8 მარტს ქალთა ერთი ნაწილი თავისი უფლებების დასაცავად სხვადასხვა სახის ღონისძიებით აღნიშნავს, მეორე ნაწილი – ამ დღეს დღესასწაულად თვლის.
უფლებადამცველი და არასამთავრობო ორგანიზაცია “საფარის” ხელმძღვანელი, ბაია პატარაია “გურია ნიუსთან“ საუბრის დროს ამბობს, რომ 8 მარტი არანაირი დღესასწაული არ არის.
„8 მარტი არის საერთაშორისო ქალთა უფლებების დაცვის დღე. ეს დღე დიდი ხნის წინ შეიქმნა და შემდეგ უკვე გაერომაც აღიარა და რეალურად ადამიანის უფლებების დაცვის დღეა.
საბჭოთა კავშირის დროს, ისევე, როგორც ყველაფერს, გამოეცალა ამ დღესაც გამოეცალა ნამდვილი შინაარსი – 8 მარტს საბჭოთა კავშირის დროს არავინ არ ლაპარაკობდა ქალთა უფლებებზე, არამედ იყო, უბრალოდ დასვენების დღე. ყვავილებს და სუნამოებს ჩუქნიდნენ ხოლმე ქალებს, მადლობებს უხდიდნენ და თავისი პირველადი შინაარსი, ქალთა უფლებების ბრძოლისთვის, რისთვისაც შეიქმნა – ქალთა უფლებების ბრძოლისთვის, სრულად დაიკარგა, იმიტომ, რომ საბჭოთა კავშირში ადამიანის უფლებები არასდროს ლაპარაკობდა“, _ აღნიშნა ჩვენთან საუბრის დროს ბაია პატარაიამ.
8 მარტს მუნიციპალიტეტებში აღინიშნება კონცერტები (წელს გამონაკლისია, სადღესასწაულო ღონისძიებების ჩატარებას კორონავირუსის გამო გადაიდო). ღონისძიებაზე სხვადასხვა სფეროში წარმატებული ქალების დაჯილდოება იყო დაგეგმილი და მათვის საყოფაცხევრობო ნივთის გადაცემა უნდა მომხდარიყო.
ბაია პატარაიას თქმით, ბოლო წლებია, 8 მარტს აქტიურად ავღნიშნავთ, როგორც უფლებების დაცვის დღეს. ამ დღეს ვსაუბრობთ იმ ბევრ პრობლემაზე, რომელიც აქვთ ქალებს და ამ პრობლემების გადაჭრის გზებზე.
„ვცდილობთ პირველადი შინაარსი დავუბრუნოთ 8 მარტს. თუმცა, როგორც ჩანს ადგილობრივ თვითმართველობებამდე ეს ინფორმაცია მისული არ არის და მათ ისევ ჰგონიათ რომ საბჭოთა წესით საჩუქრები უნდა აჩუქონ ქალებს და ეს არის 8 მარტის დანიშნულება. ასეთი ღონისძიება მხოლოდ პოსტსაბჭოთა ქვეყნებში ტარდება – 8 მარტი ქეიფის დღედ ითვლება და ცხადია ქეიფისთვის და ყვავილებისთვის სპეციალური დღეები ქალებს არ გვჭირდება. 8 მარტი მხოლოდ იმიტომ არის ძვირფასი, რომ ერთი დღე ეთმობა ქალთა პრობლემებზე მსჯელობას და ლაპარაკს.
ერთ დღეს უნდა მოხდეს მთელი საზოგადოების მობილიზება, რომ ვილაპარაკოთ იმ უამრავ პრობლემაზე, რომელიც ქალებს აქვთ. სხვადასხვა ქალთა ორგანიზაციები და ფემინისტური ჯგუფები აწყობენ ხოლმე სხვადასხვა ღონისძიებებს ამ პრობლემებზე სასაუბროდ. ეწყობა ხოლმე დემონსტრაციები. კონკრეტული მოთხოვნების წაყენება ხდება ხოლმე მთავრობისთვის და ადგილობრივი ხელისუფლებისთვის და მათგანაც ველოდებით სწორედ პრობლემების გადაჭრაზე მსჯელობას, ახალ წინადადებებსა და ახალ შემოთავაზებებს და არა ყვავილებს, ხორცსაკეპ მანქანასა და მიქსერს,“_ გვითხრა ბაია პატარაიამ.
