“ამდენი დაპირებები და უკვე იმედიც გადაგვეწურა!”

მთავრობას თუ დავუჯერებთ, სოფლის, სადაც საქსტატის მონაცემებით, ქვეყნის მოსახლეობის 41,3% ცხოვრობს, განვითარება საქართველოსთვის მნიშვნელოვან საკითხს წარმოადგენს. არადა, ამ განვითარების ფონზე  სოფლად მცხოვრები ადამიანები ბევრ პრობლემას უჩივიან. უგზოობა, უწყლობა, უგაზობა _ ყველაზე მეტად ეს სამი საკითხი აწუხებს სოფლად მცხოვრებ ადამიანებს, განსაკუთრებით კი მაღალმთიანი ზონის მკვიდრთ. გამონაკლისი ამ მხრივ არც ლანჩხუთის მუნიციპალიტეტის სოფლებია.

“ძალიან არ მინდა, ჩემი სოფლის ცენტრი ასე გამოიყურებოდეს!” _ დაწერა ფეისბუქში ლანჩხუთის საკრებულოს ყოფილმა წევრმა, ოპოზიციიდან ნონა მურვანიძემ და სოფელ შრომისუბნის ცენტრში გადაღებული ფოტოები გამოაქვეყნა:

“ლანჩხუთის ცენტრის გაკეთება და გალამაზება არ მგონია, ვინმეს არ მოეწონოს. ისე, რაც კეთდება გასაკეთებელია და ადგილობრივი ხელისუფლების საზრუნავია, ამაში განსაკუთრებულს ვერაფერს ვხედავ. რაც შეეხება, სოფლის ცენტრებს, ყველგან უნდა დაიგეგმოს პრიორიტეტების მიხედვით და რა პროგრამით მოხდეს გაკეთება. მოქალაქეობრივი პასუხისმგებლობაც დაბალია და არ ვთვლით თავს ვალდებულად, ჩვენც ჩავერთოთ აქტიურად (ჩემს თავს არ ვთვლი პასიურ მოქალაქედ). “ნელ-ნელაო” როცა აღნიშნავენ, ძალიან გვიანიაა. 21-ე საუკუნეში წყალი, გზა და გაზი რომ არ გექნება სოფელში…” _ წერს ნონა მურვანიძე.

ირკვევა, რომ სოფელ შრომისუბანში, რომელიც ჩოჩხათის ადმინისტრაციული ერთეულის შემადგენლობაშია, მოსახლეობას გზისა და გაზიფიცირების პრობლემა აწუხებს. მათი ინფორმაციით, სოფლის მთავარი გზა კრიტიკულ მდგომარეობაშია, გაზიფიცირებასთან დაკავშირებით კი, ჯერჯერობით, მხოლოდ დაპირებებია. შრომისუბანში არსებული ამ პრობლემების თაობაზე ლანჩხუთის მერიის გვერდზე დაწერა კიდეც მოქალაქე ცირა ტიკარაძემ, რომელიც სოფელ შრომისუბნის მკვიდრია.

“სოფელ შრომისუბანში გზები კრიტიკულ დღეშია, მუდმივად “აკეთებენ ” და მაინც ისევ ის სიტუაციაა. ეს გზა  ბევრ სოფელს აკავშირებს სხვადასხვა ქალაქისკენ მიმავალ გზასთან. სოფელში გაზიც არ არის, მხოლოდ დაპირებები. ხალხმა ზამთარში რით გაითბოს? ხეები მოჭრას? 21 საუკუნეა, არ დაგავიწყდეთ!!!

ვცხოვრობ ე. წ. “კარიერის ” წინ.  2017 წელს ასფალტის საფარი კი დააგეს, მაგრამ 5 წელიც ვერ გაძლო მძიმე ტექნიკის გადაადგილების გამო. აქაურობა მეწყერული ზონა  კი არის, რაც აქტუალური პრობლემაა, მაგრამ ამ ზონას შესაბამისი სპეციალისტები სჭირდება, სავარაუდოდ, უფრო მეტი ფინანსური დატვირთვაც, რომ  წესიერად გაკეთდეს. რაც თავი მახსოვს, სულ აკეთებენ და მაინც იგივე სიტუაცია არის. მრჩება შთაბეჭდილება, რომ არ აკეთებენ სათანადოდ.  გაზიფიცირების პროექტი დიდი ხნის წინ უნდა დამთავრებულიყო, არამც თუ დაწყებულიყო წლის ბოლოს. ამდენი დაპირებები და უკვე იმედი გადაგვეწურა. ტურისტული ინფრასტრუქტურის მოწყობის  თვალსაზრისით ჩვენს სოფლებს შეიძლებოდა დიდი პერსპექტივაც ჰქონოდა, მაგრამ ელემენტარული გაზის პრობლემა რომ არის, უკვე გეგმებზე საუბარიც ზედმეტია. სამწუხარო რეალობაა. ვნახოთ, როგორ განვითარდება მოვლენები!” _ სოფელში არსებულ პრობლემას აჟღერებს შრომისუბნის მკვიდრი ცირა ტიკარაძე.

ლანჩხუთის მერიის პიარი მაკა სულაბერიძე ტიკარაძის პასუხად განმარტავს, რომ მუნიციპალიტეტის ხელმძღვანელობა აქტუალურად მუშაობს ნახსენები პრობლემების მოსაგვარებლად და სოფელს გაზი მომავალი წლისთვის აუცილებლად ექნება:

“სამწუხაროდ, მეწყერული ზონაა. მაქსიმალურად ცდილობს მერია, რომ თქვენ გადაადგილების პრობლემა არ შეგექმნათ. რაც შეეხება გაზიფიცირების სამუშაოებს, ბოლო 5 წლის განმავლობაში გაზიფიცირდა მუნიციპალიტეტის თითქმის ყველა ადმინისტრაციული ერთეული. დარჩენილია მხოლოდ 4 ადმინისტრაციული და გვერწმუნეთ ესეც გაზიფიცირდება. წლის ბოლომდე დაპროექტება დაიწყება. ასე რომ, მომავალი წლიდან გექნებათ ბუნებრივი გაზი”, _ განმარტავს მაკა სულაბერიძე.

საგულისხმოა, რომ მუნიციპალიტეტის სოფლების გაზიფიცირების თემაზე განმარტება, რამდენიმე თვის წინ, ლანჩხუთის მერმა ალექსანდრე სარიშვილმაც გააკეთა საკრებულოს ერთ-ერთ სხდომაზე და თქვა, რომ მომავალი წლისთვის ლანჩხუთის მუნიციპალიტეტი სრულად იქნება გაზიფიცირებული:

“ოთხი ადმინისტრაციული ერთეულია, რომელშიც 14 ბუნებრივი აირის გარეშე დარჩენილი სოფელი შედის. ამ მხრივ მუშაობა გასულ წელს დავიწყეთ და პროექტირება უკვე დასრულებულია. სამუშაოები მიმდინარე წლისთვის უნდა დაიწყოს და 2023 წლისთვის მუნიციპალიტეტი სრულად იქნება გაზიფიცირებული”, _ თქვა მაშინ ლანჩხუთის მერმა საკრებულოს ერთ-ერთ სხდომაზე.