ალიანსმა 2008 წელს დაადასტურა, რომ მისი კარი ღიაა უკრაინისა და საქართველოსთვის და თუკი ისინი ნატო-ს წევრობისკენ სწრაფვას გააგრძელებენ და საჭირო მოთხოვნებს დააკმაყოფილებენ, ეს საკითხი წინ წაიწევს, – ამის შესახებ აშშ-ის სახელმწიფო მდივანმა ენტონი ბლინკენმა NBC News-თან მიცემულ ინტერვიუში განაცხადა.
მან კიდევ ერთხელ გაუსვა ხაზი, რომ იმ შემთხვევაში, თუ რუსეთი უკრაინის წინააღმდეგ აგრესიას განახორციელებს, ამას სერიოზული შედეგები მოჰყვება დასავლეთის მხრიდან.
„დაარსების დღიდან ჩრდილოატლანტიკური ალიანსი ძალიან მკაფიოდ აცხადებს, რომ მისი კარი ღია იქნება ნებისმიერი ევროპული სახელმწიფოსთვის, რომელსაც წევრობა სურს და საამისოდ მოთხოვნებს აკმაყოფილებს. 2008 წელს ნატომ დაადასტურა, რომ მისი კარი ღიაა უკრაინისა და საქართველოსთვის. თუ უკრაინა და საქართველო გაწევრიანების პროცესს განაგრძობენ და მოთხოვნებს დააკმაყოფილებენ, ეს წინ წაწევს მათ ამ პროცესში.
პრეზიდენტმა ბაიდენმა გარკვევით განუცხადა პრეზიდენტ პუტინს, ასევე მეც გარკვევით განვუცხადე ჩემს კოლეგას, საგარეო საქმეთა მინისტრ ლავროვს, რომ მზად ვართ გადავდგათ ისეთი ნაბიჯები, როგორი ნაბიჯების გადადგმისგან 2014 წელს თავი შევიკავეთ და რომელსაც რუსეთისთვის სერიოზული შედეგები ექნება. ჩვენ გარკვევით განვაცხადეთ, რომ თუკი რუსეთი განაახლებს აგრესიულ ქმედებებს უკრაინის წინააღმდეგ, ამას სერიოზული შედეგები მოჰყვება.
ჩვენ რუსეთთან სტაბილურ, პროგნოზირებად ურთიერთობას ვანიჭებთ უპირატესობას, მაგრამ თუკი რუსეთი გააგრძელებს წინდაუხედავ და აგრესიულ ქმედებებს, ჩვენ ვუპასუხებთ და არა მხოლოდ ჩვენ, არამედ ჩვენი მოკავშირეები და პარტნიორებიც“, – განაცხადა სახელმწიფო მდივანმა NBC News-თან ინტერვიუში.
ასევე, ენტონი ბლინკენმა აღნიშნა, რომ თუკი რუსეთის ქმედებები დაუსჯელი გახდება, ეს საერთაშორისო სისტემის წესები, რომელიც სტაბილურობას უზრუნველყოფს, საფრთხეში აღმოჩნდება.
„მსურს, ხალხმა გაიგოს, რომ უკრაინა მნიშვნელოვანია და ჩვენ მტკიცედ ვუჭერთ მხარს მის სუვერენიტეტსა და ტერიტორიულ მთლიანობას, მაგრამ აქ კიდევ უფრო დიდი რამე დევს სასწორზე და ეს არის საერთაშორისო სისტემის გზის ძირითადი წესები. წესები, რომელიც ამბობს, რომ არ შეიძლება ერთმა ქვეყანამ მეორე ქვეყნის საზღვრები ძალის გამოყენებით შეცვალოს, არ შეიძლება ერთმა ქვეყანამ მეორეს უკარნახოს მისი არჩევანი და გადაწყვეტილება, მისი საგარეო პოლიტიკა, ვისთან ჰქონდეს ურთიერთობა. ეს არის ის, რაც არის რუსეთის მიზანი და თუ ჩვენ ამას დაუსჯელს დავტოვებთ, მაშინ მთელი სისტემა, რომელიც უზრუნველყოფს სტაბილურობას, ომების თავიდან აცილებას, საფრთხეში აღმოჩნდება“- აღნიშნა ენტონი ბლინკენმა NBC News-თან მიცემულ ინტერვიუში.
ცნობისთვის, 11 დეკემბერს, რუსეთმა ნატოს მოუწოდა, უკან წაიღოს 2008 წლის ბუქარესტის სამიტის პირობა უკრაინისა და საქართველოს წინაშე, რომ ისინი ალიანსის წევრები გახდებიან და არ განათავსოს შეიარაღება რუსეთის მოსაზღვრე ქვეყნებში, რომელმაც საფრთხე შეიძლება შეუქმნას მის უსაფრთხოებას.
ამის საპასუხოდ ნატოს გენერალურმა მდივანმა, იენს სტოლტენბერგმა განაცხადა, რომ ნატო რუსეთის მოთხოვნას არ შეასრულებს და 2008 წლის ბუქარესტის სამიტის გადაწყვეტილების დეზავუირებას არ აპირებს.
8 დეკემბერს, რუსეთის პრეზიდენტმა, ვლადიმერ პუტინმა განაცხადა, რომ 7 დეკემბერს ჯო ბაიდენთან გამართული სამიტის დროს მხარეები შეთანხმდნენ, სპეციალური სტრუქტურა შექმნან უსაფრთხოების საკითხების, მათ შორის უკრაინის ნატოში გაწევრიანების განსახილველად.
[sexy_author_bio]
