წინასაარჩევნო პერიოდში რამდენიმე სახელმწიფო პროგრამა ამოქმედდა, რომელიც მთლიანად სუბსიდირებაზეა ორიენტირებული. მევენახეობაში, მეხილეობასა და სხვა სფეროებში გაღებული თანხების განაწილება რეალურად ხდება არჩევნებამდე დარჩენილ 1-2 კვირაში.
ინფორმაციისთვის, 16 ივნისს ქუთაისსა და ზუგდიდში ჯანდაცვის მინისტრმა ეკატერინე ტიკარაძემ, იმერეთში სახელმწიფო რწმუნებულმა ზვიად შალამბერიძემ, მაჟორიტარმა დეპუტატმა ზაზა ლომინაძემ და ადგილობრივი ხელისუფლების წევრებმა დევნილ ვეტერანთა 60 ოჯახს ახალაშენებულ კორპუსებში საცხოვრებელი ფართები გადასცეს. დამატებით, დევნილ ვეტერანთა 100-მდე ოჯახმა ადმინისტრაციული დაპირება მიიღო, რომლის თანახმადაც, ისინი საცხოვრებელ ფართებს ქუთაისსა და ზუგდიდში უახლოეს მომავალში უპირობოდ მიიღებენ.
23 ივნისს ბათუმის მუნიციპალიტეტის მერიამ 15 მრავალშვილიან ოჯახს ბინები საკუთრებაში გადასცა.
24 ივნისს პრემიერ-მინისტრმა გააჟღერა ინიციატივა, რომლის თანახმადაც მოქალაქეებსა და იურიდიულ პირებს იზოლაციის, კარანტინის და პირბადის ტარების წესის დარღვევის გამო დაკისრებული დაახლოებით 76 მილიონი ლარის გადაუხდელი ჯარიმები ჩამოეწერებათ.
25 ივნისს პრემიერ-მინისტრმა განაცხადა, რომ იწყება ახალი პროგრამა, რომელიც გულისხმობს საცხოვრებელი ბინის შეძენის ხელშეწყობის მიზნით ოჯახებისთვის ახალშეძენილ შვილზე იპოთეკური სესხის თანადაფინანსებას. პროგრამა 1 სექტემბრიდან ამოქმედდება.
26 ივლისს პარლამენტმა სახელმწიფო ბიუჯეტში შესატანი ცვლილებები დაამტკიცა, რომლის მიხედვითაც საშემოდგომო რთველის დაფინანსება 38 მილიონი ლარიდან 138 მილიონამდე გაიზარდა.
26 ივლისს გარემოს დაცვისა და სოფლის მეურნეობის მინისტრის, ლევან დავითაშვილის განცხადებით, სასოფლო-სამეურნეო ტექნიკის თანადაფინანსების პროგრამაზე განაცხადების მიღება 1 სექტემბრიდან დაიწყება.
11 აგვისტოს თბილისის მერმა და „ქართული ოცნების“ მერობის კანდიდატმა, კახა კალაძემ 36 ოჯახს საკუთრების დამადასტურებელი მოწმობები გადასცა. საცხოვრებელი ფართები სიმბოლურ ფასად, ერთ ლარად გლდანის რაიონში მცხოვრებ ოჯახებს დაუკანონდათ.
27 აგვისტოს ეკონომიკისა და მდგრადი განვითარების მინისტრის ნათია თურნავას თქმით, ფოთში, სანაპირო დაცვის ბაზასთან მცხოვრებ 100-მდე ოჯახს, პრემიერ-მინისტრის დავალების შესაბამისად, უმოკლეს ვადაში უზრუნველყოფენ უსაფრთხო ადგილზე საცხოვრებელი სახლებით. ფოთის ამ უბანში მცხოვრები ადამიანები მძიმე პირობების გამო, წლებია, ითხოვენ ალტერნატიულ საცხოვრებელ ფართებს.
30 აგვისტოს პრემიერ-მინისტრმა ირაკლი ღარიბაშვილმა განაცხადა, რომ 300-მდე დევნილ ოჯახს მათ სარგებლობაში არსებული ფართი სიმბოლურ ფასად გადაეცემა.
8 სექტემბერს თბილისის მერმა, კახა კალაძემ საკუთრების დამადასტურებელი მოწმობები კიდევ 55 ოჯახს გადასცა. საცხოვრებელი ფართები სიმბოლურ ფასად, ერთ ლარად სამგორის რაიონში მცხოვრებ ოჯახებს დაუკანონდათ. 31 აგვისტოს პრემიერ-მინისტრმა ირაკლი ღარიბაშვილმა განაცხადა, რომ 500-მე სამხედრო მოსამსახურის ოჯახს გადაეცემა საცხოვრებელი ბინა.
17 სექტემბერს პრემიერ-მინისტრმა, ირაკლი ღარიბაშვილმა წყალტუბოში 420 დევნილ ოჯახს ახალი ბინები საკუთრებაში გადასცა.
არის თუ არა ეს ამომრჩეველთა ხმების მობილიზებისა და ამომრჩეველთა ირიბი მოსყიდვის სქემა – ამის შესახებ „საერთაშორისო გამჭვირვალობა – საქართველოს“ წარმომადგენელს, ლევან ნატროშვილს ვესაუბრეთ.
„გამოვკვეთეთ რამდენიმე პროგრამა სახელმწიფო ბიუჯეტიდან, ადგილობრივი ბიუჯეტიდან გახორციელებული ინიციატივა პროექტი, პროგრამა, რომელიც სასურველია რომ მინიმუმ საარჩევნო პერიოდში არ გახორციელებულიყო. უფრო ზუსტად საუბარი არის რამდენიმე სუბსიდირების პროგრამაზე. ეს არის იპოთეკური სესხის სუბსიდირების პროგრამა, რთველის დაფინანსება, სასოფლო-სამეურნეო ტექნიკის დაფინანსების პროგრამის მნიშვნელოვანი ზრდა. ბევრგან დაუკანონეს ადამიანებს ბინები – ამ ბოლო 2 თვის განმავლობაში და უფრო ადრეც. პრინციპში, სხვადასხვა მუნიციპალიტეტის მასშტაბით ჩვენ ვფიქრობთ, რომ სხვადასხვა მსგავსი ინიციატივებისგან წინა საარჩევნო პერიოდში სასურველია, რომ თავი შეიკავოს ხელისუფლებამ, სხვადასხვა უწყებებმა, იმიტომ რომ ეს თანხები, რაც ბიუჯეტში შედის, არის გადასახადებისგან მობილიზებული. გადამხდელები სხვადასხვა პარტიის მხარდამჭერები შეიძლება იყვნენ და გვეჩვენება, რომ ვიწრო პარტიული მიზნებისთვის ხდება მათი გამოყენება, როცა არჩევნებამდე ხდება ასეთი ქონების გადაცემა ან რაიმე სერვისის მიწოდება. ამ დროს ამბობენ, რომ ზღვარი იშლება სახელმწიფო რესურსებსა და პარტიულ რესურსებს შორის. ვიწრო პარტიული ინტერესებისთვის გამოიყენება სახელმწიფო რესურსები, ჩვენ მიერ გადახდილი თანხა. ამიტომ, სამწუხაროდ, უკვე ვეღარაფერს ვუზამთ ამ შემთხვევებს, მაგრამ ჩვენი რეკომედანცია, რომელიც წლების განმავლობაში არის ხოლმე უცვლელი, რჩება. სამწუხაროა, რომ მმართველი პარტია ამ რეკომენდანციას არ იზიარებს ხოლმე“, _ გვეუბნება ნატროშვილი.
ნატროშვილის თქმით, როგორც ყოველთვის, ხელისუფლებამ არ გაითვალისწინა რეკომენდანცია იმის შესახებ, რომ მსგავსი ქმედება წინა საარჩევნო პერიოდში სასურველი არ არის, მაგრამ საუბარი არც მოსყიდვის შესახებ შეიძლება, რადგან კანონდარღვევას ხელისუფლება გვერდს უვლის.
„მოსყიდვა არის სისხლის სამართლის დანაშაული. ამისთვის, სამწუხაროდ ეს არ არის საკმარისი ქმედებები. იმ მხრივ, რომ გამონაკლისია დაშვებული მოსყიდვის მუხლში – რომ თუ ბიუჯეტიდან ხდება, პროგრამის გახორციელება ან დაპირება ბიუჯეტის პროგრამის განაწილებაზე, ეს არ ითვლება კანონმდებლობით მოსყიდვად. აქედან გამომდინარე, ეს პროგრამები და პროექტები კანონმდებლობას არ აღვევს, მაგრამ არის ცუდი პრაქტიკა. მოსყიდვის გარდა არსებობს საარჩევნო კოდექსი, სადაც აკრძალულია არჩევნებამდე 60 დღით ადრე პერიოდში, ბიუჯეტში გარკვეული ცვლილებების შეტანა, რომელიც გულისხმობს პროგრამების დაფინანსების გაზრდას“, – გვეუბნება ნატროშვილი.
ბატონი ლევანი ასევე აღნიშნავს, რომ ხელისუფლება ამ აკრძალვასაც მარტივად უვლის გვერდს.
„ამას ყველა ხელისუფლება მარტივად უვლის გვერდს, რადგან წინასწარ აინიცირებენ ამ ცვლილებებს და შესაბამისად, კანონის მხრივ პრობლემა არ ექმნებათ. მაგრამ მაინც ცუდი პრაქტიკაა,იმიტომ რომ თავისი შინაარსით ადმინისტრაციული რესურსის გამოყენებაა, ფაქტობრივად, საარჩევნო, ვიწროპარტიული მიზნებისთვის“.
რაც შეეხება ჩვენს კითხვას, არსებობს თუ არა სტატისტიკა, რომ არასაარჩევნო წლებში არ სუბსიდირდება და საარჩევნო წლებში – კი – ლევან ნატროშვილი გვპასუხობს, რომ მსგავსი ანალიზი რთული გასაკეთებელია.
„ასეთი ანალიზი ჩვენ არ გაგვიკეთებია და საკმაოდ რთული გასაკეთებელიც არის, რადგგან არჩევნები ხშირად ტარდება. ბოლო წლებს თუ ავიღებთ, – 2017 წელსაც, 2018 წელსაც იყო არჩევნები, 2020 წელსაც. ამიტომ გარკვეული განსხვავების დაჭერა ძნელია. გარდა ამისა, იცვლება პროგრამების შინაარსი, მათი დასახელება. ამიტომ რთულია მათი შედარება“, – ამბობს ნატროშვილი.
სტატია ქვეყნდება პროექტის „გამჭვირვალე არჩევნები და მედია” ფარგლებში.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა, არ გამოხატავდეს ფონდ ”ღია საზოგადოება-საქართველოს” პოზიციას. შესაბამისად, ფონდი არ არის პასუხისმგებელი მასალის შინაარსზე.
[sexy_author_bio]
