მედიაკრიტიკის ინფორმაციით, რამდენიმე დღის წინ მექანიკური ციტირების გამო არასწორი ინფორმაცია გავრცელდა.
საქმე ეხება 10 თებერვალს imedinews.ge-ზე გამოქვეყნებულ იმუნიზაციის მრჩეველთა ჯგუფის ხელმძღვანელის, ივანე ჩხაიძის განმარტებას კორონავირუსის „ომიკრონ“ შტამის შესახებ.
“კერძოდ, ინფორმაციაში ვკითხულობთ, რომ „პაციენტი გადამდებად ითვლება ინფიცირებამდე 2 დღით ადრე და ინფიცირებიდან 4-5 დღის განმავლობაში“.
ტექსტში მითითებულია, რომ ჩხაიძემ „ომიკრონის“ შესახებ „ქრონიკასთან“ ისაუბრა. საინფორმაციო გამოშვების ჩანაწერის ნახვისას ვრწმუნდებით, რომ ეს სიტყვები ნამდვილად ივანე ჩხაიძემ თქვა, თუმცა ამავე დროს ნათელია ისიც, რომ დიდი ალბათობით პროფესორმა საუბრისას მექანიკური შეცდომა დაუშვა და რეალურად იგი არა ინფიცირებას, არამედ სიმპტომების გამოვლენას გულისხმობდა, რადგან თეორიულადაც კი გამორიცხულია ადამიანი ინფიცირებამდე იყოს გადამდები.
ამ ვარაუდს ამყარებს ჯანდაცვის სამინისტროს ვებგვერდზე კორონავირუსის შესახებ ხშირად დასმული კითხვების განყოფილებაც, სადაც ვკითხულობთ, რომ კორონავირუსით ინფიცირებული ადამიანი სწორედ სიმპტომების გამოვლენამდე ორი დღით (48 საათით) ადრე ხდება გადამდები სხვა ადამიანებისთვის.
მიუხედავად ამისა, „იმედინიუსმა“ აღნიშნული ციტატა სიტყვასიტყვით გაავრცელა, რის გამოც დააბნია საკუთარი აუდიტორია და მკითხველები ცდილობდნენ სოციალურ ქსელში დაეზუსტებინათ, თუ რას გულისხმობდა ივანე ჩხაიძე „ინფიცირებამდე პერიოდში“.
დღეს, როცა „ომიკრონის“ გავრცელება პიკს აღწევს და ქვეყანაში ძალიან ბევრი ინფიცირებულია, მედია განსაკუთრებული პასუხისმგებლობით უნდა მოეკიდოს კორონავირუსთან დაკავშირებულ ნებისმიერ ინფორმაციას, რადგან შეცდომამ ამ თემის გაშუქებისას შესაძლოა საფრთხე შეუქმნას ადამიანების ჯანმრთელობას და სიცოცხლესაც კი.
ამ შემთხვევაში ფაქტია, რომ „იმედინიუსმა“ ფორმალურად დაიცვა ზუსტი ციტირების პრინციპი, თუმცა თემას აშკარად არასაკმარისი პასუხისმგებლობით მიუდგა და პროფესორის სახელით (დამატებითი გადამოწმების გარეშე) გაავრცელა ციტატა, სადაც ნათლად ჩანდა მექანიკური შეცდომა.
შედეგად, მედიამ ერთი მხრივ, შეცდომაში შეიყვანა საკუთარი აუდიტორიის ნაწილი, ხოლო მეორე მხრივ, არასახარბიელო პოზიციაში ჩააყენა თავად რესპონდენტიც.
საგულისხმოა, რომ ინტერვიუს მიმდინარეობისას არც „ქრონიკის“ წამყვანს უცდია დაეზუსტებინა, ნამდვილად ინფიცირებას გულისხმობდა თუ არა რესპონდენტი და ხომ არ სურდა მას ეთქვა „სიმპტომები“ ან რამე სხვა სიტყვა ინფიცირების ნაცვლად”,_ წერია ინფორმაციაში.
