ლანჩხუთში, ქალაქის ტერიტორიაზე რამდენიმე ქუჩის მოასფალტება ერთდროულად მიმდინარეობს. სამუშაოების ჯამური ღირებულება სამი მილიონი ლარია.
ეს, რასაკვირველია, მისასალმებელია ამბავია, თუმცა, მოქალაქეთა თქმით, მუნიციპალიტეტში არის ქუჩები, სადაც კომუნისტების ეპოქის შემდეგ ასფალტი არ დაგებულა. არადა, აქაური მოსახლეობა წლებია ელოდება წინასაარჩევნოდ მიღებული დაპირებების შესრულებას.
“მორჩილაძის ქუჩა 20 წელია, რიგში დგას”, _ დანაპირებს ახსენებს მუნიციპალიტეტის პირველ პირებს ლანჩხუთელი ჟურნალისტი მამუკა ქანთარია.
ლანჩხუთელი შოთა მალაზონია მუნიციპალიტეტის ხელმძღვანელობას ურჩევს აღმაშენებლის ქუჩასაც მიექცეს ყურადღება: “შემოიხედეთ აღმაშენებლის ქუჩაზე! ჩვენ არ გვცალია, თქვენ რომ სამუშაო ადგილები შექმენით, იქ ვმუშაობთ. გმადლობთ, რომ დაგვასაქმეთ!”
აღმაშენებლის ქუჩის პრობლემაზე აკეთებს აქცენტს ამ ქუჩის კიდევ ერთი მცხოვრები ჟანა საჯაიაც, რომელიც მერიის ფეისბუქგვერდიდან უშუალოდ მერს მიმართავს: “ბატონო ალექსანდრე, აღმაშენებლის ჩიხი ლანჩხუთს არ ეკუთვნის? 35 წელია, კომუნისტების მერე არ მოასფალტებულა. რა გავაკეთოთ, ეს თხოვნა რომ შეგვისრულო? მოახდინე სასწაული! მომწონხარ და ნუ მაწყენინებ!”
როგორც მუნიციპალიტეტის მერიის გვერდზე მოქალაქეთა მიერ გაკეთებული კომენტარებიდან ირკვევა, მაგალითად, საფო მგელაძის ქუჩის ნაწილში ყოველ გაწვიმებაზე გოგი წულაიას ელიან ანკესით თევზის დასაჭერად… თამარ მეფის ქუჩის ნაწილი მიტოვებულია, ვაჟა-ფშაველას ქუჩამ რა დააშავაო, _ კითხულობს მოსახლეობა მუნიციპალიტეტის მერიის ფეისბუქის გვერდზე.
მოკლედ, მერიის მიერ გაჟღერებულ ინფორმაციას ქალაქის ქუჩებში მიმდინარე ინფრასტრუქტურულ სამუშაოებთან დაკავშირებით, არაერთი მოქალაქე ეხმაურება. ზოგიერთი მათგანი კმაყოფილია და მადლიერებებსაც გამოხატავს მუნიციპალიტეტის ხელმძღვანელობის მისამართით: “ძალიან მაგარია! საუკეთესო გზები ჩვენს ლანჩხუთს! წარმატებები!”
თუმცა, მოქალაქეთა უმეტესობა კრიტიკულია და ქუჩების ჩამონათვალიც, რომლის მცხოვრებლებიც წლებია, ხელისუფლებისგან მიღებული დაპირების შესრულების მოლოდინშია, საკმაოდ ვრცელია.
მაია სანოძე: “ჩვენც გვინდა ასფალტი გამარჯვების ქუჩაზე”.
ანუკა ქურიძე: “ვაჟა-ფშაველას ქუჩამ რა დააშავა?!”
ნინო ზოიძე-ჩხაიძე: “ბარათაშვილის ჩიხის ამომრჩევლებია მარტოოოო, ტალახში ვიხრჩობით სირცხვილია თუ არა…”
ნინო ქინქლაძე: “დარეჯან ქინქლაძის ქუჩა ცენტრშია. რა დავაშავეთ, 100 მეტრია, რა უსაშველოა”.
ანა კუკულავა: “აკეთში როდის დამთავრდება დაწყებული?! თუ მარტო მცირე მონაკვეთია საკმარისი. პრესა და ფეისბუქი ააჭრელეს, რაც მთავარია და მერიის მუშაობა დაგვანახეს ბრმა ხალხს”.
ქეთა ფირცხალაიშვილი: “ღმერთო, მე თუ ვერა, ჩემი შვილები მაინც მოასწარი, მშვიდობის ქუჩაზე ასფალტს”.
მანანა ჩხაიძე: “კვირკველიას ჩიხში, “ჯანმრთელობის” გვერდით , საშინელებაა”.
ქრისტინა ჯორბენაძე: “ნათლისმცემლის ქუჩას, კიდევ რამდენი წელი დააგვიანდება, რომ გზა იყოს”.
თეონა ებრალიძე: “ებრალიძის ქუჩებზე როდის დაიგება?”
თამრიკო ჩხაიძე: “გოგებაშვილის ქუჩას როდის ეღირსება დაგება?”
სოფო თოდუა: “თამარ მეფის ქუჩამ რა დაგიშავათ?”
ზურა ჩიკაშუა: “ბაგრატიონი გვარი არ მოგწონთ, თუ თვითონ ქუჩა?”
ქალაქში რვა ქუჩის კეთილმოწყობას მიესალმება ლანჩხუთელი ნინო ჩახვაძეც, თუმცა, აქვე წერს, რომ გია ურუშაძის ქუჩაზე სამარცხვინო მდგომარეობაა. როგორც ჩახვაძის ნაამბობიდან ირკვევა, გარდა იმისა, რომ აქ გზის სავალი ნაწილი მოუწესრიგებელია, აქაურებს განსაკუთრებით გაუმართავი საკანალიზაციო სისტემისა და სანიაღვრე არხების პრობლემა აწუხებთ:
“ეს კარგია, მაგრამ საინტერესოა, გია ურუშაძის ქუჩას რას ერჩით? გზას ვინ ამბობს, არხები და კანალიზაცია ვერ მოგიწესრიგებიათ… ძველი ტელმანის ქუჩას ვგულისხმობ. ხალხს ატყუებთ ყოველი არჩევნების წინ, გავაკეთებთო და არაფერი. საკმარისია ერთი გაწვიმება და ღელე გადმოდის, ამასთან კანალიზაციებიც უერთდება ღელეს და ფეკალიებით ივსება ქუჩა. როდემდე ითმინოს ხალხმა ეს საშინელება?! გრცხვენოდეთ!” _ წერს მერიის ფეისბუქგვერდზე ნინო ჩახვაძე.
საგულისხმოა, რომ ზემოთ ნახსენები პრობლემის თაობაზე ურუშაძის ქუჩის მცხოვრებლებმა ერთობლივი განცხადებით ლანჩხუთის მერიას ჯერ კიდევ 2020 წლის გაზაფხულზე მიმართეს და საკითხის მოსაგვარებლად დახმარება ითხოვეს.
ურუშაძის ქუჩის მცხოვრებთა ერთობლივ განცხადებას ხელს ათეულობით ადამიანი აწერდა და მისი უშუალო ადრესატი მუნიციპალიტეტის პირველი პირი ალექსანდრე სარიშვილი იყო.
ურუშაძის ქუჩის მოსახლეობა ამბობს, რომ მაშინდელ მათ განცხადებას გარკვეული შედეგი მოჰყვა, თუმცა, სამწუხაროდ, დროებითი ეფექტის მქონე.
“მოვიდნენ და მოვალეობის მოხდის მიზნით გაწმინდეს ზერელედ. საარჩევნო წელი იყო და ვითომ ყურადღება გამოიჩინეს. პრობლემა კი, რომელიც უკვე წლებია, გვაწუხებს, ისევ მოუგვარებელია, წვიმის დროს ისევ გვეტბორება ეზოები და სახლის პირველი სართულები. ღელე, რომელიც რკინიგზის ქვეშ გადის, საშინელ დღეშია, არავის გაუწმენდია. კანალიზაციის პრობლემა ნაწილობრივ მოგვარდა, ქუჩის იმ ნაწილზე, რომელიც რკინიგზის აქეთ მდებარეობს. იქეთ კი საშინელი ამბავია, არც სანიაღვრე არხებია გაკეთებული. კი დაგვპირდნენ ამ ღელის გაწმენდას, მაგრამ დარჩა დაპირებად”, _ ამბობენ ადგილობრივები.
ავტორი
