“მინიმუმ, უხერხულობის გრძნობა უნდა გქონდეთ, როცა სოფელში დღემდე მოუგვარებელი რჩება წყლის პრობლემა”, _ ფეისბუქის საშუალებით ამ სიტყვებით მიმართავს ლანჩხუთის მუნიციპალიტეტის მერიას სოფელ ჯაპანის მკვიდრი გიორგი გეგუჩაძე.
როგორც გიორგი გეგუჩაძე წერს, ზემოთ ნახსენები პრობლემის გადაჭრის მიზნით, ჩატარდა კიდეც შესაბამისი სამუშაოები და თანხებიც გაიხარჯა, თუმცა, უშედეგოდ _ სოფელს წყალი მაინც არ აქვს:
“ორჯერ “გაკეთდა”, მაგრამ არც ერთხელ ხარისხიანად (უფრო მეტიც, ძველით გაცილებით უკეთესად მიეწოდებოდა წყალი სოფელს). ათეულათასები კი გამოწერეთ, ალბათ და მოიკითხეთ მაინც, სად წავიდა ეს ფული, თუ თავიდანვე განაწილებული არ გქონდათ. ფაქტი ფაქტად რჩება, სოფელს დღემდე წყალი არ აქვს, უფრო სწორად, კარგად რომ წვიმს, მხოლოდ მაშინ აქვს”, _ წერს გიორგი გეგუჩაძე.
გარდა წყლისა, გეგუჩაძე ლანჩხუთის მერიას უგზოობის პრობლემასაც შეახსენებს: “აღარაფერს ვამბობ გზაზე. ერთადერთი შუკაა სოფელში, რომლის სიგრძეც, ალბათ, მაქსიმუმ 1.5-2 კმ სიგრძისა იყოს და ისეთი “გაბზიალებული” გზაა, ქუთაისიდან უფრო მალე ჩამოხვალ ჯაპანაში, ვიდრე შუკის თავიდან ბოლომდე მიაღწევ მანქანით.
ყოველი არჩევნების წინ რომ ხრეშს ყრით და მეტს არაფერს არ აკეთებთ ამდენი წლის განმავლობაში, ვეღარ ხვდებით, რომ ტყუილად ფულის ფლანგვაა ეს და სხვა არაფერი?!
მაგრად “ტეხავს”, რომ მოსახლეობას დღემდე ვერ მოუწესრიგეთ სასმელი წყლისა და 2 კმ-იანი სამანქანო გზის პრობლემა, არადა, ამ დროს გარეთ 21-ე საუკუნეა.
აი, არჩევნებზე რომ გაგახსენდებათ ხოლმე სოფელი და მათი პრობლემები და სახედაწყობილები დაიარებით, მაშინ გაგახსენებთ ამას. მაინც არ მაქვს იმედი, რომ მანამდე ან ერთს გააკეთებთ, ან _ მეორეს!
თქვენ ხომ ადამიანი და მისი პრობლემა მხოლოდ არჩევნების დროს გაინტერესებთ!!!”_ წერს გეგუჩაძე.
გიორგი გეგუჩაძის მხრიდან გაჟღერებული პრობლემების თაობაზე “გურია ნიუსი” ნიგოითის ადმინისტრაციულ ერთეულში მერის წარმომადგენელს გიგა დოლიძეს დაუკავშირდა.
როგორც დოლიძემ გვითხრა, სოფელ ჯაპანაში წყლის პრობლემა, ფაქტობრივად, მოგვარებულია და გამონაკლისის სახით შეიძლება, რამდენიმე ოჯახს ჰქონდეს ამ მხრივ პრობლემა:
“ჯაპანაში წყლის სისტემის რეაბილიტაცია 2015 წელს რეგიონული განვითარების ფონდის დაფინანსებით გახორციელდა. მილები შეიცვალა მთლიანად. თუმცა, მაშინ წყლის სათავე-ნაგებობა არ მოწესრიგებულა, რის გამოც წყლის დებეტი იკარგებოდა. 2021 წელს კი, სოფლის პროგრამის ფარგლებში სათავე-ნაგებობაც მოწესრიგდა. გიორგი გეგუჩაძის ჭიშკართან იყო დაზიანება და ისიც გავაკეთეთ. შეიძლება რამდენიმე ოჯახს მართლაც არ მიეწოდებოდეს წყალი, ზუსტად არ ვიცი, მაგრამ სოფლის მცხოვრებთა უმრავლესობას წყალი აქვს”, _ გვითხრა გიგა დოლიძემ.
რაც შეეხება უგზოობასთან დაკავშირებულ პრობლემას, გიგა დოლიძე ადასტურებს, რომ სოფელში მართლაც არსებობს შიდა გზების პრობლემა:
“კი, შიდა გზა მართლაც გასაკეთებელია და არა მარტო ამ შემთხვევაში, ყველგან არის ეს პრობლემა”.
[sexy_author_bio]
