთვის გამოყენებული იყო მინიმუმ სპეცეფექტები. რეჟისორს, როგორც ნაღდ სამხედროს, უდიდესს სიამოვნებას ანიჭებდა ორი ათას კაციანი გადამღები ჯგუფის, ასობით ცხენისა და ორი სპილოს სარდლობა. გადასაღებ მოედანზე იგი თავს გენერლად გრძნობდა, თანაც საომარი გამოცდილება ოლივერ სთოუნს გააჩნია: იგი ვიეტნამში იბრძოდა და მამაცობისათვის დაჯილდოვებულია მეწამული გულითა და ბრინჯაოს ვარსკვლავით. თავისი ფილმის გმირის შესახებ სთოუნი ამბობდა:” ალექსანდრე მაკედონელი დღემდე ახსოვთ. იგი ადამიანთა მეხსიერებას დაამახსოვრდა მისი მსოფლმხედველობის, მისი შემბრალებლობის, მისი კეთილშობილების გამო. იგი ყველასგან განსხვავდებოდა. ალექსანდრე იყო გენერალი, რომელსაც ძალუძდა დაეტირა ბრძოლის ველზე დაღუპული ჯარისკაცები. ასეთი რამ იქამდე არასოდეს მომხდარა. იგი განსაკუთრებული ადამიანი იყო, რომელიც ყოველთვის ეხსომებათ”.
საკუთარი მინი არმია რომ შეემოსა ოლივერ სთოუნს დასჭირდა ოცი ათასი კოსტუმი, ოთხი ათასი მშვილდ ისარი, სამი ათასი ფარი და ამდენივე ხმალი. გადასაღებ გრაფიკს მან მხოლოდ ორი დღე გადააცილა, მიუხედავად იმისა რომ ტაილანდში ჩასვლისას გადაღებული მასალის ნაწილი ტაილანდელმა მებაჟეებმა დააზიანეს.
გადაღებები მძიმე და ექსტრემალურ პირობებში მიმდინარეობდა, მაგრამ ერთი დღითაც კი არ შეჩერებულა. მას ქვიშის ქარბუქმაც კი ვერ შეუშალა ხელი. აგრეთვე გაძნელდა სპილოებთან დაკავშირებული ეპიზოდის გადაღება. ინდური სპილოები ცუდად იყვნენ გაწვრთნილნი, ამიტომ საბოლოოდ გადაღება ტაილანდში გადაიტანეს, სადაც იქაური სპილოები გადაიღეს.
სთოუნი ერთ ინტერვიუში აცხადებდა რომ ფილმის მთავარი ვარსკვლავი ეს რეჟისორია, მსახიობები კი მარიონეტები არიან. “ჩვენ მათ ვანებივრებთ. შემდეგ კი ვწუწუნებთ მათი კაპრიზებისა და ამბიციების გამო”, _ აცხადებს იგი და ნაწილობრივ მართალია. იგი განეკუთვნება იმ რეჟისორთა რიცხვს, რომელიც თავისი მიზნის მისაღწევად მსახიობებსა და გადამღებ ჯგუფს დამხმარეებად იყენებს და არა თანამოაზრეებად. მისთვის სულ ერთია ვინ დგას მის წინ, ვარსკვლავი თუ ახალბედა მსახიობი, ორივეს ერთნაირად თანაბრად ეპყრობა და თუ რაიმე არ მოეწონება, შეუძლია დაუყონებლივ დაითხოვოს იგი, როგორც თავის დროზე მოხდა შერონ სთოუნისა და ქევინ ქოსთნერის მაგალითზე. ფილმის გადაღებებისას გაგდებას ძლივს გადაურჩა ალექსანდრეს როლის შემსრულებელი ირლანდიელი მსახიობი ქოლინ ფარელი. თავდაპირველად მთავარ როლზე მიწვეული იყო ტომ ქრუზი, რაც ჩვენი აზრით ფილმს ბევრად უფრო არგებდა. როცა რაიმე არ გამოდიოდა სთოუნი ფარელს ეუბნებოდა: ”ეს დუბლი კი არა, ნამდვილი ნაგავია. თუ წესიერად ვერ ითამაშებ, შეგიძლია სახლში წაეთრიო!”. სასმელის დიდი მოყვარული ფარელი ერთხელ გამოთვრა, კიბიდან ჩამოვარდა და ფეხი დაიზიანა. ყველას გასაკვირად რეჟისორმა მოთოკა საკუთარი ნერვები, მივიდა მსახიობთან და კბილებში გამოსცრა: ”შენ გატყობ თამაში გიყვარს. თანაც რისკიანი ხარ. ფრთხილად იყავი, ზედმეტი არ მოგივიდეს”. მეორე დღეს მსახიობი გადასაღებ მოედანზე თაბაშირში ჩასმული ფეხით გამოცხადდა. როგორც ამბობენ, ვიეტნამელი ვეტერანის სიტყვებმა ფარელზე დიდი ზემოქმედება იქონია.
ფილმში შეკრებილია მსახიობთა მშვენიერი ანსამბლი: ქრისტოფერ ფლამერი, ენთონი ჰოფქინსი, ანჯელინა ჟოლი. ეს უკანასკნელი თამაშობს ალექსანდრეს დედას, თუმცა ცხოვრებაში ჟოლი მხოლოდ ერთი წლით არის უფროსი ფარელზე. ისინი საყვარლებს უფრო ჰგვანან ვიდრე დედა-შვილს. აღნიშვნის ღირსია ველ ქილმერის ბრწყინვალე თამაში, მან ალექსანდრეს მამა ფილიპე განასახიერა. თავდაპირველად ამ როლზე მიწვეული იყო შონ ქონერი, მაგრამ მან რატომღაც უარი განაცხადა.
ალექსანდრეს მსოფლიო პრემიერის დროს საბერძნეთში ფილმის ჩვენება კინაღამ ჩავარდა. საზოგადოების ერთმა ნაწილმა ფილმი დაგმო იმ მოტივით რომ ბერძენთა სათაყვანო გმირი გამოყვანილია ბისექსუალად. უნდა აღინიშნოს, რომ იმ შორეულ დროში, ასეთი რამ არავისთვის საკვირველი არ უნდა ყოფილიყო. ეს ცხოვრების ნორმა იყო, განსაკუთრებით კი დიდგვაროვან ადამიანთა წრეებში.
