ამ წუთებში, თბილისში მდებარე პარლამენტის შენობასთან აზერბაიჯანელი ჟურნალისტის, აფგან მუხტარლის მხარდასაჭერი აქცია მიმდინარეობს.
აქციაზე, რომლის ორგანიზატორიც “ჟურნალისტური ეთიკის ქარტიაა”, მედიისა და არასამთავრობო ორგანიზაციების წარმომადგენლები არიან შეკრებილები. ისინი სახელმწიფო ინსტიტუტებისგან აღნიშნულ საქმესთან დაკავშირებით ქმედით რეაგირებას და განმარტებებს ითხოვენ.
როგორც საიას იურისტმა „გურია ნიუსთან“ საუბრისას განაცხადა, ამ ეტაპამდე ხელისუფლება ამ პროცესში თანმიმდევრული არ არის.
რა თქმა უნდა, ფაქტი არის აბსოლუტურად მიუღებელი, მსგავსი შემთხვევები უარყოფითად მოქმედებს ქართული სახელმწიფოს იმიჯზე როგორც ქვეყნის გარეთ, ასევე ქვეყნის შიგნით.
„ამას არა აქვს არანაირი გამართლება. მით უმეტეს, რომ ამ პროცესში სპეციალურ სამსახურები იყვნენ ჩართულები და არა რომელიმე კრიმინალურმა ჯგუფმა უზრუნველყო ამ პროცესის განვითარება. ცხადია, რომ საზოგადოებას სახელმწიფომ უნდა მიაწოდოს ამომწურავი ინფორმაცია, პროკურატურამ უნდა აწარმოოს გამოძიება, ასევე ძალიან მნიშვნელოვანია, რომ პარლამენტმა უზრუნველყოს, მოიწვიოს და ინფორმაცია მიიღოს იმ პირებისგან, ვისაც პასუხისმგებლობა ეკისრება, რომ ქვეყანაში მსგავსი რამ არ ხდებოდეს.
ეს არის ძალიან მნიშვნელოვანი ნაბიჯები, რაც ხელისუფლებამ უნდა გადადგას. თუმცა, ამ ეტაპამდე ვერ ვხედავთ რომ ხელისუფლება თანმიმდევრულია ამ პროცესში“, _განაცხადა „გურია ნიუსთან“ საუბრისას საიას იურისტმა სულხან სალაძემ.
შეგახსენებთ, რომ იგივე მოთხოვნებით, აქციის მონაწილეებმა საპროტესტო აქციები ორი დღის წინ მთავრობის კანცელარიასთან, გუშინ კი, სახელმწიფო უსაფრთხოების სამსახურთან გამართეს.
ცნობისთვის, აფგან მუხტარლი აზერბაიჯანის ხელისუფლების მიერ დევნილი ჟურნალისტია, რომელიც ბოლო პერიოდში ოჯახთან ერთად თბილისში ცხოვრობდა. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან 29 მაისს დაიკარგა, მოგვიანებით კი აღმოჩნდა, რომ ის აზერბაიჯანშია დაპატიმრებული საზღვრის უკანონოდ კვეთის ბრალდებით. მუსტაფაევას აინტერესებს, როგორ გადაკვეთა მუხტარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. მუსტაფაევას აქციაზე სწორედ ეს პასპორტი აქვს მოტანილი.
საქართველოს შინაგან საქმეთა სამინისტროში ორი დღის წინ განაცხადეს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს. გავრცელებული ინფორმაციით, აფგან მუხტარლის აზერბაიჯანის პროკურატურამ სამი ბრალი წაუყენა, სასამართლომ კი ჟურნალისტს სამთვიანი წინასწარი პატიმრობა უკვე შეუფარდა.
ამავე თემაზე:SOCARთველო“… „დაიცავი“_ ჟურნალისტის მხარდამჭერი აქცია სუს-თან (ვიდეო)
